Read Ibibio Contemporary Bible 2020 Utom 12 Bible Online

Utom 12 - Ibibio Contemporary Bible 2020 bible

Utom 12

¹Akedo ke ñkpọ nte ini ntom ke Adidem Herọd akemuum usʌk mbon ufọkabasi nọ ato do anye atʌkkọ ammọ.

²Anye amaanam ewot Yemsi ayịneka awodeen Yọọn ke akañkañ.

³Anye amaakekịt ke ñkpọ ami amaanem mme Yuu esịd, anye amaamʌm Bita ñko. Ami aketịppe ke ini Usọrọ Basofa.

⁴Herọd amaakemʌm anye, amaasịn anye ke ñkpakọb, anyʌñ ayaak anye anọ mbon ekọñ duob ye itiokeed ate ekpeme. Herọd akeduak isio anye ke ini Usọrọ Basofa amaakeboiyo nọ ekpe ikpe amọ ke iso abio.

⁵Emaesịn Bita ke ñkpakọb, ado mbon ufọkabasi emaesịn idem ebọñ akam enọ Abasi ke iwuod amọ.

⁶Ke akonayo mbemiso usen Herọd akebooho iben anye idi ikpe, Bita akena ke ufọọd mbon ekọñ iba, ebọp anye ke ñkprọñ iba, mme ada usʌñ enyʌñ eda ke inuausʌñ.

⁷Idaha-idaha ado enyere Abọọñ amaabiọññọ, unwana anyʌñ ayama ke ubed ñkpakọb. Anye amaatuak Bita ke ñkañ, atọi anye ke idab abo, “Sọp dakka da!” Ndin ñkprọñ amaakọọmọ Bita ke ubọk aduọññọ ke isọñ.

⁸Enyere Abasi amaabo anye ate, “Sịne afọñ ye ikpaukod mfo.” Ndin Bita amaanam ntodo. Enyere Abasi amaamaana abo Bita, “Bọbọ mbọbọ afọñ mfo ke idem nyʌñ ñkeene miin.”

⁹Bita amaakeene anye awuọ ke ñkpakọb, ado anye ikidiọọñọke ibo ke se enyere Abasi akenam akedo se ikitịppe; akekere abo ke idaadappa.

¹⁰Ammọ emaeboiyo akpa ye udiana mbon ukpeme ñkpakọb, ekewuọ inuaatob ukwak, a-asañake akewuọ abio. Inuaatob ukwak ado amaabeere ke idem amọ ikpọọñ anọ ammọ, ndin ammọ emaeboiyo. Ke ammọ emaekesaña afịd anyan efaak keed, idaha-idaha ado enyere Abasi amaakpọñ anye.

¹¹Ke Bita amaakediọọñọ idem amọ ndin, anye abo ate, “Ke akpanikọ ñyịkke nte ke Abọọñ akedọñ enyere amọ adinsio miin ke ukad Herọd ye afịd se mme Yuu ekekere ke ayaatịppe.”

¹²Ke ami amaakenekke adinwaña Bita, anye amaaka ufọk Mmeri eka Yọọn, e-ekenyʌññọ ekood Maak, itie uwak awo ekebonoke enyʌñ ebọñ akam.

¹³Bita amaakọñ inuausʌñ udọk anwa esiin, ndin ayịnufọk awonwaan a-akekereke Roda amaadise inuausʌñ.

¹⁴Ke anye amaakediọọñọ uyo Bita, esịd amaanyʌñ anem anye eti-eti tutu anye amaatịmme edem afeghe aka esịd ufọk, afre ikʌkkọ usʌñ anyʌñ abọñ ñkpo ate: “Bita mmọ ke inuausʌñ ada!”

¹⁵Ammọ emaebo, “Iwuod mfo ifọnnọ!” Ado anye amaaka iso abo ke ntodo ke ado, ndin ammọ ebo ete, “Ana ado enyere amọ ke ado.”

¹⁶Bita amaaka iso akọñ, ndin ammọ emaekekʌkkọ usʌñ enyʌñ ekịt anye, idem amaakpa ammọ.

¹⁷Bita adịppe ubọk ate ammọ edop uyo ndin anye amaatañ naña Abọọñ akisio imọ ke ufọk ñkpakọb. Anye amaabo ammọ ate, “Itañ inọ Yemsi ye nditọete mfen ke Abasi ibaña ñkpọ ami.” Ndin anye akpọñ ammọ aka itie mfen.

¹⁸Ke ubakusen, ekandịk ntịme amaaba ke ufọọd mbon ekọñ ke se ikitịppe inọ Bita.

¹⁹Ke Herọd amaakenekke iyeem anye ado ikịtte, anye amaanekeaduuñọ mbon ukpeme abaña anye, anyʌñ anọ uyo ate ewot ammọ. Herọd amaato Yudia adika Siseria anyʌñ aba do ke etək ini.

²⁰Anye aketọọhọ ye mbon Taya ye Sidọn; ado idʌñ iba ami emaediana keed eyem adisoobo ye anye. Ke ammọ emaekebọ unwam ito Brastos, ayịnufọk a-adidem akemaaha, ammọ emaebo ke iyem inam emem, sia mmimọ inie idodanyen adinie ndidia nto abio adidem.

²¹Ke usen akedikem, Herọd amaasiine mme afọñ ubọọñ, atie ke ifịm ubọọñ anyʌñ atañ ikọ anọ mbon abio.

²²Ammọ emaebọñ, “Uyo abasi ado ami, idooho uyo awo.”

²³Kpa ataa idahado, sia Herọd mmiikinọọhọ Abasi ubọọñ, enyere Abọọñ amaamia anye anịm, mme utʌñ enyʌñ eta anye, anye akpa.

²⁴Ado ikọ Abasi amaaka iso akọt anyʌñ asuana.

²⁵Ke Banabas ye Sọọd emaekema iso utom ammọ, ammọ emaekpọñ Yerusedem edat Yọọn e-ekenyʌññọ ekood Maak nọ asaña ye ammọ.