Read Ibibio Contemporary Bible 2020 Utom 21 Bible Online

Utom 21 - Ibibio Contemporary Bible 2020 bible

Utom 21

¹Ke ñnyịn imaikidiañña idem ñnyịn ikpọñ ammọ, ñnyịn imaikpọñ esʌk inyʌñ iwat nnen-nnen ika Kọs. Imaika Rodes edem usen, inyʌñ ito do ika Batada.

²Imaikịt nsʌñikañ nte aboiyo aka Fonisia, ndin ñnyịn imaidʌk do inyʌñ isio uwad.

³Ke ñnyịn imaikida ikịt Saiprọs, imaiwọññọ idʌk ufiin, ikpọñ anye inọ edem, iwat ika Siria. Ñnyịn imaibeghe ke Taya sia ke udo ke akena nte esịññe mbiomo ke nsʌñikañ ñnyịn.

⁴Imaikịt mme mbed do, imainyʌñ iba ye ammọ usen itiaba. Ato ke Sịbidịd ammọ emaedọkkọ Bọọd yak anye akuuka Yerusedem.

⁵Ado ke ini ñnyịn amaakekem, ñnyịn imainyọñọ inyʌñ ika iso ke usʌñ isañ ñnyịn. Afịd mme mbed, ibaan ammọ ñkọrọ nditọ ammọ emaesaña ye ñnyịn ewuọ ke abio, ndin ñnyịn imaitọọñọ edọñ do ke esʌk ibọñ akam.

⁶Ke imaikikọọm afịd awo tie sʌñ, ñnyịn imaikidʌk nsʌñikañ ndin ammọ emaetịmme enyọñ ufọk.

⁷Nnyịn imaikaiso ke isañ ñnyịn ito Taya inyʌñ idikibeghe ke Todemaisa a-ñnyịn ikikọọmmọ mme nditọete ke Abasi inyʌñ itie ye ammọ usen keed.

⁸Ke imaikinyọñ edem usen, ñnyịn imaikisịm Siseria inyʌñ iba ke ufọk Fidib andikwọrọ eti etop, keed ke atu awo itiaba ado.

⁹Anye amaanie nditọ ibaan inaañ e-emmiikidọiyọ ebe, e-ekesitañña brọfesi.

¹⁰Ke ñnyịn imaikiba do umiañ usen, brọfed keed a-akekereke Akabọs amaato Yudia adi.

¹¹Ke amaakesaña adi itie ñnyịn, anye amaaben ñkpagha isịn Bọọd abọp ubọk ye ukod amọ ke ñkpagha ado ate, “Adisana Sịbidịd abo ate, ‘Ntom ke mme Yuu ke Yerusedem ediibọp andinie ñkpaha ami, eyaenyʌñ eyaak anye enọ mme Yentaid.’ ”

¹²Ke ñnyịn imaikikop ñkpọ ami, ñnyịn ye mbon udo imaibeeñe Bọọd ite yak anye atịmme Yerusedem.

¹³Do ke Bọọd akebọọrọ abo, “Nsinam yak ndufo etua enyʌñ enam nọ esịd anduọ? Ami mmebeeñe idem, idooho na embọọb idʌk kpọd, ado ke adikpa ñko ke Yerusedem kebaña anyịñ Abọọñ Yisọs.”

¹⁴Ke ini ñnyịn miikikanna ikpəghọ anye esịd, ñnyịn imaisio idem ikpọñ ibo, “Yak uduak Abọọñ adat itie.”

¹⁵Ke ado amaakeboiyo, ñnyịn imaitʌm idem, inyʌñ idọọk ika Yerusedem.

¹⁶Usʌk ke atu mme ntiense aketooho Siseria emaesaña ye ñnyịn tọọñọ ke Siseria enyʌñ eben ñnyịn eka ufọk Mnasọn, itie a-akenaaha nte ñnyịn iba. Anye akedo awo Saiprọs ye keed ke atu mme akpa ntiense.

¹⁷Ke ñnyịn imaikidisịm Yerusedem, mme nditọete emaedaara adidi ñnyịn.

¹⁸Edem usen Bọọd ye ñnyịn imaika ikise Yemsi, ndin afịd mme nyobioawo etubom ufokabasi emaeba.

¹⁹Bọọd amaakọọm ammọ, anyʌñatañ ayọhọ-ayọhọ se Abasi akenam ke atu mme Yentaid ato ke iso utom amọ.

²⁰Ke ammọ emaekekop ami, ammọ emaetooro Abasi. Ndin ammọ emaebo Bọọd: “Ayịneka, afo amekịt adaña uwak tọsịn mme Yuu e-enịmme ke akpanikọ, ndin afịd ammọ enie ekamba udọñ kebaña ibed.

²¹Ado emaetañ enọ ammọ ete ke afo akpeeb afịd mme Yuu e-edʌññọ ke atu mme Yentaid ate yak ewọññọ ekpọñ ibed Moses, ate yak ammọ ekuunịm nditọ ammọ mboppo, ekuunyʌñ edu uwem ekeene eduuwem ñnyịn.

²²Nso-o ke ñnyịn idiinam? Ammọ, ke akpanikọ, eyaekop ke afo amedi.

²³Ndin, nam se ñnyịn udọkkọ fiin. Mme ideen inaañ mmọdo ye ñnyịn e-ekenamma akaaña.

²⁴Ben ideen ami, wuana ye ammọ ke usọrọ adinam idem asana nyʌñ kpe akʌk a-anaagha nte ammọ ekpe nọ ato do ammọ ekan efat ided ammọ. Ndin afịd awo eyaediọọñọ ke akpanikọ isịneke ke mme ikọ e-etañña udian fiin, ado ke afo ke idem mfo asʌk adu uwem ke nsuukiwuod anọ ibed.

²⁵Amaado mme Yentaid e-enịmme ke akpanikọ ñnyịn imaiwet se ñnyịn ikibọọrọ inọ esọk ammọ ite yak ammọ ediañña idem ekpọñ ndidia e-ekewaaha enọ ndem, ekpọñ iyiib, ekpọñ unam e-eyịtteyịt ewot, enyʌñ ekpọñ use.”

²⁶Edem usen, Bọọd amaaben ideen ado anyʌñ adiana ye ammọ anam idem amọ asana. Ndin anye amaaka tembịd adinọ ntọd mbaña usen ye ini adinam idem ammọ asana aditre nọ enam uwa enọ ammọ keed-e-keed.

²⁷Ke ini akeyakka usen ifañ usen itiaba ado adikweeñe, usʌk mme Yuu e-eketooho ikpeghe Esia emaekịt Bọọd ke tembịd. Ammọ emaenam afịd atu awo esịn ntịme ndin emʌm Bọọd,

²⁸ndin esio emaesio ñkpo ete, “Mbon Isred ñnyin, inwam ñnyịn! Awo ami ado andikpeeb mme awo ke afịd itie se miidooho ke ufọn mbon ñnyịn ye ibed ñnyịn, ye itie ami. Ndin ke akanna ado, anye amaaben mbon Krik aka ñkañ tembịd anyʌñ asappa adisana itie ami.”

²⁹(Ammọ emaedadak ekịt Trofimus a-aketooho Efisọs ye Bọọd ke abio ndin ekere ke Bọọd akeben anye adi itie tembịd.)

³⁰Ntịme amadʌk afịd abio, mme awo emaefeeñe eto nsio-nsio itie edi. Emaemʌm Bọọd, edʌt anye esio ke tembịd; ini keed ini keed emaebet mme inuaatob.

³¹Ke ini ammọ enwanake adiwot anye, etop amaakewuọ adaiso ekọñ Rum ebo ke abio Yerusedem akeaba ke ata ntịme.

³²Idaha-idaha ado, adaiso ekọñ amaadat mbon ekọñ amaakoono mme ikpọawo ekọñ ye ñkaña efeeñe edọñọ atu awo. Ke mme yuu emaekekịt adaiso ekọñ ye mbon ekọñ, ammọ emaetre aditịm Bọọd.

³³Adaiso ekọñ amaasaña adi, anyʌñ amʌm Bọọd anọ uyo ate ebọp anye ke ñkprọñ iba. Ndin anye amaabịp me Bọọd ado anie, nko me nso-o ke anye akenam.

³⁴Usʌk ke atu awo ekebọọñ ñkpọ uyo keed, usʌk ekebọọñ ñkpọ uyo ñnwen, ndin sia etubom ekọñ miikikanna ibọ akpanikọ ato ke ntak akpọsọñ uyom, anye amaanọ uyo ate eben Bọọd ekesịn ke badịk ekọñ.

³⁵Ke Bọọd amaakesịm udodukod, afai ke atu awo amaakpon eti-eti tutu akena mbon ekọñ ededịppe anye.

³⁶Atu awo se ikikeene emaeka iso ebọọñ, “Iben anye isio!”

³⁷Ndin ke ini mbon ekọñ ekeyemme adiben Bọọd ndʌk ñka badịk ekọñ, anye amaabịp adaiso ekọñ ate, “Ayaayak ntañ ikọ unọ?” Anye amaabọọrọ, “Afo amesem usem Krik?

³⁸Idooho afo ado awo Iyịpt a-aketọọñọke anwan ye ukara anyʌñ akoono mbon afai tọsịn inaañ aka akpautatan ini keed ko?”

³⁹Bọọd amaabọọrọ ate, “Ami ndo Yuu. Nto Tasọs ke Sidisia, amanaisọñ ata ñwuọnda idʌñ. Mbọk yak ntañ ikọ nnọ atu awo.”

⁴⁰Ke amaakebọ adudu ato adaiso ekọñ, Bọọd amaada ke udodukod anam idiọọñọ ke ubọk anọ atu awo. Ke afịd awo emaekedop uyo, anye amaatañ anọ ammọ ke usem Arameik: