Read Ibibio Contemporary Bible 2020 Yọọn 5 Bible Online

Yọọn 5 - Ibibio Contemporary Bible 2020 bible

Yọọn 5

¹Etək ini amaakeboiyo, Yisọs amaaka Yerusedem ke ntak usọrọ mme Yuu.

²Ndin ke Yerusedem aba ñkpọdiọghọ mmọọñ keed, e-ekoodo ke usem Arameik Betesda, a-mme abai ition enyʌññọ edudak ekanna anye ekʌk, akpere Inuaatop Edọñ.

³Mi ke ata uwak mme mbon ñkpọnnam ekesidunam, mme nnan, mbʌñọ ye mme akpaubeñ.

⁴Ke ini ke ini, enyere Abọọñ amaasidi adibəkko mmọọñ ami. Awo keed ake adodo a-atooho adʌk mmọọñ ami, emaebəkko ntom, amaasibọ nsọñidem akpekọm se udọñọ ikidọñ anye.

⁵Amaaba awo keed do a-akedọñọke ke isua edịp mme itiaita.

⁶Ke ini Yisọs akekịtte anye nte ana do anyʌñ adiọọñọ ke anye abọ ufen ado akpeene eti-eti, anye amaabịp anye ate, “Nte afo ameyem idem usọñ?”

⁷Awo udọñọ ami abọọrọ ate, “Ete, ami nnieeghe awo se imben miin isịn ke ñkpọdiọghọ ami, ke emaebəkko mmọọñ amọ. Ke ini ami ndomoke adidʌk, awo mfen ambebem iso adʌk.”

⁸Ndin Yisọs amaabo anye, “Dakka da! Ben aya mfo nyʌñ saña.”

⁹Ini keed-ini keed, idem amaasọñ awo ami, anye anyʌñ aben aya amọ asaña. Usen a-ñkpọ ami aketịppeke akedo usen Sabad.

¹⁰Do ndin mme Yuu emaebo awo e-ekekọkkọ udọñọ ete, “Sabad ado ami; ibed ukpan fiin afo adiben aya mfo.”

¹¹Ado anye amaabọọrọ, “Awo a-akenamma idem ansọñ akembo, ‘Ben aya mfo nyʌñ saña.’ ”

¹²Do ndin ammọ ebịp anye, “Anie awo ido awo a-akubooho yak aben aya mfo asana?”

¹³Awo e-ekekọkkọ udọñọ ikinieeghe ifiọk ndomokeed mme anye akedo anie awo, sia Yisọs amaasop ke atu mme awo e-ekebaaha do.

¹⁴Akem Yisọs adikịt anye ke tembịd anyʌñ abo anye, “Sese, idem amaana usọñ. Kuunam idiọọkñkpọ aba, mmiidooho ntodo ñkpọ adiọọhọ akan ado akeme aditịppe unọ.”

¹⁵Awo ami amaanyọñ anyʌñ akedọkkọ mme mbọọñ Yuu ate ke akedo Yisọs akenam nọ idem isọñ imọ.

¹⁶Sia Yisọs akenañña mme ñkpọ ami ke Sabad, mbọọñ mme Yuu emaetọọñọ adikọbọ anye.

¹⁷Ke adifak idem Yisọs abo ammọ ate, “Ete mmi asʌk ananam utom afịd ini tutu mfịn ami, ndin ami ñko, nsʌk nnam utom.”

¹⁸Ado ñkpọ ntom akeneenekke anam nọ enekke eyem adiwot anye sia anye ikiyʌkkọke ke adibiad Sabad ikpọọñ, ado amaana akood Abasi Ete amọ, anam idem amọ ñka-ñka mme Abasi.

¹⁹Yisọs amaabọọrọ, “Ke ata akpanikọ ami ntañ inọ ndufo, Ayịn ikemeke inam ñkpọ ndomokeed ke idem amọ; anye akeme inam ukwueeñe se anye akịd nte Ete anam ndin ñkpọ keed ake adodo Ete anamma, Ayịn anam kpa ado.

²⁰Sia Ete ama Ayịn, anyʌñ awọd anye afịd ñkpọ se anye anam ke Idem amọ, ayaanyʌñ awọd anye kpa mme ñkpọ se ikpoon ikan mme mbon ami, mme utom e-ediikpa ndufo idem.

²¹Ke ntom, kpa naña Ete anam mme akpañkpa eset anyʌñ anọ ammọ uwem, kpa ntodo ke Ayịn anọ awo ake adodo anye amekke uwem.

²²Sia Ete ibiireke ikpe awo ndomokeed. Ado anye akappa afịd ubiire ikpe anọ Ayịn,

²³ma afịd awo ekpono Ayịn naña ammọ ekpono Ete. Awo ake adodo a-asịnne adikpono Ayịn asịn ñko adikpono Ete a-akendọññọ anye adi.

²⁴“Ke ata akpanikọ ami ntañ inọ ndufo, awo keed ake adodo a-akpaña utọñ anọ ikọ mmi anyʌñ anịm awo a-akendọññọ ke akpanikọ anie nsi-nsi uwem, awo idiinyʌññọ ibiom anye ikpe ado anye awuọ ke ñkpa adʌk uwem.

²⁵Ke ata akpanikọ ami ntañ inọ ndufo, ini asʌk adi, ke aditʌm ntañ adidi, a-mme akpaññañkpa ediikop uyo Ayịn Abasi ndin afịd awo e-ekoppo uyo ami eyaedu uwem.

²⁶Sia kpa naña Ete anie uwem ke idem amọ anye ñko anọ Ayịn ukeme adinie uwem ke idem amọ.

²⁷Ñko anye anọ Ayịn Awo adudu adibieere ikpe, sia anye ado Ayịn Awo.

²⁸“Ikiiyak ami ikpa ndufo idem, sia ini asʌk adi, ke ini mme akpaññañkpa ediikop uyo amọ,

²⁹ewuọ ke udi ammọ mbon e-ekenaññake nti ñkpọ eyaedaaña eda edu uwem, ndin mbon e-ekenaññake ndiọiñkpọ eyaedaaña eda ke ubiom ikpe.

³⁰Ami ñkemekke adinam ñkpọ ndomokeed ke idem mmi; ami mbiire ikpe ñkeene se ñkop ndin ubiire ikpe mmi ado unen, sia ami ñyemme adinem idem mmi esịd ado anye a-akendọññọ utom.

³¹“Adieke ñkpetieeghe ntiense mbaña idem mmi, ntiense mmi idooho akpanikọ.

³²Ado aba awo mfen atieeghe ntiense ambaña miin, ndin ami mmediọọñọ mbo ke ntiense amọ ado akpanikọ.

³³“Ndufo emenọ mme isʌñutom ebịne Yọọn ndin anye amaatie ntiense anọ akpanikọ.

³⁴Idooho nte ke ami mmeyịmme ntiense awo, ado ntañ ami nọ ndufo ebọ adinyaaña.

³⁵Yọọn akedo utuenikañ a-akesakka anyʌñ anọ unwana ndin ndufo emek adikop inem ikañ anye akenọọhọ.

³⁶“Ado ntiense mmi akpon akan ake Yọọn. Sia kpa utom e-Ete annọọhọ abo nnam mma, a-adooho anye ke nsʌk nam, ado ntiense awọttọ ke Ete akendọñ.

³⁷Ñko, Ete a-akendọññọ atie ntiense annọ ke idem amọ. Akenaanam ndufo ikoppo uyo amọ, inyʌññọ ikịt naña anye aba,

³⁸mme ikọ amọ inyʌññọ idʌñ ke esịd ndufo, sia ndufo inịmme anye a-anye a-akendọññọ ke akpanikọ.

³⁹Ndufo etọọtʌm ekpeeb ikọ Abasi, sia ndufo ekere ebo ke iminie nsi-nsi uwem ito ammọ. Kpa mme ikọ Abasi ami etie ntiense embaña miin,

⁴⁰ado ndufo esịn adimbịne miin idibọ uwem!

⁴¹“Ami ñyemme itooro nto awo,

⁴²ado ami mmidiọọñọ ndufo. Ami mmediọọñọ ke inieeghe ima Abasi ke esịd ndufo.

⁴³Ami mmedi ke anyịñ Ete mmi, ado ndufo inyịmmeke miin; ado awo mfen akpedi ke anyịñ idem amọ, ndufo eyaenyịmme anye ado.

⁴⁴Ndufo ekeme die inịm ke akpanikọ ke ini ndufo edubọiyọke itooro eto keed aken, ado inamma ñkpọ adibọ itooro a-atooho ukwueeñe-ukwueeñe Abasi?

⁴⁵“Ado ikiikere ibo ke ñyaidot ndufo uyo ke iso Ete. Andidot ndufo uyo ado Moses awo a-ndufo edotto anyen.

⁴⁶Edieke ndufo ekenịmme Moses ke akpanikọ, ekpaennịm miin ñko ke akpanikọ sia anye amaawet ambaña miin.

⁴⁷Ado sia ndufo miinịmme se anye akewet ke akpanikọ, ekeme die adinịm se ami ntañ?”