Read Ibibio Contemporary Bible 2020 Utom 11 Bible Online

Utom 11 - Ibibio Contemporary Bible 2020 bible

Utom 11

¹Mme abọsịd ye mbon e-enịmme Abasi ke akpanikọ ke afịd Yudia emaekop ete ke mme Yentaid ñko emaebọ ikọ Abasi.

²Ndin idaha Bita akaaha Yerusedem, mme mbon e-enịmme ke akpanikọ, e-emaekena mboppo emaesua enọ anye ebo ete,

³“Afo akedʌk ufọk mbon e-emmiinaaha mboppo anyʌñ adia ñkpọ ye ammọ.”

⁴Bita amaatañ afịd ñkpọ anọ ammọ naña aketọọñọ atịppe,

⁵“Ñkeba ke abio Yopa mbọñ akam, ndin ñkịt ñkukịd. Mmaakịt ñkpọ nte ekamba afọñ e-ekemʌmmọ ke inuuk amọ inaañ nte esuuk eto anyọñ akpere nte ñkeba.

⁶Mmaase ñnyʌñ ñkịt mme unam se inie ukod inaañ-inaañ e-ebaññake ke iso isọñ, mme unam ikọt, se inyọnyọọn, ñkọrọ mme inuen.

⁷Ndin mmaakop uyo nte ambo miin ate, ‘Dakka da, Bita. Wot nyʌñ ta.’

⁸“Ami mmaabọọrọ, ‘Idooho ntodo Abọọñ! Ñkpọ a-ammiisanake me se mmiifọnnọ ima akenanam idʌkkọ inua mmi.’

⁹“Uyo amaato ke anyọñ abo ayọhọ ñkemba ate, ‘Kuukood ñkpọ ndomokeed a-Abasi amaakenam asana ndek.’

¹⁰Ñkpọ ami aketịppe akañ ita mbemiso emaana edʌt afọñ ami edọọk anyọñ.

¹¹“Ke idaha-idaha ado ideen ita e-ekedọññọ ennọ miin, emaeto ke Siseria ediwuọ ke ufọk a-ñkebaaha.

¹²Sịbidịd Abasi amambo miin ate ke mbiad ini adikeene ammọ. Nditọete itiokeed ami emaesaña ye ami, ndin ñnyịn imaikidʌk ufọk Kọnediọs.

¹³Anye amandọkkọ naña imọ ikikịt enyere Abasi ke ufọk imọ akibooho imọ ate, ‘Dọñ eka Yopa ekekood Saimọn a-akereke Bita.

¹⁴Anye ayaadat etob a-aduunyaaña fiin ye afịd ufọk mfo usọk.’

¹⁵“Ñkesʌk ntọtọọñọ aditañ ikọ, Adisana Sịbidịd amaadoro ammọ ke idem naña akidoro ñnyịn ke aditọọñọ.

¹⁶Ndin mmaatoiyo se Abọọñ aketañ abo: ‘Yọọn akedat mmọọñ anịm uduọkmmọọñ, ado ediidat Adisana Sịbidịd inịm ndufo uduọkmmọọñ.’

¹⁷Adieke Abasi akenọọhọ ammọ ukem enọ anye akinọọhọ ñnyịn i-ikinịmme Abọọñ Yisọs Krais ke akpanikọ, ami ñkedo anie awo adikere ke mmekeme iniin uyo Abasi?”

¹⁸Ammọ emaekekop ami, ikinieehe mfaaña aba, ado emaetooro Abasi ebo ete, “Awuọ Abasi afeen ndudue anọ mme Yentaid nọ ammọ enie uwem.”

¹⁹Idahado mbon e-emaekesuana ato ke ukọbọ a-akebaaha ke ini ekewotto Stifịn, emaeka ekewuọọñọ Fonisia, Saiprọs ye Antiọk, enyʌñ esuan eti etob enọ mme Yuu ikpọọñ.

²⁰Ado usʌk ammọ, mme ideen e-eketooho Saiprọs ye Sirin emaeka Antiọk enyʌñ ekekwọrọ ikọ enọ mbon Krik ñko, ekwọrọ eti etob ebaña Abọọñ Yisọs enọ ammọ.

²¹Adudu Abasi amaaba ye ammọ, ado anam uwak mme awo emaenịm ke akpanikọ enyʌñ ekappa esịd ekeene Abọọñ Abasi.

²²Etob ami amaasịm mbon ufọkabasi ke Yerusedem, ndin ammọ emaenyʌñ edọñ Banabas aka Antiọk.

²³Anye amaakediwuọ anyʌñ akịt idiọọñọ se mfọn Abasi akenañña, anye amaanem esịd anyʌñatañ ikọ nsọọñukod anọ afịd ammọ ate emʌm mbuọdidem ammọ ke Abọọñ ekama ke afịd esịd.

²⁴Banabas akedo eti awo, ayọhọ ye Adisana Sịbidịd ye mbuọdidem, ke ntak ami uwak awo emaekeene Abọọñ.

²⁵Banabas amaadika Tasọs akeyem Sọọd,

²⁶ndin ke amaakekịt Sọọd, anye amaaben anye adi Antiọk. Banabas ye Sọọd emaeba do isuakeed ye mbon ufọkabasi enyʌñ ekpeeb eka uwak awo ñkpọ. Ke Antiọk ke eketo ekood mme mbed Abasi Kristian.

²⁷Ke ini ami, mme brọfed emaeto Yerusedem edi Antiọk.

²⁸Keed ke atu ammọ a-akekereke Akabọs amaadakka ada abak atañ ke Sịbidịd ate ke ataa ekandịk akañ ayaaba ke afịd abio Rum. (Ñkpọ ami akedat itie ke ini ukara Kradius.)

²⁹Mme mbed, ke ukeme ammọ keed-e-keed, emaebiire adinọ nditọeka ammọ ke Abọọñ, e-ekedʌññọ ke Yudia unwam.

³⁰Ammọ emaenam ami ke adinọ Banabas ye Sọọd enọ ammọ nọ eben esọk mme etubom ufọkabasi.