Read Ibibio Contemporary Bible 2020 Yọọn 2 Bible Online

Yọọn 2 - Ibibio Contemporary Bible 2020 bible

Yọọn 2

¹Ke usen ita amaakefrọ eka Yisọs amaakaa usọrọ ndọ ke idʌñ Kena ke Kadidi.

²Emaenyʌñ ekood Yisọs ye mme mbed amọ.

³Ukọd se mme anam usọrọ ndọ ekenie enọ usọrọ ami amaakwueeñe, ndin eka Yisọs akebo anye, “Ammọ inieeghe ukọd aba.”

⁴Yisọs amaabọọrọ anye, “Mma, nso-o ido ndubehe mmi? Ini mmi ikemme diin.”

⁵Ado eka amọ amaabo mme nditọufọk ndọ ate, “Inam se anye abobo ndufo enam.”

⁶Abañ mmọọñ itiokeed emaediọghọ do, e-ekenịmme enọ adinam mme awo enam idem asana ke ido mme Yuu; abañ keed amaakeme idọñọ ñkpọ nte kadọn edịp awuọ edịp mme duop.

⁷Yisọs amaabo mme nditọufọk ndọ ate, “Edọñ mmọọñ ke mme abañ ami.” Ndin ammọ emaedọñ mmọọñ ke mme abañ ado eyọọhọ.

⁸Akem Yisọs abo ammọ, “Ikoi ubaak iben isọk ekamba akama usọrọ.” Ammọ emaenam ntodo;

⁹ndin ekamba akama usọrọ amaatʌm mmọọñ a-amaakekappa ukọd. Anye ikidiọọñọke nte ato me edat mọọ, sʌk mme nditọufọk ekediọọñọ. Ekamba akama usọrọ ami amaatappa ebendọ awuọ,

¹⁰anyʌñ abo anye ate, “Afịd awo esieto edeeme ata inem ukọd ndin edideeme adiọọkinua ke mme isenawo emaekenwọnwọñ inem ado yak ayʌkkọ; ado afo atịmme anịm ata inem ukọd tutu idahami.”

¹¹Utịbe ñkpọ a-Yisọs akenamma mi ke Kena ke Kadidi akedo akpa ke atu mme idiọọñọ a-anye akedatta ayaara ubọọñ amọ, ndin mme mbed amọ enyʌñ enie mbuọdidem ke anye.

¹²Usọrọ ndọ ami akekweeñe, anye amaakpọñ aka Kapanọm ye eka, nditọeka ideen ye mbed amọ. Ammọ ekeba do ke ibad-ibad usen.

¹³Ke ini usọrọ Basofa mme Yuu amaakedikpere, Yisọs amaaka Yerusedem.

¹⁴Anye amaakịt naña nte mme awo enyaam enañ, edọñ ye ibiom, mbon ukpʌghọ akʌk enyʌñ etie do ke mme afe tembịd.

¹⁵Yisọs amaadat udʌk anam ikpa, abịne mme awo asiooño ke afe tembịd, abịne mme edọñ ye mme enañ ñko, asuan akʌk mme akpəho akʌk ke isọn, anyui mme akpokoro ammọ atọọñ.

¹⁶Anye amaabo mme anyam ibiom ate, “Itañ afịd mme ñkpọ ami isiooño mi! Itre adiben ufọk Ete mmi nnịm itie udua!”

¹⁷Ndin mme mbed amọ emaetoiyo brọfesi ami ke ñwed Abasi. “Akpọsọñ ima ufọk mfo iyakka mbọ emem.”

¹⁸Ndin mme Yuu emaebịp anye, “Nso-o idiọọñọ ke afo akpekan adiwọt ñnyịn edisọọñọ ke Afo amenie adudu adinam mme ñkpọ ami?”

¹⁹Yisọs amaabọọrọ ate, “Iwuud tembịd ami, ndin ami ñyaamaana mbọp anye ke usen ita.”

²⁰Mme Yuu emaebọọrọ “Ekedat isua aba mme itiokeed adibọp tembịd ami, ndin afo ayaabọp anye ke usen ita?”

²¹Ado tembịd a-anye aketañña abaña akedo ikpọkidem amọ.

²²Yisọs amaakeset ke ñkpa, mme mbed amọ emaetoiyo se anye aketañ ami. Ndin ammọ emaenịm ikọ Abasi ye se Yisọs aketañ ke akpanikọ.

²³Ke ini anye akebaaha ke Yerusedem ke ntak Usọrọ Basofa, uwak awo emaenịm anye ke akpanikọ ke ini ammọ ekekịtte mme utịbe idiọọñọ se anye akenam.

²⁴Ado Yisọs ikiyakka idem amọ inọ ammọ, sia anye amaadiọọñọ uduod afịd awo.

²⁵Anye ikiyemme ntiense ito awo ndomokeed, sia anye amaadiọọñọ akikere esịd awo keed-e-keed.