Read Ibibio Contemporary Bible 2020 Utom 18 Bible Online

Utom 18 - Ibibio Contemporary Bible 2020 bible

Utom 18

¹Ke mme ñkpọ ami emaekeboiyo, Bọọd amaakpọñ Atens aka Kọrint.

²Ke udo anye amaakịt awo Yuu keed a-akereke Akwida, a-aketooho Bọntus. Anye aketo Itadi adi ye anwaan amọ Brisida sia Kradius amaakenọ uyo ate yak afịd mme Yuu ekpọñ Rum. Bọọd amaaka akese ammọ,

³ndin sia anye akedooho anam atayad nte Akwida ye Brisida, anye amaatie anam utom ye ammọ.

⁴Anye amaanie nneme afịd Sabad ke sinakọk, adomo adinam mme Yuu ye mme Krik ekịt ntak ammọ ekpenịmme ke akpanikọ.

⁵Ke Saidas ye Timoti emaeketo Masidonia edi, Bọọd amaayaak idem amọ afịd-afịd asịn ke adikwọrọ ikọ, aben awọt mme Yuu abo ke Yisọs akedo Mesaya.

⁶Ado ke mme Yuu emaekefaaña ye Bọọd enyʌñ ekanna eda ke adisuesueñ anye, Bọọd amaasio mme afọñidem amọ asịppe anyʌñ abo ammọ ate, “Iyiib ndufo idodo ndufo ke iwuod! Ubọk mmi isịneke do. Tọọñọ ke ami, ami ñyaaka mbịne mme Yentaid.”

⁷Ndin Bọọd amaakpọñ sinakọk aka ufọk Taitọs Yọstus, akpono ata Abasi, u-ufọk amọ akediaññake atañ ye sinakọk.

⁸Krispus, etubom sinakọk ye afịd ufọk amọ emaenịm Abọọñ ke akpanikọ, ndin umiañ mbon Kọrint e-ekekoppo se Bọọd aketañ emaenịm ke akpanikọ enyʌñ ebo uduọkmmọọñ.

⁹Akoneyo keed, Abọọñ amaatañ ikọ anọ Bọọd ke ñkukịd, abo ate: “Kuukop ndịk; ka iso kwọrọ tañ ikọ, kuudop uyo.

¹⁰Sia Ami mmọmba ye afo, ndin awo ndomokeed idiinamma ntịmme mme afo inyʌññọ unọ fiin unan sia Ami mmeniehe umiañ awo ke abio ami.”

¹¹Ndin Bọọd amaatie do ke Kọrint isuakeed ye ubaak akpeeb ammọ ikọ Abasi.

¹²Daña Kadio akedooho ata ekamba awo ukara kọnsịn ke Akaya, mme Yuu emaediana esid keed enam ntịme ye Bọọd enyʌñ eben anye eka esob, ete:

¹³“Awo ami atemme mme awo naña ekpono Abasi ke mme usʌñ a-mmiisañake ke ibed Moses.”

¹⁴Kpa ke idaha a-Bọọd akeyemme aditañ ikọ, Kadio amaabo mme Yuu ate: “Akpedo nte ndufo mme Yuu ekeben ikọ abañake ndudue me akpan ubiad ibed edi, akpaawọt ifiọk ami adikpañ utọñ inọ ndufo.

¹⁵Ado sia awanake ñkpọ se ibaña mme ikọ ye anyịñ ye ibed ndufo, ibiere ikọ ado ke idem ndufo. Ami ndiidooho akpeikpe ke utọ mme ikọ ado.”

¹⁶Anye amaanam ebịne ammọ esio ke ufọk esob.

¹⁷Ndin afịd ammọ emaekanna iso ese Sostenes etubom sinakọk enyʌñ emia anye ke iso ekamba awo esob kọnsịn. Ado Kadio ikinieeghe ndubehe do.

¹⁸Bọọd amaaba ke Kọrint ke ñkpọ nte usen ifañ. Akeamo anye amaakpọñ nditọete anyʌñ asaña mme Brisida ye Akwida eka Siria. Mbemiso anya akeasio uwad, Bọọd amaakpooño ided amọ ke Senkre akeene akaaña anye akenamma.

¹⁹Ammọ emaekesịm Efisọs, itie a-Bọọd akekpọññọ Brisida ye Akwida. Anye ke idem amọ amaadʌk aka sinakọk anyʌñ ake anie nneme ye mme Yuu.

²⁰Ke ini ammọ ekebooho yak anye amaana atie ye mmimọ, anye ikinyịmmeke.

²¹Ado ke ini anye akedakkake, anye amaanam enwọñọ: “Ñyaatịmme ndi adieke adooho uduak Abasi.” Ndin anye amaasio uwad akpọñ Efisọs.

²²Ke anye amaakebehe ke Siseria, anye amaadọọk akeawuọ Yerusedem anyʌñ akekọọm ufọkabasi ndin adisọiyọ aka Antiọk.

²³Ke Bọọd amaaketie etək ini ke Antiọk, anye amaato do adakka isañ anyʌñ asaña ke itie ke itie ke afịd ñkañ Kadesia ye Frikia, asọọñọ afịd mme ibed idem.

²⁴Akeama awo Yuu keed a-akekereke Apọdọs, a-aketooho Adeksandra, amaadi Efisọs. Anye akedo ataifiọk a-akenieehe ata ntotoñọ ifiọk ke Ñwed Abasi.

²⁵Emaekpeeb anye ñkpọ ke usʌñ Abọọñ Abasi, ndin anye amaatañ ikọ ye ayọhọ udọñ ke esịd amọ anyʌñ akpeeb ñkpọ nnen-nnen nnen-nnen abaña Yisọs, akpesʌk ado anye akediọọñọke ñkpọ abaña uduọkmmọọñ Yọọn kpọd.

²⁶Anye amaatọọñọ aditañ ikọ uko-uko ke sinakọk. Ke Brisida ye Akwida emaekekop se anye atañ, ammọ emaekood anye ufọk enyʌñ ekenam usʌñ Abasi anwaña anye ayọhọ-ayọhọ.

²⁷Ke ini Apọdọs amaakeyem adika Akaya, nditọete ke mbuodidem emaesọọñọ anye ukod enyʌñ ewet ñwed enọ mme mbed ke udo ete yak ammọ edaara adidi amọ. Ke amaakeakeasim, anye akedo ekamba unwam anọ mbon ado e-emaekenịm ke akpanikọ ato ke mfọn Abasi.

²⁸Sia anye amaafaaña uko-uko ye mme Yuu ke nneme anwa-anwa, anyʌñ awọt atọ ke ñwed Abasi ate ke Yisọs akedo Mesaya.