Read Ibibio Contemporary Bible 2020 Utom 15 Bible Online

Utom 15 - Ibibio Contemporary Bible 2020 bible

Utom 15

¹Ubaak awo emaeto Yudia esoiyo edi Antiọk enyʌñ etọọñọ adikpeeb mme andinịm ke akpanikọ, ebo ete: “Ibọhọke ndufo ena mboppo ekeene naña Moses akekpeeb, ndufo idiikanna inie adinyaaña.”

²Ami amaadat akpọsọri mfaaña ye eniin adi ke ufọọd Bọọd ye Banabas. Ke ntak ado, emaemek Bọọd ye Banabas edian ye usʌk mme andinịm ke akpanikọ mfen ete edọọk eka Yerusedem nọ ekekịt mme abọsịd ye mme etubom ufọkabasi, kebaña mfaaña ami.

³Ufọkabasi emaenọ ammọ eka, ndin naña ammọ esañake eboiyo Fonisia ye Sameria, ammọ emaetañ naña mme Yentaid ekekappa esịd. Etop ami amaanem afịd mme andinịm ke akpanikọ esịd eti-eti.

⁴Ke ini ammọ emaekediwuọ Yerusedem, ufọkabasi ye mme abọsịd ye mme etubom ufọkabasi emaedaara ammọ, ammọ emaenyʌñ ebʌk afịd se Abasi akedat ammọ anam.

⁵Ubaak mbon e-enịmme ke akpanikọ e-eketooho ñka mme Farisi, emaedaaña eda ebo, “Ana mme Yentaid ena mboppo enyʌñ enịm ibed Moses.”

⁶Mme abọsịd ye mme etubom ufọkabasi emaesoobo iwuod adikere mbaña mbịme ami.

⁷Ke emaeketañ ikọ ekpeene, Bita amaadakka ada atañ ikọ anọ ammọ ate: “Nditọete, ndufo emediọọñọ ebo ke ata anyan ini a-akeboiyoke, Abasi amaammek miin ke atu ndufo abo ke ana mme Yentaid ekop eti etop eto inua mmi enyʌñ enịm ke akpanikọ.

⁸Abasi, adiọọñọke esịd awo, amaawọt abo ke imidat ammọ isịn ke atu ato ke adinọ Adisana Sịbidịd asọk ammọ ukem naña anye akenam inọ ñnyịn.

⁹Abasi ikisịnne adusad ke ufọọd ñnyịn ye ammọ sia anye amaanam esịd ammọ asana ke mbuọdidem.

¹⁰Ndin idahami, nsinam ndufo enwana adidomo Abasi idomo ke adiben akpọnọ ñkọọñ mme yentaid ke itọñ, utọ akpọnọ ake ñnyịn ye mme ete ñnyịn mmiikikanna ibiom?

¹¹Iyo-o! Nnyịn iminịm ke ato ke mfọn Abọọñ ñnyịn Yisọs ke inyaaña ñnyịn, naña enyʌñ enyaaña ammọ.”

¹²Afịd esob emaedop uyo enyʌñ ekpañ utọñ enọ Banabas ye Bọọd naña ammọ ebʌk utịbe ñkpọ ye utom idiọọñọ a-Abasi akenamma ato ammọ ke atu mme Yentaid.

¹³Ammọ emaekekweeñe, Yemsi amaasio uyo abo ate, “Nditọete, ikpañ utọñ innọ.

¹⁴Saimọn Bita atañ inọ ñnyịn naña Abasi akebem iso akere ñkpọ abaña mme Yentaid ke adimek mme awo ke atu ammọ nnọ idem amọ.

¹⁵Mme ikọ brọfed a-adukemme ye ñkpọ ami, naña ewet ami:

¹⁶“ ‘Ke ñkpọ ami amaaboiyo, ami ñyaatịmme ndi ñnyʌñ ndibọp atayad Defid a-aduọọhọ. Ñwuuro amọ ami nyaabọp, ñnyʌñ nneke anye ñwuuk.

¹⁷Nọ nyọhọnsʌhọ uduudawo ekpeyem Abọọñ Abasi, idem afịd mme Yentaid e-ekereke anyịñ mmi, Abasi a-anamma mme ñkpọ ami abo,’

¹⁸mme ñkpọ e-emaekedọdiọọñọ ke anyan ini a-akeboiyoke.

¹⁹“Ubiire ikpe mmi ado ndin, yak ñnyịn ikuunam ñkpọ asọsọñ anọ ammọ mme Yentaid e-ekannake ebịne Abasi.

²⁰Utu ke ado, yak ñnyin iwet ammọ ibo ammọ esịññe idem ekpọñ mme ndidia a-asappake awo me ake ndem, ekpọñ use, ekpọñ unam e-eyịtteyịt ewot, enyʌñ ekpọñ iyiib.

²¹Sia tọọñọ ke ata esed, emaekwọkwọrọ ibed Moses ke afịd abio tutu ami enyʌñ ekokood anye ke mme sinakọk ke afịd-afịd Sabad.”

²²Ndin mme abọsịd ye mme etubom ufọkabasi, ye afịd ufọkabasi emaebiere adimek ubaak awo ammọ ñnyʌñ ndọñ ammọ eka Antiọk ye Bọọd ye Banabas. Ammọ emaemek Yudas (e-ekoodo Basabas) ye Saidas, awo iba e-ekedoññoke mme adaiwuod ke atu mme andinịm ke akpanikọ.

²³Emaenọ ammọ deta e-ekewette ntom: Ito ñnyịn mme abọsịd ye mme etubom, nditọete ndufo, Inọ esọk mme Yentaid e-enịmme Abasi ke akpanikọ e-ebaaha ke Antiọk, Siria ye Sidisia: Ekọọm.

²⁴Imaikop ke ubaak awo emaeto ke atu ñnyịn, akpesʌk ado ammọ mmiikibọọhọ ñnyịn adudu, edifịna ndufo enyʌñ etịmede esịd ndufo akeene se ammọ eketañ.

²⁵Ke ntodo, afịd ñnyịn imainyịmme adimek mme awo ñnyʌñ nnọ ammọ isọk ndufo ñkọrọ mme ndima ufan ñnyịn Banabas ye Bọọd,

²⁶mbon e-emakesaana itoñ uwem ammọ eyaak ke abaña anyịñ Abọọñ Yisọs Krais.

²⁷Ndin ñnyin imidọñ Yudas ye Saidas edisọọñọ se ñnyịn iwet ke aditañ ikọ ami ke inua ammọ.

²⁸Adisana Sịbidịd ye ñnyịn imikịt ibo ke afọn aditre adinọ ndufo mbiomo mfen ñkan ñkpọ ifañ ami a-ndufo enieehe adinam.

²⁹Ana ndufo ebet mme udia e-ewaaha enọ ndem, ebet adita iyiib, ebet unam e-eyịtteyịt ewot, enyʌñ etre use. Ayaafọn adieke ndufo ediikpọñ mme ñkpọ ami. Itie sʌñ.

³⁰Ke emaekesio mbon ami nọ eka, ammọ emaesọiyọ ekewuọ Antiọk, itie nte ammọ ekekood ufọkabasi ebək enyʌñ ekappa deta enọ ammọ.

³¹Mbio Antiọk emaekood ñwed ado enyʌñ edat esịd ke ikọ nsọọñọukod ammọ.

³²Yudas ye Saidas, e-ekedooho mme brọfed ke idem ammo, emaetañ uwak ikọ adisọọñọ mme andinịm ke akpanikọ idem.

³³Ke emaekeba do, mme andinịm ke akpanikọ ke Antiọk emaesio ammọ unyọñ ye adidiọñ emem, ke ammọ aditịmme ñnyọñ mbịne mbon e-ekedọññọ ammọ utom.

³⁴Ado Saidas abiire adisʌghọ do.

³⁵Ado Bọọd ye Banabas ye uwak mbon mfen emaewobeba ke Antiọk enyʌñ ekwọrọ ikọ Abọọñ.

³⁶Ke etək ini amaakeboiyo, Bọọd amaabo Banabas, “Yak ñnyịn itịmme ika ikise nditọeka mme andinịm ke akpanikọ ke afịd abio a-ñnyịn ikikwọrọke ikọ Abọọñ inọ, inyʌñ ise naña ammọ enam ñkpọ.”

³⁷Banabas amaayem Yọọn, e-enyʌññọ ekood Maak, akpekeene asaña ye ammọ,

³⁸ado Bọọd ikikereke ibo ke afọn ntodo, sia yọọn amaakpọñ ammọ ke Bamfidia, ikiinyʌññọ ikeene ammọ inam utom ado.

³⁹Akpọsọñ eniin amaaba ke ufọọd ammọ ke utọ usʌñ a-akenamma ammọ ediañña nsaña. Banabas amaadat Maak asio uwad aka Saiprọs,

⁴⁰ado Bọọd amaamek Saidas aben adakka, ke mme andinịm ke akpanikọ emaekeyaak anye esịn ke ubọk mfọn Abọọñ.

⁴¹Anye amaasaña aboiyo Siria ye Sidisia anyʌñ asọọñọ mme ufọkabasi idem.