Read Ibibio Contemporary Bible 2020 Yọọn 9 Bible Online

Yọọn 9 - Ibibio Contemporary Bible 2020 bible

Yọọn 9

¹Nte anye akesʌkkọ asaña aka, anye amaakịt awo keed a-akedọñọke nnan tọọñọ ke emana.

²Mme mbed amọ emaebịp anye ete, “Andikpeeb, anie ikinam idiọọkñkpọ, awo ami me ete ye eka amọ, nọ anye adimana nnan?”

³Yisọs amaabọọrọ ate, “Idooho anye, inyʌññọ ido ete mme eka amọ ekenam idiọọkñkpọ; anye akemana nnan nọ ato do utom Abasi ayaara ke idem amọ.

⁴Adaña nte usen akaaha iso, ana ñnyịn inam utom andikindọñ miin. Akoneyo asʌk adi, a-awo ndomokeed mmiidiikanna inam utom.

⁵Ke adaña ini ami mbaaha ke ederimbod, ami ndo unwana ederimbod.”

⁶Ke anye amaaketañ ami ima, anye amaafiad etap ke isọñ, aben awaak mme ntan ado akappa mbad, aben mbad ado afiọññọ awo nnan ado ke anyen.

⁷Ndin anye abo anye, “Kaa ke yie idem ke Ñkpọdiọhọmmọọñ Sidọam” (anyịñ ado awuọ, “Edọdọñ”). Anye amaadakka aka akeyie, anyʌñ akịt usʌñ atịmme anyọñ ufọk amọ.

⁸Mme mbọhọidʌñ amọ mme mbon mfen e-ekekịtte anye nte abeeñe-ebeeñe emaebo ete, “Idooho awo a-akesitieeghe abeeñe-ebeeñe ado ami?”

⁹Ubaak ammọ ete, “Ih, kpa anye ke ado.” Mbon mfen ete, “Iyo-o, anyʌñ abebit anye.” Ado awo ado ke idem amọ amaasọọñọ ate, “Ih, ami ke ado.”

¹⁰Ammọ ebo anye ete, “Anyen mfo akenam die atara ndin?”

¹¹Anye abọọrọ ate, “Ete a-akereke Yisọs do akenam mbad, adọppọ anyeed ke anyen. Anye amaambo yak ñka ñkeyie idem ke Sidọam. Ndin ami mmaaka, mmaakeyie mma, anyen amantara, ami mmọọnọ usʌñ.”

¹²Ammọ ebịp anye, “Anye awo ado-o?” Anye abọọrọ, “Ndiọọñọke.”

¹³Ammọ emaeben ete a-akedọñọke nnan do ebịne mme Farisi.

¹⁴Akedo ke usen Sabad ke Yisọs akenam mbad ado atat nnan ado anyen.

¹⁵Ke ntodo mme Farisi emaebịp anye naña anye akenam akịt usʌñ. Anye ate, “Anye akedọppọ mbad añyeed ke anyen, akema ami ñkeyie nsio, idahami mmekịt usʌñ.”

¹⁶Ubaak mme Farisi ete, “Awo ami itooho Abasi, sia anye inịmme ibed Sabad.” Ado mbon mfen emaebo, “Die ke anam idiọọkñkpọ akeme adinañña mme utọ idiọọñọ ami?” Ndin ubakka amaaba ke ufọọd ammọ.

¹⁷Ammọ ndin emaana ese awo nnan ado ete, “Nso-o ke afo ke idem mfo anie aditañ mbaña anye? Anyen mfo ke anye aketat.” Awo ado amaabọọrọ ate, “Anye ado brọfed.”

¹⁸Kpa ye ado, mme Yuu ikinịmme ibo ke awo ado akedo nnan tutu ekedọñ ekekood ete ye eka amọ.

¹⁹Ndin ebịp ammọ, “Nte awo ami ado ata ayịn ndufo ebooho ke akemana nnan? Anye anam die akịd usʌñ idahami?”

²⁰Ete ye eka amọ emaebọọrọ, “Ñnyịn imidiọọñọ ke anye ado ayịn ñnyịn, iminyʌñ idiọọñọ ke anye akemana nnan.

²¹Ado naña anye anam akịd usʌñ, me awo a-aketatta anye anyen, ñnyịn idiọọñọke. Ibịp anye. Anye akpon akem: anye ayaatañ ikọ idem amọ.”

²²Ete ye eka amọ eketañ ntom sia ammọ emaebaak ikpọawo mme Yuu, e-emaekebiire adibịn awo ndomokeed a-abooho ke Yisọs ado Mesaya nsio ke itie sinakọk.

²³Ntak ado akenam ete ye eka amọ ebo, “Anye akpon akem; Ibịp anye.”

²⁴Anam mme Yuu emaemaana edọñ ekekood ete a-akedooho nnan enyʌñ ebo anye ete, “Nọ Abasi itooro ke aditañ akpanikọ. Ñnyịn imidiọọñọ ibo ke awo ami ado anam idiọọkñkpọ.”

²⁵Awo ado amaabọọrọ ate, “Me anye ado anam idiọọkñkpọ, miidooho, ami ndiọọñọke. Ukweeñe se ami ndiọọñọ ado ke ñkedo nnan ado idahami mmekịt usʌñ.”

²⁶Ammọ emaana ebịp anye ete, “Nso-o ke anye akunam fiin? Anye akenam die utat fiin anyen?”

²⁷Anye abọọrọ, “Ami mmidọdọkkọ ndufo, ado ndufo ikikpañña utọñ. Ntaha a-ndufo eyemme adikop akañ mfen-e? Ndufo ke idem ndufo eyem idikappa ido mme mbed amọ ñko?”

²⁸Ammọ ndin emaesueeñ anye, ete “Afo ado mbed amọ, ñnyịn ido mme mbed Moses!

²⁹Ñnyịn imidiọọñọ ke Abasi amaatañ ikọ anọ Moses, ado amaado awo ami, ñnyịn idiọọñọke kpak nte anye ato.”

³⁰Awo ado abọọrọ ate, “Ata ñkpọ ñkpaidem adodo! Ndufo idiọọñọke nte anye ato, ado anye antat miin anyen!

³¹Ñnyịn imidiọọñọ ke Abasi isikpañña utọñ inọ mme anam idiọọkñkpọ. Abasi akpañ utọñ anọ mbon etʌmmọ ekpono anye enyʌñ enam uduak amọ.

³²Tọọñọ ederimbod aketọọñọ awo ikoppo nte ebo ke awo atat awo a-akemanake nnan anyen.

³³Akpedo awo ami ikitooho Abasi, anye ikpikanna inam ñkpọ ndomokeed.”

³⁴Ammọ ekekop ami, emaebo anye ete, “Afo ayem adikpeeb ñnyịn, afo a-adooho a-anyeenyịne ke idiọọkñkpọ tọọñọ ke emana!” Ndin ammọ emaebịne anye esio.

³⁵Yisọs amaakop ke ammọ emaebịne anye esio, ndin ke ini anye amaakedikịt anye, Yisọs abo anye ate, “Afo amenịm Ayịn Awo ke akpanikọ?”

³⁶Awo ado abịp, “Ete, ndọkkọ mme anye ado anie awo, ma nnịm anye ke akpanikọ.”

³⁷Yisọs ate, “Afo amekịt anye idahami; ke akpanikọ, anye ado anditañ ikọ ye afo.”

³⁸Awo ado ate, “Abọọñ, mmenịm,” anyʌñ akpono anye.

³⁹Yisọs ate: “Ado ke ntak ukpe ikpe ke ami ndi ederimbod ami, nọ atoodo mbon e-mmiikịtte ñkpọ ekịt ñkpọ, mbon e-ekịtte ñkpọ eforo nnan.”

⁴⁰Ke adikop ñkpọ ami, ubaak mme Farisi e-ekebaaha do ebo anye, “Kọm abo die! Awuọ ñnyịn ñko idoñño nnan?”

⁴¹Yisọs abo amọ: “Akpedo ekedo nnan, ikpe ikpitịppe ndufo; ado sia ndufo ebooho ke ndufo, ‘emekịt ñkpọ,’ ikpe itịp ndufo.”