Read Ibibio Contemporary Bible 2020 Utom 17 Bible Online

Utom 17 - Ibibio Contemporary Bible 2020 bible

Utom 17

¹Ke Bọọd ye mme nsaña amọ emaekeboiyo ke Amfipodis ye Abodonia, ammọ emaedisịm Tesadonika, a-sinakọk mme Yuu akebaaha.

²Nte ido ammọ akesidooho, Bọọd amaadʌk aka sinakọk, anyʌñ afaaña mfaaña ato ikọ ñwed Abasi mme ammọ yuu ke usen Sabad ita,

³anam anwaña anyʌñ awọt ammọ abo ke Mesaya akena akịt ukuud anyʌñ aset ke ñkpa. Anye amaabo, “Yisọs ami ke ami idọkkọ ndufo mbo ke anye ado Mesaya.”

⁴Usʌk mme Yuu e-emaekappa esịd enyʌñ ekeene Bọọd ye Saidas, ye mme uwak mbon Krik e-efegheke Abasi ñkọrọ usʌk mme awuọiso ibaan.

⁵Ado ubaak mme Yuu emaefịbbe ufịb; do ndin ammọ emaekekoono mme ndiọi awo eto anwa udua, edọọñ atu awo nọ etọọñọ ntịme ke abio. Ammọ emaefeeñe eka ufọk Yesịn adiyem Bọọd ye Saidas mben ammọ ndi ke iso mme atu awo.

⁶Ado ke ini ammọ mmiikikịtte Bọọd ye Saidas ammọ emaemʌm Yesịn ye mme andinịm ke akpanikọ mfen eka iso mbio abio, ebọọñ ñkpọ: “Ibon ami e-esịnne ntịme ekanna afịd ederimbod ediwuọ umi,

⁷ndin Yesịn amaakoono ammọ adọñ ke ufọk amọ. Ammọ inịmme mme ibed Sisa, ado ebo ke adidem mfen aba, a-akereke Yisọs.”

⁸Ke ammọ emaekekop ami, mme atu awo ye mme ikpọ mbon utom abio emaekop ataa mfịna ke esid.

⁹Ndin ammọ emaesio Yesịn ye mme mbon ñko ke ubiọñ mbemiso eyaak ammọ enyọñọ.

¹⁰Ayo akekịm, mme andinịm ke akpanikọ emaesio Bọọd ye Saidas unyọn na eka Beria. Ekekesịm udo, ammọ emaeka sinakọk mme Yuu.

¹¹Mme yuu ukañ Beria emaeniehe nti ido ekan ake mbon Tesadonika, sia ammọ emaebọ etop ami ke ata ayọhọ udọñ enyʌñ eduuñọ ñwed Abasi afịd usen adikịt me se Bọọd aketañ akedo akpanikọ.

¹²Ke ntak ami uwak mme Yuu emaenịm ke akpanikọ, ukem nte ubaak mme awuọiso ibaan Krik ye umiañ ideen Krik ñko.

¹³Ado ke mme Yuu ke Tesadonika emaekeediooho ke Bọọd asʌk akwọrọ ikọ Abasi ke Beria, usʌk ammọ emaeka do ñko ekesịn nsok ke ufọọd mme awo ntịme enyʌñ etimmede ammọ esịd.

¹⁴Ndin mme andinịm ke akpanikọ emaesọp enam Bọọd aka mben esok, ado Saidas ye Timoti emaesọñ eba ke Beria.

¹⁵Mme awo e-ekeebenne ye Bọọd ekeesuuk emaeben anye eka Atens, ndin Bọọd ekeesuuk amaanọ uyo ate no Saidas ye Timoti ibịne imọ naña ammọ ekakan usọp-usọp.

¹⁶Ke idaha Bọọd abet akeatiehe ammọ ke Atens, esịd amaadiọọk anye eti-eti ke adikịt nte mme ubobod abasi eyọhọ idʌñ ado.

¹⁷Ndin anye amaafaaña anyọñ anemme ke sinakọk ye mme Yuu ye mbon Krik e-ekebaaha Abasi, ukem ado ke añwa udua ke usen ke usen ye mme awo ake adodo e-ekebaaha do.

¹⁸Ñko mme ikpọ ntaifiọk e-ekeeneke ukpeebñkpọ nka Epikuriọs ye mme Stọik emaetọọñọ eniin ye anye. Usʌk ammọ emaebịp ebo, “Ataañ-atịme ami anwana idibo die-e?” Mbio mfen emaebo ete, “Aba nte anye anwana adikwọrọ ikọ mbaña mme isen abasi.” Ammọ eketañ ami sia Bọọd akekwọrọ eti mbʌk abaña Yisọs ye adised ke ñkpa.

¹⁹Ammọ emaemʌm anye enyʌñ eben anye eka akwaesop ikporisọñ mme Krik kansọrọ ekoodo Ariopakus, ndin emaebo anye ete, “Amekeme adinam ñnyịn idiọọñọ ufa ukpeebñkpọ a-afo atañña abaña mi?

²⁰Ndufo edat mme asen akikere etañ ke utọñ mi, ndin ñnyịn ikpaima adidiọọñọ se amọ ewuọọñọ.”

²¹(Ndin afịd mbon Atens ye mme isenawo e-ekedʌñọke do ikisinamma ñkpọ mfen ikan editañ mbaña ñnyʌñ ñkpañutọñ nnọ mme ufa akikere.)

²²Bọọd ndin adakka ada ke mbono mme Ariopakus atañ ate: “Ndufo mbon abio Atens! Ami mmekịt ke afịd usʌñ nte ndufo emekpono Abasi eti-eti.

²³Sia naña ami nsaañake ñkanna ñnyʌñ nseed, akpan-akpan mme ñkpọ ukpono Abasi ndufo, ami ñko mmaakịt itie ukpono Abasi ye mme ikọ ewette mi: ami ada anọ abasi a-nnyịn miidiọọñọke. Ke adinekke ntañ, Abasi a-ami ñyemme adikwọrọ inọ ndufo ado anye a-ndufo ekponoke, akpesʌk ado ndufo miidiọọñọke.

²⁴“Abasi a-akenamma ederimbod ye afịd ñkpọ ke esịd amọ ado Abọọñ anyọñ ye isọñ, ndin anye idʌññọ ke mme tembịd e-ebọppọ ke ubọk.

²⁵No awo inamma ñkpọ ke ubọk inọ anye sia anye iyemme ñkpọ ndomokeed, ado anye ke idem amọ anọ afịd awo uwem ye inweek ye afịd ñkpọ mfen.

²⁶Aketo ke awo keed anye anam afịd ederimbod ye awo, abo ammọ edʌñ ke afịd iso isọñ, anye anyʌñ abakka ini anọ ammọ ye mme itie se ana ammọ edʌñ.

²⁷Abasi akenam ami nọ mme awo ayem anye, enyʌñ ekeme adisaña akpere anye, anyʌñ akịt anye, akpesʌk ado anye miinyọọñọ usʌñ ikpọñ nnyịn ndomokeed.

²⁸‘Sia ke anye ke ñnyịn idʌñ, inyʌñ isaña inyʌñ inie uwem.’

²⁹“Ndin sia ñnyịn idooho nditọ Abasi, inaaha ñnyịn ikere ke Abasi aba nte kood me sịrifa me itiad, nte ubodñkpọ a-awo adatta ifiọk ye ikike amọ abot.

³⁰Ke ayo mkpọñ ako Abasi amaafeen anọ ammọ ke unana adidiọọñọ, ado idahami anye anọ iwuuk ate afịd awo ke afịd itie ekappa esịd.

³¹Sia anye anịm usen a-anye adikpe ikpe afịd ekondo ke unen ato ke awo a-anye amaamek anịm nte akpeikpe. Anye akenam anye aset ke ñkpa adiwọt ke anye ado akpeikpe ado.”

³²Ke ammọ emaekekop adised ke ñkpa, usʌk ammọ emaedutuun inua, ado usʌk ammọ emaebo, “Nnyịn imiyem adimaana ñkop ikọ ami uto fiin.”

³³Akema, Bọọd amaakpọñ esob.

³⁴Ubaak awo emaekappa esịd ekeene Bọọd enyʌñ enịm ke akpanikọ. Usʌk ammọ ekedo Dionisius, awo keed ke atu mme Aropakus, ye awonwaan a-akekereke Damadis, ye mbon mfen.