Read Ibibio Contemporary Bible 2020 Yọọn 6 Bible Online

Yọọn 6 - Ibibio Contemporary Bible 2020 bible

Yọọn 6

¹Etək ini amaakeboiyo, Yisọs amaaboiyo aka akpa Kadidi edem uko, adooho akpa Taiberia,

²ndin ekandịk atu awo emaekeene anye sia ammọ emaekịt mme idiọọñọ ñkpọ a-anye akenamma adikọk mbon udọñọ.

³Ndin Yisọs amaadọọk abod aketie ye mbed amọ.

⁵Anye akedịppe anyen akịt ekandịk atu awo nte esʌk edi ebịne anye, anye amaabo Fidib, “Mmọ-ọ ke idiidep ndidia inọ ibon ami edia?”

⁶Anye akebịp ami adidomo anye nse, sia anye amaanenie ke akikere amọ se anye akeyem adinam.

⁷Fidib amaabọọrọ anye, “Akʌk afiọñ itiokeed ikpikanna idep uyo nọ akem awo keed-e-keed se asʌk ata inua keed.”

⁸Mbed amọ keed mfen, Andru, ayịneka Saimọn Bita, amaasio uyo abo,

⁹“Se etəkayịn mi mme ntək uyo akpakpa ition ye iyak iba. Ami adikem awo ifañ?”

¹⁰Yisọs amaabo ammọ ate, “Nam mme awo esuuk etie.” Mbid amaaba ke itie ado (ndin ideen e-ekewakka ñkpọ nte tọsịn ition emaeba do.)

¹¹Yisọs ndin aben uyo ition ami anọ ekọọm anyʌñ adeeme anọ mbio e-eketieeghe do. Ammọ eta naña ammọ ekeyem. Amaanyʌñ anam ukem ado ye iyak.

¹²Afịd ammọ emaekedia iyʌkkọ, anye amaabo mbed amọ, “Ikoono se iyọk isʌghọ. Ikiibaha ñkpọ ndomokeed.”

¹³Ammọ emaekoono se ikiyọk isʌghọ ito uyo ition a-mme awo eketaaha ayọọhọ akpasa duop mme iba.

¹⁴Mme awo emaekekịt mme idiọọñọ ñkpọntịbe a-Yisọs akenamma, ammọ etọọñọ adibo, “Ke akpanikọ awo ami ado Brọfed adidi ke ederimbod ami.”

¹⁵Ke adidiọọñọ mbo ke ammọ ekeyem adidinam anye adidem anye amama ye mmiimaaha, anye amaafeghe atịmme aka mme abod akeba do ke idem amọ ikpọọñ.

¹⁶Akekem ndubi, mbed amọ emaediad eka ibiok,

¹⁷a-ammọ ekekedʌkkọ ubom eboiyo ibiok ado ekaiya Kapanọm. Ayo adikịm, Yisọs ikidibịneke ammọ dion.

¹⁸Ekamba ayobio akesʌk afịme ndin mmọọñ atọọñọ adubəkko.

¹⁹Ammọ emaekewat ubom ke ñkpọ nte itiad ita me inaañ, ammọ emaekịt nte Yisọs asaña ke anyọñ mmọọñ abịne ubom; ndin idem amaanyeñ ammọ ata eti-eti.

²⁰Ado anye abo ammọ, “Ami ke ado, ikiinyek idem.”

²¹Ndin ammọ enyịmme adiben anye nsịn ke ubom, kpa ke idahado ubom amaasịm mbeghe ammọ ekekaaha.

²²Ke edem usen mme atu awo e-eketieeghe ke edem ibiok uko emaedidiọọñọ ebo ke ubom keed akeba do, ndin ke Yisọs ididʌkkọ ubom ye mme mbed amọ, ado ke ammọ emaedakka sʌk ammọ-ammọ.

²³Ndin usʌk ubom e-eketooho Taiberia emaekebeghe ekpere itie a-mme awo eketaaha uyo ke Abọọñ amaakenọ ekọọm.

²⁴Ke ini mme awo ediọọñọke ebo ke Yisọs ikibaaha do, mbed amọ ñko ikinyʌññọ iba do, ammọ emaedọñọ ubom edaaña Kapanọm adikiyem Yisọs.

²⁵Ke ini ammọ emaekekịt anye ke edem ibiok uko, ammọ ebịp anye, “Andikpeeb, afo akediwuọ umi idaha ake-e?”

²⁶Yisọs amaabọọrọ ammọ: “Ke ata akpanikọ ami ntañ inọ ndufo, ndufo enyem miin, idooho ke ntak a-ndufo ekịtte mme idiọọñọ, ado sia emaeta uyo enyʌñ ekop uyʌkkọ.

²⁷Ndufo ikiinam utom inọ ndidia adooho ayaabiara, ado inam inọ ndidia a-adiidat ikisịm nsi-nsi uwem, a-Ayịn Awo adinọ ndufo ke idem amọ. Sia Abasi Ete ke idem amọ awuuk idiọọñọ ke imọ imimek anye.”

²⁸Ndin ammọ emaebịp anye, “Nso-o ke ana ñnyịn inam nọ inam utom Abasi ayemme?”

²⁹Yisọs amaabo ammọ, “Utom Abasi ado ami: adinịm anye a-anye adọññọ ke akpanikọ.”

³⁰Ñko ammọ emaebịp anye ebo, “Nso-o utịbe ñkpọ idiọọñọ ndin ke afo uduunọ ñnyịn nọ ñnyịn ikịt inyʌñ unịm fiin ke akpanikọ? Nso-o ke afo uduunam?

³¹Mme eteete ñnyịn emaeta mana ke akpautatan, naña ekewet ete: ‘Anye amaanọ ammọ uyo a-atooho abio ubọọñ Abasi eta.’ ”

³²Yisọs amaabo ammọ ate, “Ke ata akpanikọ ami ntañ inọ ndufo, idooho Moses inọọ ndufo uyo atooho abio ubọọñ Abasi, ado Ete Mmi anọ ata uyo atooho abio ubọọñ Abasi.

³³Sia uyo ake Abasi ado uyo a-atooho abio ubọọñ Abasi adi anyʌñ anọ ederimbod uwem.”

³⁴Ammọ emaebo “Ete, sie inọ ñnyịn uyo ami afịd ini.”

³⁵Yisọs amaabọọrọ, “Ami ndo uyo uwem, abiọñ idiidọññọ awo ndomokeed a-adieeghe ambịne miin; awo anyʌññọ annịm miin ke akpanikọ idiikoppo nsaditọñ tutu amama

³⁶Ado nte mmaakidọkkọ ndufo, ndufo emeñkịt miin ado isʌkkọ inịm ke akpanikọ.

³⁷Afịd awo se Ete annọ miin eyaedi embịne, ndin ami ndiibịneke awo ake adodo a-adieeghe ambịne miin.

³⁸Sia ami mmeto abio ubọọñ Abasi ndi adinam uduak a-Abasi akendọññọ, idooho adinam uduak idem mmi.

³⁹Ndin uduak se anye akendọñ miin ado, ke ami ñyaak awo ndomokeed ke atu ammọ a-anye akennọọhọ asop, ado ami nnam ammọ eset ke akpatre usen.

⁴⁰Sia uduak Ete mmi ado ke awo akeadodo a-akịtte Ayịn amọ anyʌñ anịm anye ke akpanikọ ana anie nsi-nsi uwem, ñko ke ana ami nnam awo ado aset ke akpatre usen.”

⁴¹Idahado mme Yuu etọọñọ edukuunọ ebaña anye sia anye amaabo, “Ami ndo uyo a-aketooho abio ubọọñ Abasi adi.”

⁴²Ammọ emaebo, “Idoho Yisọs ayịn Yosef, a-ñnyịn idiọọñọke ete ye eka amọ ado ami? Die ke anye akeme adibọ idahami, ‘Ami ñketo abio ubọọñ Abasi ndi?’ ”

⁴³Yisọs, ke ibọọrọ amaabo ammọ, “Itre ndukuunọ ke atu idem ndufo.

⁴⁴Awo ndomokeed ikemeke adimbịne miin ibọhọke Ete a-akendọññọ miin akoot anye, ñko ami ñyaanam awo ado aset ke akpatre usen.

⁴⁵Nte ewette ke ñwed mme Brọfed: ‘Abasi adikpeeb afịd ammọ.’ Afịd awo se ibọ ukpeebñkpọ ito Ete, eyaedi embịne miin.

⁴⁶Kpaanaanam awo ndomokeed ikịtte Ete ibọhọke anye a-atooho Abasi; anye ikpọọñ akịd Ete.

⁴⁷Ke ata akpanikọ ami ntañ inọ ndufo, awo a-anịmme ke akpanikọ anie nsi-nsi uwem.

⁴⁸Ami ndo uyo uwem.

⁴⁹Mme eteete ndufo emaeta mana ke akpautatan ado ekesʌk ekpakpañña.

⁵⁰Ado anye ami ado uyo a-atooho ke abio ubọọñ Abasi asọiyọ adi adooho awo ake adodo akeme adita ndin ikpaaha aba.

⁵¹Ami ndo uyo uwem aketooho abio ubọọñ Abasi asọiyọ adi. Awo ake adodo a-ataaha uyo ami ayaadu uwem ke nsi-nsi. Uyo ami ado ikpọkidem mmi, a-ami ndiinọ ke ubiọñ uwem ederimbod.”

⁵²Ndin mme Yuu etọọñọ adifaaña mbiak-mbiak ke atu ammọ ete, “Die ke awo ami akeme adinọ ñnyịn ikpọkidem amọ nọ idia?”

⁵³Yisọs abọọrọ ammọ: “Ke ata akpanikọ ami ntañ inọ ndufo, adieke ndufo mmiitaaha ikpọkidem Ayịn Awo inyʌñ inwọñ iyiib amọ, ndufo idiinieeghe uwem ke idem ndufo.

⁵⁴Awo ake adodo a-ataaha ikpọkidem mmi anyʌñ anwọñ iyiib mmi anie uwem nsi-nsi, ndin ami ñyaanam awo ado aset ke ñkpa ke akpatre usen.

⁵⁵Sia ikpọkidem mmi ado ata ndidia, iyiib mmi anyʌñ ado ata adinwọñ ñkpọ.

⁵⁶Awo ake adodo a-ataaha ikpọkidem mmi anyʌñ inwọñ iyiib mmi aba mme ami, ami ñko ñnyʌñ mba mme anye.

⁵⁷Nte ndu-ndu Ete akendọññọ ndin ami ñnyʌñ mbọ uwem nto Ete, ntodo ñko ke awo ake adodo a-ntaaha miin adidu uwem ke ntak mmi.

⁵⁸Anye ami ado uyo aketooho abio ubọọñ Abasi adi. Mme eteete ndufo emaeta mana enyʌñ ekpañña, ado awo a-ataaha uyo anye ami adidu uwem ke nsi-nsi.”

⁵⁹Yisọs aketañ mme ikọ ami ke idaha a-anye akpeebe ñkpọ ke sinakọk ke Kapanọm.

⁶⁰Ke emaekekop mme ikọ ami ema, uwak mme mbed se ikikeene anye emaebo, “Ikọ anye ami ado se awo mmiikanna iyọ. Die ke awo ndomokeed adinyịmme utọ ikọ ami?”

⁶¹Yisọs amaadiọọñọ ke mme mbed amọ esʌk edukuunọ, anye abịp ammọ, “Nte ikọ ami iyat ndufo esịd?

⁶²Nso-o ke ekpenam adieke ndufo ekpekịtte Ayịn Awo nte adọọk aka itie a-anye akebaaha akpa!

⁶³Sịbidịd anọ uwem, abʌkidem idooho ñkpọ ndomokeed. Mme ikọ a-ntañña inọ ndufo eyọhọ ye Sịbidịd, eyọhọ ye uwem ñko.

⁶⁴Ado aba mme awo ke atu ndufo e-mmiinịmme.” Sia Yisọs amaakediọọñọ tọọñọ ke aditọọñọ awo ke atu ammọ a-mmiinịmme kpa anye adinyʌñ itap anye.

⁶⁵Anye amaaka iso atañ, “Ntak ado ke ñkibo ndufo ke awo ndomokeed ikemeke adidi imbịne ibọhọke Ete anọ anye ukeme.”

⁶⁶Ke ami amaakeboiyo, uwak mme mbed amọ emaedaaña enyọñọ, ikeeneke anye aba.

⁶⁷Ndin Yisọs abo mme mbed duob ye iba ate, “Ndufo-o? Nte ndufo emeyem adiinyọñ ñko?”

⁶⁸Saimọn Bita abọọrọ, “Abọọñ, anie ke ñnyịn idiibịne? Afo anie etob uwem nsi-nsi.

⁶⁹Ñnyịn imidinịm ke akpanikọ inyʌñ ididiọọñọ ke afo ado Adisana Awo a-atooho Abasi.”

⁷⁰Yisọs abọọrọ ammọ ate, “Nte ñkimekke ndufo duop mme iba? Ado keed ke atu ndufo ado setan.”

⁷¹(Anye aketañ abaña Yudas, ayịn Saimọn, Iskariọd, sia akpọsʌk ado anye akedooho keed ke atu mme mbed duob ye iba, a-adiitap anye inọ ke ini iso.)