Read Ibibio Contemporary Bible 2020 Yọọn 16 Bible Online

Yọọn 16 - Ibibio Contemporary Bible 2020 bible

Yọọn 16

¹“Ami idọkkọ afịd ami, mbaak ndufo idiwuọ ikpọñ usʌñ.

²Eyaebịn ndufo esio ke sinakọk, ke akpanikọ ini ayaadi awo ake adodo adiwot ndufo adikere ke inam utom Abasi.

³Ammọ adinam mme uto ñkpọ ami sia ammọ idiọọñọke Ete me ami.

⁴Ami mmidọkkọ ndufo mme ñkpọ ami, mbaak ini amaakem ndufo etoiyo ke mmaidʌt utọñ. Ñkebakka idọkkọ ke akpa sia mmọdo ñkeba mme ndufo.

⁵Idahami, ami ñyaanyọñ mbịne anye a-akendọññọ miin, ado ndufo ndomokeed imbịppe ibo ‘Abiika uke?’

⁶Utu ke ado, esịd ndufo ayọhọ mme mfʌhọ sia mmetañ mme ikọ ami inọ.

⁷Ado ke ataa akpanikọ ami ntañ inọ ndufo, ami ñka ke ufọn ndufo. Ami mmiikpọññọ ndufo, Anọitem idiidieghe ibịne ndufo; ado mmaaka, ami ñyaanọ anye isọk ndufo.

⁸Anye amaadi, anye ayaabiom mbon ederimbod ikpe ke idiọọkñkpọ ye unenido ye ubiireikpe:

⁹ke ntak idiọọkñkpọ, sia mme awo innịmme miin ke akpanikọ;

¹⁰ke ntak unenido sia ami ñyaanyọñ mbịne Ete, ndin ndufo idiiñkịtte miin aba,

¹¹ñko ke ntak ubiireikpe sia ayịn abọọñ isọñ ami aba ke ubiomikpe.

¹²“Nsʌk nnenie umiañ ñkpọ adineme inọọ ndufo, a-awakka akan se ndufo ediikan iyọ idahami.

¹³Ado anye, Sịbidịd akpanikọ amaadi, anye ayaidat ndufo iwọt usʌñ afịd akpanikọ. Anye idiitañña ikọ idem amọ, aditañ se anye akop kpọd, anye ayaidọkkọ ndufo se idiidi ke ini iso.

¹⁴Anye ayaannọ miin ubọọñ sia anye ayaadat se into miin aben iwọt ndufo.

¹⁵Afịd se inie Ete annie miin. Ntak ado anam ami mbo ke Sịbidịd ayaaben afịd se into miin iwọt ndufo.”

¹⁶Akema, Yisọs amaabo ammọ ate “Ke etək-etək ini ndufo idiñkịtte miin aba, ke etək-etək ini ñko eyaemaana eñkịt.”

¹⁷Usʌk mme mbed emaebo keed aken, “Awuọñọ die anye adibo, ‘Ke etək-etək ini ndufo idiñkịtte miin aba, ke etək-etək ini ñko eyaemaana eñkịt,’ mme adibo, ‘Sia ñka mbịne Ete?’ ”

¹⁸Ammọ esʌk ekọbọ adibịp, “Nso-o ke anye atañ abaña ke adibo ‘ke etək-etək ini’? Iñwañake ñnyịn se anye atañ abaña.”

¹⁹Yisọs amaadiọọñọ ke ammọ eyem adimaana ibịp imọ ibaña mme ñkpọ ami, ndin anye abo ammọ ate, “Ndufo ebịp emọ-emọ aken se ‘ke etək-etək ini ndufo idiñkịtte miin aba, ke etək-etək ini ñko ndufo eyaemaana eñkịt awuọñọ?’

²⁰Ke ata akpanikọ ami ntañ inọ ndufo, ndufo eyaetuaha enyʌñ efʌhọ ke ini mbon ederimbod ediidaara. Ndufo eyaefʌhọ ado mfʌhọ ndufo ayaakappa ado idaara.

²¹Awonwaan uman akop ubiak sia ini uman amọ akem, ado ayịn amaamamana anye afre abaña ubiak ado, ataa ntak idaara ke ayịn amana adʌk ederimbod.

²²Ukem-ukem ami ke ado mme ndufo, idahami ado ini mfʌhọ ndufo, ado ñyaamaana ikịt ndufo ndin ndufo eyaedaara, idiibaaha awo ake adikan iben idaara ndufo ifep.

²³Ini ado amaakem, ndufo idimbịppe ñkpọ ba keed. Ke ata akpanikọ ami ntañ inọ ndufo, Ete mmi ayaainọ ndufo ñkpọ ake adodo e-ediibịp ke anyịñ mmi.

²⁴Tutu ami, kpaanam ndufo imbịppe ñkpọ ndomokeed ke anyịñ mmi. Ibịp ke eyaebọ, ndin idaara ndufo ayaayọhọ.

²⁵“Akpesʌk ado ami ntañña ikọ inọ ndufo ke ñke, ado ini ayaadi a-ami ndiitoppo ñke aba ado ndiitañ anwa-anwa mbaña Ete mmi inọ ndufo.

²⁶Ini ado amaakem, ndufo ediibịp ñkpọ ke anyịñ mmi. Mbooho ke ami ndiibịp Ete inọ ndufo.

²⁷Iyoo, Ete ke idem-idem amọ ima ndufo, sia ndufo ememma miin enyʌñ enịm ke ami ñketo Abasi ndi.

²⁸Ñketo Ete ndidʌk ederimbod; idahami ami ñyaakpọñ ederimbod ntịmme mbịne Ete mmi.”

²⁹Mme mbed amọ emaebo anye ete, “Idahami, afo atañ ikọ anwa-anwa, utoppo ñke aba.

³⁰Idahami ñnyịn imikịt ke afo amediọọñọ afịd ñkpọ, ke ufọn ibaaha awo adubịp fiin mbịme. Ami anam ñnyịn inịm ke afo ato Abasi adi.”

³¹Yisọs amaabọọrọ, “Ndufo emenịm ndin!

³²Ado ini ayaadi, anyʌñ adidi ama, a-ndufo ediisuana, anie afañ awaak adʌk. Eyaefeeñe eñkpọñ miin ikpọọñ. Ado ami mbaaha ikpọọñ, sia Ete mmi mmọdo mme ami.

³³“Ami idọkkọ ndufo mme ñkpọ ami, ma ndufo enie emem ke ami. Ke ederimbod ami ndufo eyaekịt mfịna. Ado isọñ esịd! Ami mmekan ederimbod.”