Read Ibibio Contemporary Bible 2020 Yọọn 8 Bible Online

Yọọn 8 - Ibibio Contemporary Bible 2020 bible

Yọọn 8

²Ke ata ubakusen, anye amaatịmme aka afe tembịd, a-mme afịd awo ekekekannake anye ekʌk, ndin anye amaasuuk atie anyʌñ atọọñọ adikpeep ammọ ñkpọ.

³Mme andikpeeb ibed ye mme Farisi emaeben awonwaan keed edi e-ekemʌmmọ naña asịn efịbe. Ammọ emaenam anye adada ke iso ammọ,

⁴enyʌñ ebo Yisọs, “Andikpeeb, ekemʌm awonwaan ami naña asịn efịbe.

⁵Ke ñwed Ibed, Moses abo yak ñnyịn itọọñ utọ ibaan ado ke itiad. Ntoro afo abo die?”

⁶Ammọ ekebịp ami adidomo anye nse me ayaaba se ammọ ediidat idot anye uyo. Ado Yisọs amaanʌhọ anyʌñ akama nnuun amọ atọọñọ adiwet ñkpọ ke isọñ.

⁷Ke ammọ adisʌk nyiire ntọọñ anye mbịme ami, anye amaanekke ada anyʌñ abo, “Yak keed ke atu ndufo akenam mmiinamma idiọọk ñkpọ ato aben itiad atọ awonwaan ami.”

⁸Akema anye amaana anʌhọ akaiso awet ñkpọ ke isọñ.

⁹Ke ini ammọ ekoppo ami ammọ edaaña keed-e-keed, tọọñọ ke ñkpoon awo tutu asịm ata akpatre, ndin Yisọs ikpọọñ mme awonwaan ami edisʌhọ, anye anyʌñ asʌk ada ke nte akeda.

¹⁰Ndin Yisọs amaana adakka adada anyʌñ abo, “Awonwaan, ammọ-ọ? Ibaaha awo ndomokeed se ubiom fiin ikpe?”

¹¹Anye amaabọọrọ ate, “awo ibaaha Ete.” Yisọs abo anye, “Ami ñko ubiommo fiin ikpe. Nyọñ idahami, nyʌñ kpọñ uwem idiọọkñkpọ mfo.”

¹²Ke ini Yisọs akemaanake atañ ikọ anọ mme awo, anye amaabo: “Ami ndo unwana ederimbod. Awo akeedodo a-ñkeeneke miin idiisañake ke akịm, ado ayaanie unwana ke uwem amọ.”

¹³Mme Farisi ekekop ami, ammọ emaebo anye, “Afo atie ntiense idem mfo, ikọ ntiense mfo ado isọọñọke ida.”

¹⁴Yisọs amaabọọrọ ammọ, “Ñkpekọm ami ñkpetie ntiense nnọ idem mmi, ikọ ntiense mmi ado akpanikọ, sia ami mmediọọñọ nte ami ñketo ndi ye nte ami ñka. Ado ndufo inieehe ifiọk ibaña nte ami nto ndi mme nte ami ñka.

¹⁵Ndufo ebiire ikpe enọ awo akeene ifiọk abʌkidem;

¹⁶ami mbiommo awo ndomokeed ikpe. Ado adieke mbiireke ikpe, ubiireikpe mmi ado akpanikọ, sia ami ndaaha ikpọọñ mbiire. Ami nda ye Ete, andikindọñ miin.

¹⁷Ñko ewet ke Ibed ndufo ebo ke ikọ ntiense awo iba ado akpanikọ.

¹⁸Ami nnọ ntiense mbaña idem mmi, ado Ete a-akendọññọ miin anọ ikọ ntiense ambaña miin ñko.”

¹⁹Ndin ammọ emaebịp anye ate, “Ete mfo aba ke uke?” Yisọs amaabọọrọ, “Ndufo indiọọñọke miin, inyʌññọ idiọọñọ Ete mmi, adieke ekpekendiọọñọke miin, ekpaekediọọñọ Ete mmi ñko.”

²⁰Yisọs aketañ ikọ ami ke ini anye akekpeebe ñkpọ ke mme afe tembịd ke mkpere itie unịm akʌk. Ado awo ndomokeed ikimʌmmọ anye, sia ini amọ ikikemme dion.

²¹Anye amaamaana abo ammọ: “Ami ñyaanyọñ, ndufo eyaenyem miin, ndin ndufo eyaenyʌñ ekpañña ke idiọọkñkpọ ndufo. Itie nte ami ñka ndufo idikanna idi.”

²²Ndin mme Yuu emaedubiime ke idem ammọ ete, “Nte anye abikiwot idem amọ nọ anye abo, ‘Itie nte ami ñka, ndufo idiikanna idi?’ ”

²³Yisọs amaaka iso atañ: “Ndufo eto ke isọñ, ami nto ke anyọñ. Ndufo edoñño ake ederimbod ami, ami ndooho ake ederimbod emi.

²⁴Ami mmidọdọkkọ ndufo, eyaekpañña ke idiọọkñkpọ ndufo; ih, adieke ndufo mmiinịmme ke akpanikọ ke ami ndo anye, ndufo eyaekpañña ke idiọọkñkpọ ndufo.”

²⁵Do ndin ammọ emaebịp anye ete, “Afo ado anie?” Yisọs amaabọọrọ ammọ ate: “Se ami ñkese idọdọkkọ ndufo toto ke aditọọñọ.

²⁶Ami mmenie umiañ ñkpọ aditañ ke adibiire ikpe ibaña ndufo. Ado anye a-akendọññọ miin ndi ado anam akpanikọ, ndin se ami ñkop nto anye ado se ami ntañ nnọ ederimbod.”

²⁷Ikinwañake ammọ ke anye akidọkkọ mmimọ abaña Abasi, Ete amọ.

²⁸Do ndin Yisọs amaabo: “Ke ini ndufo emaebenne Ayịn Awo ke enyọñ, ndufo eyaediọọñọ ke ami ndo awo ado, ñko ke ami nnamma ñkpọ nte keed ke adudu idem mmi, ado ntañ sʌk se Ete akeñkpeeb miin.

²⁹Anye a-akendọññọ ndi mmọdo ye ami, anye inyʌññọ insaana miin iyaak ikpọọñ, sia afịd ini ami nsie nam se inem anye esịd.”

³⁰Daña anye asʌkkọ atañ ami, uwak awo emaedinịm anye ke akpanikọ.

³¹Yisọs amaabo mme Yuu e-ekenịmme anye ke akpanikọ ate: “Adieke ikọ mmi idʌññọ ndufo ke idem, ke akpanikọ ndufo edo mbed mmi.

³²Ndufo eyaediọọñọ akpanikọ, ndin akpanikọ ayaanam ndufo ebọkkọ ufʌn.”

³³Ammọ emaebọọrọ anye ete, “Ñnyịn ito ubon Ebraham ñko tọọñọ akenanam ñnyịn idoññoke ifʌn inọ awo ndomokeed, awuọọñọ die afo edibo, eyaenam ndufo ebọkkọ ufʌn?”

³⁴Yisọs amaabọọrọ: “Ke ata akpanikọ ami ntañ inọ ndufo, awo ake adodo a-anamma idiọọkñkpọ adʌk afʌn anọ idiọọkñkpọ.

³⁵Ndin ifʌn inieeghe akpan itie ke ubon, ado ayịn anie itie ke ubon ke nsi-nsi.

³⁶Ndin edieeke Ayịn anamma yak ndufo ebọkkọ, ndufo eyaebọkkọ ke akpanikọ.

³⁷Ami mmediọọñọ ke ndufo eto ubon Ebraham ado ndufo eyem ediñwot miin sia ikọ mmi inieeghe itie ke idem ndufo.

³⁸Se ami idọkkọ ndufo ado se ami ñkịt ke ini mbaaha ke iso Ete mmi, ndufo ñko enyʌñ enam se ndufo ekekpeeb eto ete ndufo.”

³⁹Mme Yuu emaebọọrọ, “Ebraham ado Ete ñnyịn.” Yisọs amaabọọrọ ammọ, “Adieke ndufo ekpedooho nditọ Ebraham, ndin ndufo ekpaenam se Ebraham akenañña.

⁴⁰Daña aba ado, ndufo eyem usʌñ adiñwot miin, awo i-idọọkọke ndufo akpanikọ ukem naña ñkekop nto Abasi. Ami idooho se Ebraham akenam.

⁴¹Ndufo enam ubọkutom ete ndufo.” Ammọ emaebọọrọ, “Ñnyịn idooho nte nditọ akpara. Ukweeñe Ete se ñnyịn inie ado Abasi ke idem amọ.”

⁴²Yisọs amaabọọrọ, “Adieke Abasi akpedooho Ete ndufo, ndufo ekpaemma miin, sia ami nto Abasi ndi. Ami ñkedieeghe ke uduak idem mmi, ado anye akennọ ndi.

⁴³Ntak se ami ntañ miiñwañake ndufo-o? Sia ndufo ikanna adikpañ utọñ inọ-ọ se ami ntañ.

⁴⁴Ndufo eto ete ndufo, a-adooho setan, ñko ndufo eyem adinam uduak ete ndufo. Anye akedo awodawo tọọñọ ke editọọñọ, akenam anye itañña akpanikọ, sia mbeñe akpanikọ keed ibaaha anye ke idem. Anye amaasʌhọ nsu, anye ado asaña akekem ke ata uduod amọ, sia anye ado asʌhọ nsu, ado ete akpaimọ nsu.

⁴⁵Ado sia ami mmetañ akpanikọ, ndufo innịmme miin ke akpanikọ!

⁴⁶Anie ke atu ndufo keed akeme itañ ke imimmʌm miin ke idiọọkñkpọ ndomokeed? Adieke ami ntañña akpanikọ, nso ido ke ndufo enịm se ami ntañ?

⁴⁷Awo ake adodo a-atooho Abasi akop se Abasi atañ. Ntaha ndufo mmiikamma ikop se ntañ ado ke ndufo idooho ake Abasi.”

⁴⁸Mme Yuu emaebọọrọ anye ete, “Nte ñnyịn inenne adibo ke afo ado awo Samaria ye awo a-dimọn asọppọ?”

⁴⁹Yisọs anyʌñ abọọrọ ammọ ate, “Dimọn insọppọ miin, ami ñkpono Ete mmi ado ndufo iñkponoke miin.

⁵⁰Ami ñyemme itooro nnọ idem mmi, ado Abasi ayem itooro, ñko anye ado abiireikpe.

⁵¹Ke ata akpanikọ ke ami ntañ inọ ndufo, awo ake adodo a-anịmme ikọ mmi, idikịtte ñkpa.”

⁵²Mme Yuu emaetañ ke akpọsọñ uyo ete, “Idahado ndin ñnyịn imidiọọñọ ke ñkpọ usọp. Ebraham amaakpa, mme brọfed emaekpañña ñko, ado afo abo, awo ake adodo a-anịmme ikọ mmi idiikpaaha.

⁵³Nte afo amekpon akan ete ñnyịn Ebraham? Anye amaakpa, ukem nte mme brọfed ekekpaññake. Afo akere ke imọ ido anie?”

⁵⁴Yisọs amaabọọrọ, “Adieke ñkpeyemme ubọọñ idem mmi, ado ikpiwuọọñọke ñkpọ nte keed. Ke aditịm ntañ, Ete mmi, andufo ekọmmọ ke ado Abasi ndufo, ado andinnọ-ọ miin ubọọñ.

⁵⁵Akpesʌk ado nte ndufo miidiọọñọke anye, ami mmediọọñọ anye. Adieke ñkpebooho ke ami ndiọọñọke anye, ami ñkpedo asʌhọ nsu nte ndufo, ado ami mmediọọñọ anye nnyʌñ nnam ikọ amọ.

⁵⁶Ete ndufo Ebraham amaadaara ke adikere ke imọ iyaikịt usen mmi, anye amaakịt anyʌñ anem esịd.”

⁵⁷Mme Yuu emaebo anye, “Afo uyọhọke isua aba ye duob dion ado afo abo ke imaikịt Ebraham.”

⁵⁸Yisọs abọọrọ ammọ ate, “Ke ata akpanikọ ami ntañ inọ ndufo, mbemiso Ebraham adimana, ami mmebaba.”

⁵⁹Ke adikop ami, ammọ emaekoono itiad eyem aditọọñ anye, ado Yisọs amaadịbe anyʌñ akpọñ efaak tembịd.