Read Ibibio Contemporary Bible 2020 Yọọn 18 Bible Online

Yọọn 18 - Ibibio Contemporary Bible 2020 bible

Yọọn 18

¹Ke anye amaakebọñ akam ama, Yisọs amaasaña mme mbed amọ aboiyo abedeñ Kidọn. Inwañ amaaba ke edem mbeñ uko, ndin anye ye mbed ammọ emaefrọ eka do.

²Yudas, a-aketappa anye anọ, amaadiọọñọ itie ado sia Yisọs amaasika itie ado ndin-ndin ye ammọ.

³Yudas amaasaña aka inwañ ado, adat mme udịm mbon ekọñ a-mme ikpọ aku ye mme Farisi ekenọọhọ anye, ekaama utuenikañ, mme ikañ emuum, ye mme ñkpọ anwan mfen edika itie ado.

⁴Sia Yisọs amaakediọọñọ afịd ñkpọ se ikibiitịppe inọ anye, anye amaasaña awuọ akebịp ammọ ate, “Anie ke ndufo eyem?”

⁵Ammọ ebọọrọ ete, “Yisọs, Ayịn Nasared.” Yisọs amaabọọrọ ammọ ate, “Ami ndo anye.” (Yudas, andikitap anye mmọdo akeda ye ammọ.)

⁶Ke Yisọs amaakebo ammọ ate, “Ami ndo anye,” ammọ emaetiime edem-edem eduọññọ ke isọñ.

⁷Anye amaamaana abịp ammọ ayọhọ akañ iba ate, “Ndufo ebo ke iyem anie?” Ammọ ete, “Yisọs, Ayịn Nasared.”

⁸Yisọs amaabọọrọ ammọ abo ate, “Mmaatatañ inọ ndufo ke ami ndo anye. Ndin akpedo enyem miin, iyaak mbon ami enyọñọ.”

⁹Anye aketañ ntom nọ ikọ brọfesi asu a-anye akebooho ate, “Ami ñkeduọọhọ ndomokeed ke atu se afo akennọ.”

¹⁰Mi ke Saimọn Bita akesio akañkañ akpi ayịnufọk akwa aku utọñ udom adiañña. (Anyịñ awo ado akedo Maakus.)

¹¹Yisọs ate Bita, “Sịn afịd mfo ke efọk! Me inaaha nte ami ñnwọñ kọọb e-Ete mmi annọọhọ miin?”

¹²Ndin mbon ekọñ ye etubom ammọ, ye etubom mme Yuu emaemʌm Yisọs. Emaebọp anye ubọk

¹³enyʌñ eben anye eka ke iso Anas, ete anwaan Kaifas, a-akedooho akwa aku isua ado.

¹⁴Kaifas akedo awo a-akenọọhọ etubom mme Yuu item abo ke akpaafọn awo keed adikpa ke iwuod afịd awo.

¹⁵Saimọn Bita mme mbed keed mfen emaekeene Yisọs. Sia akwa aku amaakediọọñọ mbed anye ado, anye amaakeene Yisọs adʌk esịd akwere akwa aku.

¹⁶Ado Bita akena atuak ada ke inuaatob. Mbed akediọọñọke akwa aku amaatịmme adineme ye awonwaan a-akekpemeke inuaatob, anyʌñ adat Bita adʌk esịd akwere.

¹⁷Awonwaan ado amaabo Bita ate, “Afo ñko ado keed ke atu mbed awo ami?” Bita amaabọọrọ, “Idooho ami.”

¹⁸Atueb amaaba, ndin nditọufọk ye ikpọ mbon utom ñko emaeda ekanna ikañ a-ammọ ekebarake ekʌk, ma ewue ikañ. Bita akeda do ñko ye ammọ awue ikañ.

¹⁹Akwa aku ndin amaabịp Yisọs abaña mbed amọ ye mme ukpeebñkpọ amọ.

²⁰Yisọs amaabọọrọ anye ate, “Ami mmaatañ anwa-anwa nnọ afịd ekondo, mmaakpeeb mme awo ñkpọ ke mme sinakọk ye ke tembịd, a-mme adaukara, nditọ mme Yuu esidisooboke. Mme awo emaekop ikọ mmi sia ñkekpeebe ñkpọ ndomokeed ke ndịbe.

²¹Nso-o ndin inam nọ afo ambịp miin. Akpekap abịp mbio se ikikop ukpeebñkpọ mmi. Ammọ ediọọñọ afịd se ñkekpeeb.”

²²Ke anye amaaketañ ntom, awo ekọñ keed amaasiak Yisọs ufia, ate anye, “Afo abọọrọ akwa aku ntodo?”

²³Yisọs ate anye, “Adieke ndueeghe se ntañ, nwọt ndudue ado. Ado akpedo ñketañ akpanikọ, nso-o ido ntak afo ammiaha miin?”

²⁴Anas ndin anọ Yisọs, mme daña ekebọp anye, ate esọk Kaifas, akwa aku.

²⁵Saimọn Bita akesʌk ada ke ndo aka iso awue ikañ. Ammọ emaebịp anye ate, “Nte afo udooho awo keed ke atu mbed amọ?” Anye amaakañ, abo ate, “Idooho ami.”

²⁶Ayịnufọk akwa aku keed, ayakka awo a-Bita akediaññake utọñ, amaamaana abo Bita ate, “Afo abo ke ami ñkukịtte fiin ke inwañ mme anye?”

²⁷Bita amaamaana akañ, ndin ukem-ukem idahado, akikọ atọọñọ akpọk.

²⁸Mme etubom mme Yuu emaeben Yisọs ndin ekpọñ iso Kaifas eka atʌñ Baided, Kọfnọ Rum. Ayo amaakpere adisieere. Ami akesịn mbon se ikiben anye ika ikikanna idʌk atʌñ Baided mbaak edibiad ibed adinam asana mme Yuu ke abaña ndutʌm usọrọ Basofa.

²⁹Ke ntodo, Baided amaawuọ akebịp ammọ ate, “Nso-o ido ndudue awo ami? Nso-o ke ekood anye ikpe ebaña?”

³⁰Ammọ ete anye, “Akpedo awo ami inieeghe ndudue, ñnyịn ikpimʌmmọ anye idi mi idiyaak unọ.”

³¹Baided amaabo ammọ ate, “Iben anye ika ikikpe ikpe amọ naña ibed ndufo ado.” Mme Yuu emaefaaña ete, “Ñnyịn inieeghe unen adibiire ikpe ñkpa awo.”

³²Ami akedo adinam ikọ se Yisọs aketañ abaña utọ ñkpa se anye adiikpa asu.

³³Baided amaatịmme adʌk akwere amọ, akedọñ ate eben Yisọs edi, anyʌñ abịp Yisọs ate, “Nte afo ado adidem mme Yuu?”

³⁴Yisọs ate anye, “Afo atañ ikọ ami ke ifiọk idem mfo, me ado se mbon awo etañ unọ fiin embaña miin?”

³⁵Baided amaabo ate “Ami ndo Yuu? Ñkọ mbon ndufo ye mme ikpọ aku ndufo uben fiin ediyaak ennọ! Nso-o inekke ido se afo anam?”

³⁶Yisọs ate anye: “Ubọọñ mmi idooho ubọọñ ederimbod ami. Akpekedooho ntodo, nditọufọk mmi ekpaenwana tutu mme etubom Yuu ikpikanna immʌm miin. Ado ubọọñ mmi ato ke itie mfen.”

³⁷Baided ndin abịp anye, “Ke ntodo, nte afo ado adidem?” Yisọs amaanọ ibọọrọ ate, “Afo abo ke ndo adidem. Ke aditịm ntañ, ntak a-ami ñkemanake ñnyʌñ ndi ke ederimbod ado adinam ekondo ediọọñọ akpanikọ. Afịd awo se ima akpanikọ edo mme andikop uyo mmi.”

³⁸Mi ke Baided akebịp Yisọs abo, “Nso-o ido akpanikọ?” Ke anye amaaketañ ami, anye awuọ abịne mme Yuu e-ekebonoke ke anwa esiin, akebo ammọ, “Ami ñkịtte ndudue ndomokeed ke idem awo ami.

³⁹Nte ido ndufo adooho akpena ami nsaana awo ñkpakọb keed ñyaak inọ ndufo ke ini usọrọ Basofa. Emeyem ñyaak adidem mme Yuu inọ?”

⁴⁰Afịd ammọ edọñ uyo keed ebo, “Kuuyaak awo ami-o! Utu ke ado yaak Barabas.” Ndin Barabas akedo awo akesịnne nsọk nọ mme awo esịn ntịme ke abio.