Read Ibibio Contemporary Bible 2020 Utom 20 Bible Online

Utom 20 - Ibibio Contemporary Bible 2020 bible

Utom 20

¹Ke ini ntịme ami amaaketre, Bọọd amaadọñ ekekood mme mbed ndin ke anye amaakenọ ammọ ikọ nsọọñukod ama, anye amaakọọm ammọ unyọñ, ndin adakka isañ uka Masidonia.

²Anye amaasaña akanna afịd ñkañ udo anọ mme awo uwak ikọ nsọọñidem, ndin ke akpatre amaakewuọ Kris,

³itie anye akebaaha afiọñ ita. Sia ubaak mme Yuu emaekedioomo adinam anye idiọọk ñkpọ kpa ke ini anye akebooho isaña mmọọñ ika Siria, anye amaatịmme edem adisaña aboiyo ke Masidonia.

⁴Sopata, ayịn Bairos a-atooho Beria, Aristakus ye Sekundus, e-etooho Tesadonika, Keyọs awo Deebi, Timoti ñko ye Taikikọs ye Trofimus, mbio ikpeghe ukara Esia, emaekeene anye.

⁵Mbon ami emaebem iso ekebet ñnyịn ke Troas.

⁶Ado ñnyịn imaisio uwad ikpọñ Fidipai ke usọrọ Basofa amaakeboiyo, ndin ñnyịn imaisoobo ye ammọ usen ition amaakeboiyo ke Troas, itie a-ñnyịn ikibaahausen itiaba.

⁷Ke akpa usen udua, ñnyịn imaisoobo adibuuñ uyo. Bọọd amaatañ ikọ anọ mme awo, sia akenaaha anye akpọñ edem usen, anye amaaka iso atañ ikọ tutu ufọọd akoneyo.

⁸Mme utuenikañ emaewak ke ubeed anyọñ a-ñnyịn ikibonoke.

⁹Akparawa keed a-akekereke Yutikọs aketie ke windo, ndin akpọsọñ idab amaamʌm anye naña Bọọd asʌkkọ akaiso atañ ikọ akpeene; ndin anye amaato ke ayọhọ anyọñ ita adiana adiduọ ke isọñ, ado ke ini edikaaha ekebenne anye, anye amaakpakpa.

¹⁰Bọọd amaasoiyo aka isọñ, akeaduọ afʌk anye ke afara amọ ate: “Ndufo ikiiyak esịd ndufo atịmede, anye a-adu uwem!”

¹¹Bọọd amaadọọk anyọñ akebuuñ bred anyʌñ ata. Ke amaaketañ ikọ ye ammọ tutu usieere ayo, anye amaakpọñ ammọ anyọñ.

¹²Ammọ emaeben akparawa ado enyọñ ye uwem ke akwa inemesịd.

¹³Nnyịn imaito iso iwat ke nsʌñikañ, isio ika Asọs na ñnyịn ikiben Bọọd do ke nsʌñikañ. Anye akebo yak ñnyịn inam ntom sia anye akesaña ke ukod.

¹⁴Ndin anye amaakedisoobo ye ñnyịn ke Asọs, ñnyịn imaiben anye ke nsʌñikañ ika Mitidiin.

¹⁵Edem usen, imaiisio ado iwat ikiiwuọ nsak iso Kiọs. Edem usen, ñnyịn ikiwuọ Samos, usen keed amaakeboiyo, ñnyịn imaikiiwuọ Midetus.

¹⁶Bọọd amaabiere adiwat mboiyo Efisọs, mbaak adibiad ini ke ñkañ Esia, sia anye akebaaha itọk-itọk abo yak ise, me iyaikan ikiiwuọ Yerusedem ke usen Bentikọs.

¹⁷Ke Midetus, anye amaadọñ eka Efisọs ekekood mme etubom ufọkabasi inọ imọ.

¹⁸Ammọ emaekedi, anye amaabo ammọ ate: “Ndufo emediọọñọ tọọñọ ke akpa usen ami ntọọhọ ikpad ke Esia, naña ami ñkedʌñ uwem ye ndufo afịd-afịd ini.

¹⁹Mmaanam utom nnọ Abasi ke ata nsuukidem ye mmọọñayod, ke ufọọd ñkpoon idomo a-ketooho mme ndibbe edioomo ibak mme Yuu akeniehe ennọ miin.

²⁰Ndufo emediọọñọ ebo ke ñkebiaada ini adikwọrọ mbaña ñkpọ keed ake adodo a-adiinwam ndufo, ado ñki ikpeeb ndufo anwa-anwa ye ke ufọk ke ufọk.

²¹Mmekwọrọ nnọ mme Yuu ye mme Krik mbo yak ammọ ekappa esịd ekeene Abasi, enyʌñ enie mbuọdidem ke Abọọñ ñnyịn Yisọs.

²²“Idahami, ami mmedakka naña Sịbidịd andat usʌñ ñka Yerusedem, ndiọọñọke se idiitịppe innọ miin ke udo.

²³Ñkukweeñe se ndiọọñọ ado ke kwa abio, Adisana Sịbidịd andʌt utọñ abo ate ke ñkpakọb ye ukuud mmọ ena embet.

²⁴Ado mbatta uwem mmi ke baaba ñkpọ keed, ñkpekap ñkan mfeghe nduba mmi mma, ñnyʌñ nnam utom a-Abọọñ Yisọs a-nnọọhọ miin, utom aditie ntiense nnọ eti etop a-tooho ke mfọn Abasi.

²⁵“Idahami, ami mmediọọñọ ke ibaaha awo ke atu ndufo a-ñkesañake keed ñkwọrọ etob abio ubọọñ Abasi, adimaana iñkịt iso aba.

²⁶Ke ntodo, ami ibo ndufo mfịn ami ke ami uniehe ubiomikpe ke iyiib awo ndufo ba keed.

²⁷Sia ñkedaaha edem ke adikwọrọ mme uduak Abasi inọ ndufo.

²⁸Ikpeme idem ndufo ye afịd atu edọñ a-Adisana Sịbidịd inịmme ndufo nte mme andikpeme, ido mme akpemeedọñ ufọkabasi a-anye akedeppe ke iyiib amọ.

²⁹Mmediọọñọ mbo ke mmaakpọñ, mme ndiọi anawịt ekpe eyaedʌk ke atu ndufo, idiinyʌññọ itua atu edọñ mbọm.

³⁰Kpa ke atu ndufo, mme awo eyaedakka eda, etañ ukwañ-ukwañ ikọ na ekan edʌt ibed ekeene idem ammọ.

³¹Ikpeme ndin. Itoiyo ibo ke afịd isua ita a-ñkebaaha ye ndufo, ñkiitreke adidʌt afịd awo utọñ akoneyo ye uweeme ke mmọọñayọd.

³²“Idahami, mmiyaak ndufo nnọ Abasi ye ikọ mfọn amọ a-akemeke inọ ndufo adudu nsọñnda, anyʌñ inọ ndufo udeme ke atu mbon e-enamma esana.

³³Ñkesịnne anyen ke sịrifa me kood me afọñ awo ndomokeed.

³⁴Ndufo ke idem ndufo emediọọñọ ke ñkedat ubọk mmi ami ñnwana idem ñyem se iñkem ye se ikem mbon usaña ami.

³⁵Ke afịd ñkpọ a-ñkenamma, ñkiwọt ndufo mbo ke ato ke akpọsọñ utom ke ñnyịn inie adinwam mbio mmemidem ke aditoiyo ikọ Abọọñ Yisọs ke idem amọ a-akebooho ate: ‘afọnfọn adinọnọ akan adibọbọ.’ ”

³⁶Ndin ke Bọọd amaaketañ ntom ima, anye amaatọọñọ edọñ abọñ akam ye afịd ammọ.

³⁷Afịd ammọ emaetuagha, efat Bọọd enyʌñ etʌm anye inua.

³⁸Ammọ emaefʌghọ akpan-akpan ebaña ikọ a-anye aketañña abo ke ammọ idiikịtte iso imọ aba. Ndin ammọ emaedat anye isañ ekesuuk ke nsʌñikañ.