Read Ibibio Contemporary Bible 2020 Utom 13 Bible Online

Utom 13 - Ibibio Contemporary Bible 2020 bible

Utom 13

¹Mme andikpeeb ñkọrọ mme brọfed emaeba ke ufọkabasi ke Antiọk: Banabas, Simiọn e-ekekoodo Naiya, Dusiọs awo Sirin, Manen (a-akedʌññọ ye adaiwuod ukara, Herọd) ye Sọọd.

²Ke ini ammọ esʌkkọ ekpono Abasi enyʌñ etre udia, Adisana Sịbidịd amaabo ate, “Isio Banabas ye Sọọd inịm innọ miin saña-saña kebaña utom ado a-ami ñkekoodo ammọ mbo edinam.”

³Ndin ke ammọ emaeketie utreudia enyʌñ ebọñ akam, ammọ emaedot Banabas ye Sọọd ubọk, enyʌñ esio ammọ unyọñ.

⁴Ammọ awo iba a-Adisana Sịbidịd akedọññọ utom emaekaiya Sedosia enyʌñ edʌk ubom do esaña ekesịm Saiprọs.

⁵Ke emaekekesịm Sadamis, ammọ emaekwọrọ ikọ Abasi ke mme sinakọk mme Yuu. Yọọn amaaba ye ammọ nte anọ unwam.

⁶Ammọ emaesaña ke afịd isọñ isu ado (utan a-ammọọñ akannake akʌk) tutu edisịm Bafọs. Do, ammọ emaekịt abiaidiọñ keed, awo Yuu a-akedooho brọfed abiaaña a-akekereke Baa-Yisọs.

⁷Anye akeba nte awo unwam anọ ekamba awo ukara akọsịn, Seyius Bọdus. Ekamba awo ukara akọnsịn ami, adiọọñọ ñkpọ awo, amaadọñ ekekood Banabas ye Sọọd sia anye amaayem adikop ikọ Abasi.

⁸Ado Edimas, awo idiọñ (sia anyịñ amọ awuọọñọ abre idiọñ) amaayem ibiọọñọ ammọ anyʌñ ayem usʌñ adiwọññọ ekamba awo ukara akọnsịn ñkpọñ usʌñ mbuọdidem Abasi.

⁹Sọọd, a-akenyʌññọ akere Bọọd, a-akeyọhọke ye Adisana Sịbidịd, amaasak iso ase Edimas ate,

¹⁰“Afo ado ayịn setan ye asua afịd nti ñkpọ! Afo ameyọhọ ye afịd aduuk abiaaña ye ñkara. Nte afo uduutreke adisịn abiaaña ye ubiọñọ ke ndinen usʌñ Abọọñ?

¹¹Idahami ubọk Abọọñ udodo fiin ke idem. Afo ayaakanna ado nnan ke etək ini, ini ayaaba a-afo mmuuduukịtte unwana utịn aba.” Ataa idahado ñkịmanyen ye akịm emaefʌk anye, anye amaadutịn usʌñ, ayem awo se imʌm anye ubọk.

¹²Ke ekamba awo ukara akọnsịn amaakekịt se ikitịppe, anye amaanịm ke akpanikọ, sia idem amaakpa anye ke se Bọọd akekpeeb anye abaña Abọọñ.

¹³Ke emaekekpọñ Bafọs, Bọọd ye nsaña amọ emaewat ekebeghe ke Beka ke Bamfidia. Do ke Yọọn akekpọñ ammọ atịmme anyọñ Yerusedem.

¹⁴Ke emaekekpọñ Beka ammọ emaeboiyo eka Antiọk a-asịneke ke Bisidia. Ke Sabad ammọ emaedʌk eketie ke sinakọk.

¹⁵Ke emaekekood ke ñwed Ibed ye ake mme Brọfed ema, mme andikara sinakọk emaedọñ ekedọkkọ ammọ ete, “Nditọete, akpedo emenie ikọ nsọọñidem aditañ nnọ mme awo, mbọk ika iso itañ.”

¹⁶Bọọd amaadakka ada, adịppe ubọk ke anyọñ abo: “Nditọ Isred ñnyịn ye ndufo mme Yentaid e-ekponoke Abasi, ikpañ utọñ innọ!

¹⁷Abasi nditọ Isred amaamek mme eteete ñnyịn; amaanyʌñ anam ammọ eforo ke ini ammọ ekebaaha ke Iyịpt; ke akpọsọñ adudu ke anye akeben ammọ awuọ ke idʌñ ado;

¹⁸anye amaayọ ido ammọ ke ñkpọ nte isua aba ke akpautatan;

¹⁹anye amaasobo mme idịd itiaba ke Kenan, anyʌñ ayaak isọñ ammọ anọ Isred nte inie ammọ.

²⁰Afịd adinam ami akedat ñkpọ nte isua ikie inaañ ye aba ye duob. “Ke ado amaakeboiyo, Abasi amaanọ ammọ mme akpeikpe tutu adiwuọ ini brọfed Samued.

²¹Akema ammọ emaeyem adidem ndin Abasi amaanọ ammọ Sọọd ayịn Kis, a-aketooho ekpək Benyamin, a-akekarake ke isua aba.

²²Ke amaakedooro Sọọd ke ifịm ukara, Abasi amaanam Defid ado adidem ammọ. Abasi amaatañ asọọñọ ke abaña anye abo: ‘Ami mmekịt Defid ayịn Yesi nte awo a-akemme ama ye esịd mmi; anye ayaanam afịd ñkpọ se nyem anye anam.’

²³“Ato ke ubon awo ami Abasi amaaben Yisọs, Andinyaaña asọk Isred kpa nte anye amaakenwọnwọñọ.

²⁴Mbemiso Yisọs akedi, Yọọn amaakwọrọ adikappa esịd ye uduọkmmọọñ anọ afịd mbon Isred.

²⁵Ke ini Yọọn akebooho ima utom amọ, anye amaabo ate: ‘Ndufo ekere ebo ke ami ndo anie? Ami ndooho anye a-ndufo eyemme. Ado aba anye a-añkeeneke ke edem, ndin ami ndotto aditat udʌk ikpaukod amọ.’

²⁶“Nditọete, nditọ ubon Ebraham ñnyịn ye ndufo mme abaak Abasi ke atu mme Yentaid, ado ñnyịn ke ekenọ etob adinyaaña ami esọk.

²⁷Mbon Yerusedem ye mme andikara ammọ ikidiọọñọke Yisọs, ado ke adibiire ikpe ñkpa nnọ anye, ammọ emaenam mme ikọ a-mme brọfed esikoodo kwa Sabad asu.”

²⁸Akpesʌk ado ammọ mmiikikịtte eti ntak a-anye akpedotto ñkpa, ammọ emaebo Baided yak awot anye.

²⁹Ke ammọ emaekenam afịd se ekewet ebaña anye, ammọ emaekekọññọ anye ke eto krọs enyʌñ ebuuk anye ke udi.

³⁰Ado Abasi amaanam anye aset ke ñkpa,

³¹ndin ke umiañ usen mbon e-ekesañake ye anye eto Kadidi eka Yerusedem emaekịt anye. Ammọ edoñño ntiense amọ enọ mbon ñnyịn idahami.

³²“Ñnyịn idọkkọ ndufo eti etob: Se Abasi akenwọñọ anọ mme eteete ñnyịn,

³³Abasi anam anye asu inọ ñnyịn, nditọ ammọ, ke anye adinam Yisọs aset ke ñkpa. Kpa nte emaekewet ke udiana Saam: “ ‘Afo ado ayịn mmi; mfịn ami mmubon fiin.’

³⁴Abasi akenam anye aset ke ñkpa mbaak anye adikịt mbiara ke nsinsi. Nte Abasi atañña, “ ‘Ami ñyaunọ fiin mme ndisana ye nsọọñọnda adidiọñ a-añkenwọñọke nnọ Defid.’

³⁵Ñko emaemaana etañ ado ke Saam mfen: “ ‘Afo uduunyʌññọ uyak adisana awo mfo akịt mbiara.’

³⁶“Ke Defid amaakenam uduak Abasi ke emana amọ ima, anye amaadaiya ke Abọọñ; emaebuuk anye ye mme ete amọ ndin ikpọkidem amọ amaabiara.

³⁷Ado anye a-Abasi akenamma aset ke ñkpa ikikịtte mbiara.

³⁸“Ke ntodo, mme ufan mmi, ami mmeyem nọ ndufo ediọọñọ ebo ke ato ke Yisọs ke ekwọrọ adifeen ke mme idiọọkñkpọ inọ ndufo.

³⁹Ato ke anye enam afịd mme andinịm ke akpanikọ ebọkkọ ke afịd idiọọkñkpọ, utebeikpe a-ndufo mmiikpikikanna inie ke idak ibed Moses.

⁴⁰Ikpeme mbaak se mme brọfed eketañ aditịppe inọ ndufo:

⁴¹“ ‘Sese, ndufo mbon nsaha, iba ke ñkpaidem inyʌñ itak, sia ami ñyaanam ñkpọ ke emana ndufo, a-ndufo mmiidiinịmme ke akpanikọ tutu amama, ñkọm awo akpetañ inọ ndufo.’ ”

⁴²Nte Bọọd ye Banabas ekewuọọñọke ke sinakọk, mme awo emaebo ammọ ete yak ammọ emaana editañ ikọ ebaña mme ñkpọ ami ke udiana usen Sabad mfen.

⁴³Ke atu awo emaekesuana, umiañ ke atu mme Yuu ye mme andikpono Abasi ake Yudaisịm emaekeene Bọọd ye Banabas e-eketañña ikọ ye ammọ, enyʌñ enam ammọ ediọọñọ ke afọn adika iso mba ke mfọn Abasi.

⁴⁴Ke udiana usen Sabad mfen, akeyaak etək adido afịd idʌñ ekebono nọ ekop ikọ Abasi.

⁴⁵Ke mme Yuu emaekekịt mme atu awo, ufịb amaadʌk ammọ esịd ndin ammọ emaesue Bọọd aketañ ikọ ke ido usọñanyen ye eniin.

⁴⁶Bọọd ye Banabas emaebọọrọ ammọ uko-uko ete: “Akena nte ñnyịn ibem iso itañ ikọ Abasi inọ ndufo. Sia adooho ndufo emesịn adibọ ikọ Abasi, inyʌññọ ibat idem ndufo nte mbon e-edotto nsi-nsi uwem, idahami ñnyịn imiwọññọ ikeene mme Yentaid.

⁴⁷Sia ntom ke Abọọñ abo yak ñnyịn inam: “ ‘Ami mmunam fiin ado unwana anọ mme Yentaid, nọ afo aben adinyaaña aka ke afịd akpatre iso ederimbod.’ ”

⁴⁸Ke mme Yentaid emaekekop ami, ammọ emaedaara enyʌñ enam ikọ Abasi anie ukpono; ndin afịd mbon ado e-ekenaaha enie nsi-nsi uwem emaenịm ke akpanikọ.

⁴⁹Ikọ Abasi amaasuana ke afịd ñkañ udo.

⁵⁰Ado mme Yuu emaedọọñ mme ibaan e-ekebaaha Abasi enyʌñ enie ñkoñkoñ idaha ye mme awuọiso ideen ke abio. Ammọ emaeben ukọbọ ekeene Bọọd ye Banabas, enyʌñ ebịne ammọ esio ke ñkañ ammọ.

⁵¹Ado Bọọd ye Banabas emaekeñ ntan ikpad ebon enọ ammọ nte ubiom ikpe, ndin enyʌñ eboiyo eka Aikonium.

⁵²Ndin mme mbed emaeyọghọ ye idaara ye Adisana Sịbidịd.