Read Ibibio Contemporary Bible 2020 Yọọn 13 Bible Online

Yọọn 13 - Ibibio Contemporary Bible 2020 bible

Yọọn 13

¹Akedo ke idaha eyemme itọọñọ Usọrọ Basofa. Yisọs amaadiọọñọ ke ini akem anye adikpọñ uwem ami mbịne Ete amo. Sia anye amaakemama ikọd amọ e-ekebañnake ke ederimbod, anye amaama ammọ akewuọ akpatre.

²Ekesʌk edia ndidia ndubi, ndin Setan amaadọdʌk esịd Yudas Iskariọd, ayịn Saimọn aditap Yisọs.

³Yisọs amaadiọọñọ ke Ete amaayaak ukeed ñkpọ asịn ke adudu imọ, ñko ke imọ ikito Abasi idi, idiinyʌñ inyọñ ibịne Abasi;

⁴ndin anye amaadakka ada ke itie ndidia, asio anyọñ afọñidem, adat tọwịd akịne ke isịn.

⁵Akekweeñe ado, anye atọkkọ mmọọñ asịn ke besịn, atọọñọ adiyet mbed amọ ukod keed-e-keed; ndin akama tọwịd a-anye akekịneke ke isịn akwokko ammọ ukod.

⁶Akediwuọ itie Saimọn Bita, anye ado abịp anye, “Abọọñ, afo ayem inyet miin ukod?”

⁷Yisọs amaabọọrọ anye ate, “Se ami nnam idahami unwañake fiin; ado ke ini iso ayaunwaña.”

⁸Bita amaafaaña ate, “Iyo-o, ndiiyakka afo añyet miin ukod.” Yisọs amaabọọrọ, “Ami mmuuyette fiin ukod awuọọñọ ke afo unieeghe ewana ndomokeed mme Ami.”

⁹Saimọn Bita amaabọọrọ Yisọs ate, “Sia adooho ntodo, Abọọñ, kuuñyet ukod kpọd ado ñyet ubọk mme iwuod kọrọ.”

¹⁰Yisọs amaabọọrọ anye ate, “Mbon e-emaakeyeyie idem inieeghe ntak adimaana nyie afịd idem, eyie ukod kpọd; afịd idem ammọ asasana. Ndin afo amesana, akpesʌk ado idooho afịd ndufo esana.”

¹¹Sia anye amaadiọọñọ awo a-adiitap anye, ntak ado akenam anye abo ke idooho afịd ammọ esana.

¹²Ke anye amaakeyet ammọ ukod ama, anye amaaben afọñ amọ asịne atịmme aketie ke itie amọ. Ndin anye amaabịp ammọ ate, “Inwaña se nnam ado inọ-ọ ndufo?

¹³Ndufo eñkood miin ‘Andikpeeb’ ye ‘Abọọñ,’ emenen ñko sia se ami ndo ado ado.

¹⁴Idahado ami, ami Abọọñ ye Andikpeeb ndufo, mmaiyet ndufo ukod, ndufo ñko inyʌñ iduyette emọ-emọ ukod.

¹⁵Mminọ ndufo uwọd-ñkpọ nte enam ukem-ukem naña ami nnam inọọ ndufo.

¹⁶Ke ata akpanikọ ami ntañ inọ ndufo, ayịnufọk ndomokeed ikponno ikan eteufọk amọ, isʌñutom inyʌññọ ikpon ikan awo andikidọñ anye utom.

¹⁷Idaha emaediọọñọ mme ñkpọ ami, eyaidiọñ ndufo emaeben esịn ke adinam.

¹⁸“Idooho afịd ndufo ke ntañ mbaña; mmediọọñọ mbon se ami mmek. Ado nọ ikọ Abasi e-ekewette asu, ‘anye a-awanake ubọk ndidia ye ami adisio ukod amọ antịgha miin.’

¹⁹“Nnam ndufo ediọọñọ idahami, mbaak amaatịppe ndufo enịm ke akpanikọ ke ami ndo ndudu.

²⁰Ke ata akpanikọ ami ntañ inọ ndufo, awo ake adodo a-anyịmmeke awo ami ndọññọ añnyịmme miin; awo ake adodo anyʌññọ añnyịmme miin, anyịmme anye a-akendọññọ miin.”

²¹Ke Yisọs amaaketañ ami ima, Sịbidịd amọ amaatịmede anye, anye ate, “Ke ata akpanikọ ami ntañ inọ ndufo, keed ke atu ndufo ayaantap miin.”

²²Mme mbed eduseere emọ-emọ ke ñkpaidem, enyʌñ ekere me anie ke anye atañ abaña.

²³Keed ke atu mme mbed a-Yisọs akemaaha aketie adiana anye.

²⁴Ndin Saimọn Bita amaatappa mbed amọ keed abo anye ado ate, “Bịp anye me anie ke anye atañ abaña.”

²⁵Anye ado akenyʌkkọ abere Yisọs, amaabịp anye ate, “Abọọñ, anie ke ado?”

²⁶Yisọs amaabọọrọ, “Awo a-andiinọ uyo ami mmaadeeb ke usan.” Ndin anye akedeeb uyo ke usan amaayaak anọ Yudas Iskariọd, ayịn Saimọn.

²⁷Ke ndo-ndo ado Yudas akebọ uyo, Setan adʌk anye esịd. Yisọs amaabo Yudas ate, “Se afo ayem adinam, sọp idem nam.”

²⁸Ado awo ndomokeed ke itie ndidia ado ikidiọọñọke ntak Yisọs aketañña ikọ ami ye anye.

²⁹Sia Yudas akedooho akama akʌk ammọ, usʌk ammọ ekekere ke Yisọs akebo anye akedep ñkpọ se ediikama inam Usọrọ Basofa me adiyem ñkpọ nnọ mbon uweene.

³⁰Yudas akesʌk abọbọ uyo ado, anye amaawuọ. Idahado akedo akoneyo.

³¹Ke Yudas amaakewuọ, Yisọs amaabo ate, “Idahami ke Ayịn Awo abọ ubọọñ, Abasi ñko abọ ubọọñ ato anye.

³²Adieke Abasi abọọhọ ubọọñ ato anye, Abasi ayaanọ Ayịn ubọọñ ke idem amọ, ndin ayaanọ anye ubọọñ ado ini keed.

³³“Nditọ mmi, ndiiba mme ndufo ke etək-etək ini. Ndufo eyaenyem miin, ado kpa daña ñkedọdọkkọ mme Yuu, mmidọkkọ ndufo ñko idahami: itie nte ami ñka ndufo idiikanna idi.

³⁴“Ufa ewʌhọ ke ami inọ ndufo: idumakka idem ndufo. Kpa naña ami ima ndufo, ana ndufo edumakka keed eken.

³⁵Emaenam ntom, afịd awo eyaediọọñọ ke ndufo edoñño mme mbed mmi, emaedumakka idem ndufo.”

³⁶Saimọn Bita amaabịp anye ate, “Abọọñ, uke ke adika?” Yisọs amaabọọrọ, “Itie nte ami ñka, afo uduukanna uñkeene idahami, ado amaamaana ko ayaañkeene.”

³⁷Bita amaabịp anye ate, “Abọọñ, ntaha mmeñkanna ukeene idahami-e? Mmebeeñe idem adikpa ke ntak mfo.”

³⁸Yisọs amaabọọrọ anye, “Amenekke abeeñe idem adikpa ke ntak mmi? Ke ataa akpanikọ ami ntañ unọ fiin, mbemiso akikọ akpọk, afo ayaañkañ miin ukpa ita!