Read Ibibio Contemporary Bible 2020 Utom 2 Bible Online

Utom 2 - Ibibio Contemporary Bible 2020 bible

Utom 2

¹Ke usen Bentikọs amaakedikem, mme mbed emaesoobo atọ keed.

²Ke idaha keed ado, akpọsọñ uyom amaato ikpaanyọñ adiyọhọ ufọk ammọ ekebaaha.

³Ndin ammọ emaekiid se ikibañña nte mme edeme ikañ nte esuana ekeedoro ammọ keed-e-keed ke idem.

⁴Ammọ emaeyọhọ ye Adisana Sịbidịd enyʌñ etọọñọ adisem mme nsio-nsio usem nte Sịbidịd akenọọhọ ammọ ukeme.

⁵Ke ini ado mme Yuu e-efeheke Abasi, e-eketooho mme nsio-nsio idịd ke ederimbod emaebañña ke Yerusedem.

⁶Ke ini mme atu awo ekekoppo uyom ami, ammọ emaewuọọñọ edi ke ñkpaidem, sia mme awo keed-e-keed emaekop nte mme mbed esem nsio-nsio usem idʌñ ammọ.

⁷Ke ata ñkpaidem, ammọ emaebịp, “Nte afịd mme awo e-esemme mme usem ami itooho Kadidi?

⁸Anam die ndin yak ñnyịn keed-e keed ikop se ammọ etañ ke mme usem idʌñ ukañ ñnyịn?

⁹Ñnyịn ido mbon Betian, Medes, Edamaid, mbon e-tooho ke Mesopotemia, Yudia, Kapadosia, Bọntus ye Esia,

¹⁰Frikia ye Bamfidia, Iyịpt ye mme ubaak itie ke Dibia ke ñkanñkʌk Sirin; mme esenawo e-etooho Rum

¹¹(mme Yuu ye mbon se ikappa esịd idʌk edu ukpono ake Yudaisịm); Mme Kretan ye mme Arab, ñnyịn ikop nte ammọ etañ ebaña mme utịbe ñkpọ Abasi ke mme nsio-nsio usem ñnyịn.”

¹²Idem amaakpa afịd awo, ammọ ebiime emọ-emọ aken ebo, “Ami awuọọñọ so-o?”

¹³Ado ubaak awo emaesaha ammọ enyʌñ ebo ete, “Ukọd anaam ammọ.”

¹⁴Ndin Bita amaadakka ada yemme abọsịd duob ye keed anyʌñ abọñ ke akpọsọñ uyo anọ mme atu awo abo: “Inekke ikpañ utọñ, afịd ndufo mbon Yuu ñnyin ye mme andidʌñ ke Yerusedem, ikop se ami ntañ.

¹⁵Idooho ukọd anaam ibon ami naña ubaak ndufo ekere. Abak abọhọ, awo isikpaaha mmịn ke ñkanika usʌkkeed ubakusen!

¹⁶Iyoo, se brọfed Yoed amaaketañ anịm ado ami:

¹⁷“ ‘Ke mme akpatre usen, Abọọñ Abasi atañ, ami ñyaanwañña Sịbidịd mmi nduọk afịd uduod awo. Mme nditọ ideen ye ibaan ndufo eyaetañ brọfesi, ñkparawa ideen ndufo eyaenyʌñ ekiid ñkukịd, mme ikpọ ideen ndufo eyaedappa ndab.

¹⁸Ñko ye nditọufọk mmi ideen ye ibaan, ami ñyaaduọk Sịbidịd mmi ke mme usen ado, ammọ eyaenyʌñ etañ brọfesi.

¹⁹Ami ñyaanịm mme idiọọñọ ke ikpaanyọñ ye mme idiọọñọ ke idakisọñ, iyiib ye ikañ ye ndubek ikañ.

²⁰Utịn ayaakappa ado akịm afiọñ anyʌñ akappa iyiib mbemiso usen Abọọñ Abasi adi, akwa usen itooro.

²¹Ado awo ake adodo a-akoodo anyịñ Abọọñ Abasi ayaabọkkọ.’

²²“Ndito Isred ñnyịn, ikpañ utọñ ikop se mbo ntañ: Yisọs ayịn Nasared akedo awo a-Abasi akebenne iwọt ndufo anwa-anwa ato ke mme utịbe ñkpọ ñkpaidem ye mme idiọọñọ a-Abasi akanamma ke ufọọd ndufo ato ke ubọk amọ, nte ndufo ke idem ndufo ediọọñọke.

²³Emaekappa anye enọ ndufo ato ke uduak ye ubonoñkpọ Abasi akenieeghe, ndin ato ke unwam mbon ibak, ndufo emaekọñ anye ewot ke eto krọs.

²⁴Ado Abasi amaanam anye aset ke ñkpa, anam anye abọkkọ ndutʌghọ ñkpa, sia ñkpa ikinieeghe adudu adimʌm anye ukad.

²⁵Ñko Defid amaatañ ami abaña Yisọs: “ ‘Ami mmaakịt Abọọñ Abasi ke iso mmi afịd ini. Sia anye abaaha ke ubọk nnasia mmi, ñkpọ ndomokeed idiintəkkoke.

²⁶Ke ntak ado esịd andat, edeme mmi anyʌñ akwọ itooro Abasi; ikpọkidem mmi ñko ayaanie idodanyen,

²⁷sia afo uduñkpọññọ miin ke abioekpo, afo uduunyʌññọ uyaak adisana awo mfo akịt mbiara.

²⁸Afo amenam ami ndiọọñọ mme usʌñ uwem; ayaannọ miin ayọhọ idaresịd ke iso mfo.’

²⁹“Ikọd ñnyịn Isred, yak ntañ inọ ndufo uko-uko ke nsọbom ñnyịn Defid amaakpa enyʌñ ebuuk anye, itiad udi amọ asʌk ababa awuọ mfịn.

³⁰Ado anye akedo brọfed, amaanyʌñ adiọọñọ ke Abasi amaanam akaakan enwọñọ adimek keed ke atu ayeyịn amọ ndot ke ebekpo amọ.

³¹Defid amaanie ifiọk ibaña ini iso ke anye adibem iso ntañ adised Mesaya ke ñkpa, ke awo idiikpọññọ anye ke abioekpo, ñko ke ikpọkidem amọ idiikịtte mbiara.

³²Abasi anam Yisọs ami aset ke ñkpa, ndin ñnyịn ido ntiense ibaña.

³³Ke emaekedịppe anye itie idot ke ubọkudom Abọọñ Abasi, anye abọ Adisana Sịbidịd a-anye akenwọñọke ato Ete. Do ke anye aduọk ammọ Sịbidịd a-ndufo ekịtte enyʌñ ekop mi mfịn.

³⁴Sia Defid ke idem amọ ikidọọhọ ika abio ubọọñ Abasi, ado amaabo, “ ‘Abọọñ amaabo Abọọñ mmi ate: “Tie ke ubọk udom mmi

³⁵tutu ami nnam mme asua mfo edoñño ñkpọ udodukod mfo.” ’

³⁶“Ke ntodo, yak afịd ufọk Isred ediọọñọ ayọhọ-ayọhọ: ke Abasi amaanam Yisọs a-ndufo ekekọññọ ewot ke eto krọs, ado Abọọñ ye Mesaya.”

³⁷Ikọ ami amaatuuk mbon awo se ikikop esịd, ndin ammọ emaebịp Bita ye mme abọsịd mbio ako ebo, “Nditọeka, nso-o ke ñnyịn ibiinam die?”

³⁸Ndin Bita amaabọọrọ ammọ abo ate, “Afịd ndufo ikappa esịd inyʌñ ibọ uduọkmmọọñ ke anyịñ Yisọs Krais nọ afeen mme idiọọkñkpọ ndufo. Ndufo ñko eyaebọ enọ Adisana Sịbidịd.

³⁹Enwọñọ ami inie ndufo ye nditọ ndufo, ye afịd awo e-ebaaha ke anyanusʌñ, ye afịd mbon Abọọñ Abasi ñnyịn adikood inọ idem amọ.”

⁴⁰Ndin Bita amaakwọrọ ikọ akpeene, adʌt ammọ utọñ anyʌñ akpeiye ammọ ate, “Inyaaña idem ndufo isio ke mbiara emana ami.”

⁴¹Mbon se ikitat esịd ikop ikọ amọ emaebọ uduọkmmọọñ, ndin ñkpọ nte awo tọsịn ita emaekeene edʌk ke atu ammọ usen ado.

⁴²Ammọ emaenekke esịn idem ke ukpeebñkpọ mme abọsịd ekenọọhọ ye ke nsañaewana mme abọsịd, ke adibuuñ uyo ye ke adibọñ akam.

⁴³Uteñe amaamʌm afịd ammọ adikịt umiañ utịbe ñkpọ ye mme utom idiọọñọ a-mme abọsịd ekenaññake.

⁴⁴Afịd mbon se ikinịm ke akpanikọ emaesisoobo itie keed, enyʌñ ewawana afịd ñkpọ enie.

⁴⁵Ammọ emaenyaam afịd ñkpọ ye inie ammọ enyʌñ edeeme enọọñọ mme awo naña mfịna awo keed-e-keed akedo.

⁴⁶Kwa usen, afịd ammọ emaesisoobo ke mme afe tembịd. Ammọ emaesibuuñ uyo ke ufọk ammọ, ewana ediaagha ke inem ye inwañ-inwañ esịd,

⁴⁷etooro Abasi, enyʌñ ekịt asaña-saña mfọn eto mme awo ñko ke abio. Ke usen ke usen, Abọọñ amaaka iso adian mme awo e-ekebọọhọ adinyaaña anọ ammọ.