Read Ibibio Contemporary Bible 2020 Yọọn 4 Bible Online

Yọọn 4 - Ibibio Contemporary Bible 2020 bible

Yọọn 4

¹Yisọs amaadidiọọñọ ke mme Farisi emaekop ete ke mbed Yisọs emaewak ndin anyʌñ aduọk mme awo mmọọñ akan Yọọn Aduọkmmọọñ,

²akpesʌk ado ke aditʌm ntañ, ikidooho Yisọs aduọkmmọọñ, akekap ado mbed amọ.

³Ado anam anye akpọñ Yudia, amaana atịmme aka Kadidi.

⁴Idahami, akena anye asana aboyo ke Sameria.

⁵Ndin anye adisịm abio keed ke Sameria a-akereke Saika a-akpereke isọñ a-Yekọb akenọọhọ ayịn amọ Yosef.

⁶Ube mmọọñ Yekọb akeba do, ndin sia idem amaakemem Yisọs ato anyan isañ, anye amaasuuk atie akpere ube mmọọñ ami. Akedo ñkpọ nte ñkanika duop ye iba uweeme.

⁷Ke ini awonwaan Sameria keed adieeghe adikoi mmọọñ, Yisọs ate anye, “Mbọk ayaannọ mmọọñ ñwọñ?”

⁸(Mme mbed amọ emaekaiya abio adidep ndidia.)

⁹Awonwaan Sameria amaabo anye, “Afo ado Yuu ndin ami ndo awonwaan Sameria. Akpesaña die ambeeñe mmọọñ adinwọñ?” (Sia mme Yuu isinieghe ewana ye mme mbon Sameria.)

¹⁰Yisọs abọọrọ anye ate, “Akpedo amaadiọọñọ enọ Abasi mme awo u-ubịppe fiin mmọọñ ami, afo akpaabịp anye ndin anye akpaunọ fiin mmọọñ uwem.”

¹¹Ndin awonwaan ado amaabo, “Ete, Afo unieeghe ñkpọ se akama akoi mmọọñ, ñko ube mmọọñ ami atəñọ. Ke mmọ-ọ ke afo adibọ mmọọñ uwem ami?

¹²Nte afo amekpon akan ete ñnyịn Yekọb a-akinọọho ñnyịn ube mmọọñ ami, a-anye ke idem amọ akesinyʌññọ añwọñ mmọọñ ato mi, anye kpa ye nditọ ideen mme ufene amọ?”

¹³Yisọs amaabọọrọ anye ate, “Awo keed ake adodo añwọññọ mmọọñ ami, mmọọñ ayaamaana awʌt anye,

¹⁴ado awo keed ake adodo añwọññọ mmọọñ a-ami ndiinọ anye, itọñ idiisatta anye aba. Ke akpanikọ mmọọñ a-ami ndiinọ anye ayaakappa idịm ke esịd idem amọ afeghe akesịm uwem nsi-nsi.”

¹⁵Ndin awonwaan ami, abo anye, “Ete, nnọ miin mmọọñ ami mbaak itọñ idinsat aba, ami ñko ñkuusutịmme ndikoi mmọọñ mi aba.”

¹⁶Yisọs abọọrọ anye ate, “Ka ke kood ebe mfo di.”

¹⁷Anye abọọrọ ate, “Ami nnieghe ebe.” Yisọs abo anye, “Amenen ke ini abooho ke imọ inieeghe ebe.

¹⁸Akpanikọ ado afo amaanenie ebe ition ndin awodeen a-afo anieeghe idahami idooho ebe mfo. Se afo asʌk atañ idahado ado ata akpanikọ.”

¹⁹Awonwaan ado abo ate, “Ete, mmekịt ndin ke afo ado brọfed.

²⁰Mme ete ñnyịn ekesikpono Abasi ke anyọñ abod ami, ado ndufo, mme Yuu ebo ke Yerusedem ado itie anaaha ate ñnyịn ikpono Abasi.”

²¹Yisọs abo anye, “Nnịm miin ke akpanikọ, awonwaan, ini asʌk adi a-ndufo miidiikponoke Abasi Ete aba ke abod ami, me ke Yerusedem.

²²Ndufo mbon Sameria ekpono se ndufo miidiidiọọñọke; ado ñnyịn ikpono se idiọọñọ, sia adinyaaña ato mme Yuu.

²³Ado ini asʌk adi, ndin adidi ama, a-mme ata akpono a-Abasi ediikpono Ete ke Sịbidịd ye akpanikọ, sia ammọ edoñño utọ mme akpono Abasi e-Ete ayemme.

²⁴Abasi ado sịbidịd ndin mbon e-ekponoke anye ana ekpono anye ke sịbidịd ye ke akpanikọ.”

²⁵Akem awonwaan ado amaabo, “Mmediọọñọ ke Mesaya” (e-ekootto Krais) “asʌk adi. Anye amaadi, anye ayaanam afịd ñkpọ iñwaña ñnyịn.”

²⁶Ndin Yisọs abo, “Ami a-nsʌkkọ ntañ ikọ ye afo mi, ami ndo anye.”

²⁷Kpa ke ini ado mbed amọ enyọñ edi, idem anyʌñ akpa ammọ adikịt nte anye atañ ikọ mme awonwaan. Ado awo ndomokeed ikibịppe ibo. “Nso-o ke afo ayem?” me “Ntak a-afo atañña ikọ ye anye-e?”

²⁸Ndin awonwaan ado amaakpọñ abañ mmọọñ amọ atịmme anyọñ aka abio aketañ anọ mme awo ate,

²⁹“Idi idise awo a-atañña afịd ñkpọ se ñkenanam annọ. Mme anye akap ado Krais?”

³⁰Ammọ emaewuọọñọ ekpọñ abio ekaiya edikịt anye.

³¹Ke ini ami, mbed amọ ekesʌk efịna anye ete, “Andikpeeb, dia ñkpọ.”

³²Ado anye abo ammọ, “Ami mmenie ndidia adidia a-ndufo miidiọọñọke ñkpọ ibaña.”

³³Ndin mme mbed amọ emaedubiime idem ammọ ete, “Me awo amaadat ndidia isọk anye?”

³⁴Yisọs abo, “Ndidia mmi ado adinam uduak anye a-akendọññọ miin ñnyʌñ ñkweeñe utom amọ.

³⁵Nte ndufo isibooho, ‘Ayak afiọñ inaañ mfen ndin idọk?’ Ami ntañ inọ ndufo, itat anyen ndufo, iseed mme inwañ! Ini idọk a-akem.

³⁶Etọtọọñọ adikpe adọkidọk akʌkutom amọ, ndin anye ñko akoono mfịd anọ nsi-nsi uwem ma anditọtọ ye andidọdọk edaara keed.

³⁷Ado asịn ñke ami, ‘Awo keed atọtọ, mfen adọọdọk’ ado akpanikọ.

³⁸Ami ñkidọñ ndufo ekedọk se ndufo miikinamma inịm. Mbio mfen ekenam akpọsọñ utom ado ndufo emedibọ ufọn utom ammọ.”

³⁹Uwak mbon Sameria e-eketooho abio ado emaenịm anye ke akpanikọ ke ntak ikọ ntiense awonwaan ado a-akekaaha ntom, “Anye amaatañ afịd ñkpọ se ñkenanam annọ.”

⁴⁰Ndin ke ini mbon Sameria ado edikịtte anye, ammọ emaekpeiye anye ete yak anye atie mme mmimọ. Anye amaatie usen iba mme ammọ.

⁴¹Ke ntak ikọ amọ, uwak mbon mfen emaekappa esịd enyʌñ enịm ke akpanikọ.

⁴²Ammọ emaebo awonwaan ado, “Ñnyịn inịmme ke akpanikọ ke ntak se afo aketañ ikpọọñ, idahami ñnyịn imikop ke idem ñnyịn, inyʌñ idiọọñọ ite ke awo ami anekke ado Andinyaaña ederimbod.”

⁴³Usen iba amaakeboiyo, anye amaakpọñ aka Kadidi.

⁴⁴(Yisọs ke idem amọ amaasio atañ ke brọfed inieeghe ukpono ke abio amọ.)

⁴⁵Ke ini anye asịmme Kadidi, mbon Kadidi emaedaara anye. Ammọ emaekịt afịd ñkpọ se anye akenam ke Yerusedem ke usọrọ Basofa, sia ammọ emaeba do.

⁴⁶Anye amaana aka Kena ke Kadidi, itie a-anye akenamma mmọọñ akappa ukọd. Ndin amaaba akọnsid a-aketooho ufọk ekandịk abọọñ ke Kapanọm i-idem akebiakka ayịn amọ.

⁴⁷Ke ini awo ami akekop ate ke Yisọs amaato Yudia adisịm Kadidi, anye amaabịne anye anyʌñ akekpeiye anye adi adikọk ayịn awodeen imọ udọñọ, sia amaakpere ñkpa.

⁴⁸Yisọs amaabo, “Ibọhọke ndufo ekịt mme idiọọñọ utịbe ñkpọ ye ñkpọ ñkpaidem, ndufo idiinịmme ke akpanikọ.”

⁴⁹Ekandịk abọọñ awo ami abo, “Ete, di mbemiso ayịn mmi akpa.”

⁵⁰Yisọs abọọrọ ate, “Kaa, ayịn mfo ayaadu uwem.” Awo ami amaanịm se Yisọs aketañ anyʌñ anyọñ.

⁵¹Ke ini anye asʌkkọ asaña ke usʌñ unyọñọ, mme nditọufọk edikịt anye enyʌñ edọkkọ ke ayịn amọ adu uwem.

⁵²Ke ini anye abịppe adidiọọñọ ini i-idem akesọññọ ayịn amọ, ammọ ebo anye, “Ufiop idem ado akekpọñ anye ñkpọñ ke ñkanika keed uwueeme.”

⁵³Ndin ete ayịn ami adiọọñọ ate ke ami akedo ukem ini a-Yisọs akeboogho anye, “Ayịn mfo ayaadu uwem.” Do ndin anye ye afịd ufọk amọ emaenịm Yisọs ke akpanikọ.

⁵⁴Anye ami akedo ayọhọ idiọọñọ utịbe ñkpọ iba a-Yisọs akenamma, amaaketo Yudia idiwuọ Kadidi.