Read Ibibio Contemporary Bible 2020 Yọọn 3 Bible Online

Yọọn 3 - Ibibio Contemporary Bible 2020 bible

Yọọn 3

¹Amaaba awo Farisi keed a-akekereke Nikodimọs, keed ke atu mme akwaesop ukara mme Yuu.

²Anye amaadi adisoobo Yisọs akonayo keed anyʌñ abo anye ate, “Andikpeeb, ñnyịn imidiọọñọ ibo ke afo ado andikpeeb a-atooho Abasi. Sia awo ndomokeed ikpikanna inañña mme utịbe idiọọñọ ñkpọ a-afo anaññake adieke Abasi mmiibaaha mme anye.”

³Ke ibọọrọ Yisọs amaabo anye ate, “Ke ata akpanikọ ami ntañ inọ ndufo, ibọhọke awo amaana amana ufa, anye idiikanna ikịt abio ubọọñ Abasi.”

⁴Ado Nikodimọs abịp anye ate, “Awo adinam die imaana imana ke ini anye amaakesọñ? Ke aditʌm ntañ, anye ikanna itịmme ikidʌk idịb eka amọ ayọhọ ñkemba ikimaana imana!”

⁵Yisọs abọọrọ, “Ke ata akpanikọ ami ntañ inọ ndufo, ibọhọke awo amana ato mmọọñ ye Sịbidịd, anye ikemeke idʌk abio ubọọñ Abasi.

⁶Abʌkidem aman abʌkidem, ado Sịbidịd anyʌñ aman Sịbidịd.

⁷Ikpinaaha ukpa fiin idem Ami adibo, ‘Ana afo amaana amana ufa.’

⁸Afịm afịme aka nte anye ama. Afo amekeme adikop uyom amọ ado ukanna utañ nte anye ato me nte anye aka. Ado ntodo mme afịd awo e-emanake eto Sịbidịd.”

⁹Nikodimọs abịp anye ate “Ami akeme die aditịppe?”

¹⁰Yisọs amaabo anye, “Afo ado andikpeeb ke Isred, ndin afo udiọọñọke mme ñkpọ ami?

¹¹Ke ata akpanikọ ami ntañ inọ ndufo, ñnyịn itañ se ñnyịn idiọọñọ, inyʌñ itie ntiense inọ se ikịt, ado ndufo isʌkkọ inyenyịmme ntiense ñnyịn.

¹²Mmetañ ñkpọ abʌkidem ami unọ fiin ado afo unịmme ke akpanikọ; die ndin ke afo uduunịm ke akpanikọ adieke ntañña mme ñkpọ abio ubọọñ?

¹³Kpaanam awo ndomokeed ikaaha abio ubọọñ ibọhọke anye a-aketooho abio ubọọñ Abasi adi, adooho Ayịn Awo.

¹⁴Nte naña Moses akebenne udʌkikọd anyan ke akpautatan, ntodo ke ana ebenne Ayịn Awo,

¹⁵ma afịd awo e-enịmme anye ke akpanikọ enie nsi-nsi uwem.

¹⁶“Sia Abasi akeneenekke ama ederimbod asịn anye akenọ ukweeñe Ayịn keed anye anieeghe mbaak awo ake adodo anịmme anye ke akpanikọ akuutak ado anie nsi-nsi uwem.

¹⁷Sia Abasi ikinọọhọ Ayịn amọ adi ederimbod adibiom ederimbod ikpe, ado adinyaaña ederimbod.

¹⁸Awo ake adodo anịmme anye ke akpanikọ, awo idiibiommo anye ikpe, ado awo ake adodo a-mmiinịmme anye ke akpanikọ, ekap ebobiom anye ikpe, sia anye inịmme ke anyịñ ukweeñe Ayịn keed a-Abasi anieeghe ke akpanikọ.

¹⁹Anye ami ado ubiireikpe: Unwana adi ederimbod, ado mme awo etịmme ema akịm, utu ke unwana, sia se ammọ enañña ekedọññọ ndiọi.

²⁰Awo keed ake adodo a-anamma idiọọkñkpọ asasua unwana ndin idiidʌkkọ itie unwana mbaak ediyaara mme idiọọkñkpọ ammọ.

²¹Ado awo aduuho uwem akpanikọ adʌk unwana, ma ekịt anwa-anwa ke se ammọ ekenam, ke enam eto Abasi.”

²²Ke ñkpọ ami amaakeboiyo, Yisọs ye mbed amọ emaekaiya esịd idʌñ Yudia, nte anye akeba ye ammọ ke etək ini anyʌñ aduọk mme awo mmọọñ.

²³Ndin Yọọn ñko akesʌk aduọk mme awo mmọọñ ke Anọn a-akpereke Sadịm, sia mmọọñ amaanekke aba ke udo ndin mme awo emaesidi do edibọ uduọkmmọọñ.

²⁴Ami aketịppe mbemiso ekesịn Yọọn ke ufọk ñkpakọb.

²⁵Mfaaña amaatọọñọ ke ufọọd usʌk mme mbed Yọọn ye awo Yuu keed kebaña edu adinam idem asana.

²⁶Ndin ammọ edibịne Yọọn enyʌñ ekebo anye ate, “Andikpeeb, awo a-akebaaha ye afo ke edem inyañ Yọdan uko, anye a-afo akenọọhọ ikọ ntiense abaña, asʌk aduọkmmọọñ ndin afịd awo ekịppe ebịne anye.”

²⁷Yọọn amaabọọrọ ammọ, “Awo akeme adibọ sʌk se enọ anye eto abio ubọọñ Abasi kpọd.

²⁸Ndufo ke idem ndufo emekeme ido ntiense ebo ke mmaabo, ‘Ami ndooho Mesaya ado endọọdọñ ebo mbem anye iso ndi.’

²⁹Anwaan ndọ anie ebendọ. Ufan a-aseeghe ñkpọ abaña ebendọ ami atietie anyʌñ akpañ utọñ anọ anye, esịd anyʌñ ayọhọ ye idaara anye amaakop uyo ebendọ. Inemesịd ado ado ake mmi, ndin idahami esịd mmi ayọhọ mme idaara.

³⁰Ana anye akpon añkan miin; ana nte ami nsịp.

³¹“Anye a-atooho anyọñ akpon akan afịd awo; anye a-atooho isọñ ami anie isọñ ami, anyʌñatañ ikọ nte awo a-atooho isọñ ami. Anye a-atooho abio ubọọñ ado adikan afịd awo.

³²Anye ado ntiense anọ se anye akịd anyʌñ akop, ado awo ndomokeed inịmme ntiense amọ ke akpanikọ.

³³Awo a-anịmme ikọ ntiense ami ke akpanikọ anyịmme ate ke Abasi ado akpanikọ.

³⁴Sia awo a-Abasi adọññọ atañ ikọ atooho Abasi, sia Abasi anọ Sịbidịd ado ayọhọ-ayọhọ.

³⁵Ete ama Ayịn ndin ayaak afịd ñkpọ asịn anye ke ubọk.

³⁶Awo ake adodo anịmme Ayịn ke akpanikọ anie nsi-nsi uwem, ado awo keed ake adodo asịne Ayịn idiikịtte uwem, sia iyadesịd Abasi adoro anye ke idem.”