Read Ibibio Contemporary Bible 2020 Utom 25 Bible Online

Utom 25 - Ibibio Contemporary Bible 2020 bible

Utom 25

¹Usen ita amaakeboiyo ke Festus adiikiwuọ ikpeghe ukara ado, anye amaato, akeka Yerusedem,

²ndin mme ikpọ aku ye mme etubom mme Yuu emaeben ikpe Bọọd ekeenịm anye ke iso.

³Ammọ emaekpeiye Festus ebo yak inọ mmimmọ mfọn, anọ Bọọd adi Yerusedem, sia ammọ emaebeeñe idem adidịbbe ke usʌñ ñwot anye.

⁴Ado Festus amaabọọrọ, “E-emọmʌm Bọọd enịm ke Siseria, ñko ami ke idem mmi ñnyaasọp ñka do.

⁵Yak ubaak ikpọawo ndufo eñkeene eka, enyʌñ ekekpe ikpe ye anye do adieke anye adueehe.”

⁶Ke Festus amaakeba do ye ammọ ke ñkpọ nte usen itiaita me usen duob, anye amaadika Siseria. Edem usen anye amaakood esob anyʌñ anọ uyo abo eben Bọọd edi ke iso imọ.

⁷Ke Bọọd amaakediwuọ esob, mme Yuu e-eketooho Yerusedem edi emaeda ekanna anye ekʌk ammọ, emaetaañ uwak ndiọi ikọ ado iwọt ke ado akpanikọ ammọ mmiikikanna isọọñọ edot anye.

⁸Akekem Bọọd adifaaña idem amọ abo ate: “Ami ndueeghe ñkpọ mbaña ibed mme Yuu me ake tembịd me ake Sisa.”

⁹Ado Festus, a-akeduaka adinam mme Yuu ufọn amaabo Bọọd, “Nte afo amebeeñe idem adika Yerusedem ñkeda ikpe ke iso mmi kebaña mme ikọ u-udoto fiin mi?”

¹⁰Bọọd amaabọọrọ, “Ami nda ke iso esob Sisa a-akpenaagha akpe ikpe mmi. Ami ndueeghe mme Yuu ndomokeed, nte afo atʌmmọ adiọọñọ.

¹¹Ado adieke ndueehe ñkpọ a-adotto ñkpa, nsịnne adikpa, ado akpedo uyo a-mme Yuu endotto idooho akpanikọ, awo ndomokeed inieehe unen adiñkappa miin nnọ ammọ. Mmebon ikpe mmi ke ntʌmmọ Sisa!”

¹²Festus amaakedioomo ye mbon esob amọ ima anye amaabo, “Afo amenọ ebeeñe mfo esọk Sisa, iso Sisa ke afo uduuka!”

¹³Mme usen ifañ akeboiyo, Adidem Akripa ye Benis emaekewuọ Siseria adika ikọọm Festus.

¹⁴Sia ammọ emaekeba ke Siseria uwak usen, Festus amaaben mfịna Bọọd aneme anọ adidem abo ate, “Aba awo mi a-Fediks akekpọññọ ke ñkpakọb.

¹⁵Ke ini ñkekaaha Yerusedem, mme ikpọ aku ye mme etubom mme Yuu emaeben anye edi esob enyʌñ ebo na ebiere ikpe ñkpa enọ anye.

¹⁶“Ado ami mmaadọkkọ ammọ mbo ke ibed eduuwem Rum iyakka ebiom awo ikpe ke ini awo mmiinọọhọ anye ufañ nọ anye akañ idem amọ ke iso mbon e-edotto anye ikọ.

¹⁷Ammọ emaekedi mi, ami ñkebiaada ini, mmaakood esob ke edem usen, mbo eben Bọọd edi.

¹⁸Ado mbon e-ekekoodo anye ikpe ekedakka eda aditañ ikọ, itañña ibaña idiọọk ñkpọ ntekeed a-ami ñkekereke mbaña.

¹⁹Utu ke ado, utọk ammọ ye anye akebaña edu ukpono Abasi, ye awo e-ekoodo Yisọs, a-amaakekpa, a-Bọọd asʌkkọ abo ke mmọdo ke uwem.

²⁰Sia ndiikikanna nduuñọ utọ ñkpọ ami, ami mmaabo me anye anyịmme adika Yerusedem nọ ekekpe ikpe amọ kebaña mme ikọ e-etañña edot anye.

²¹Ado Bọọd amaabeeñe ate yak eben ikpe imọ esọk Sisa, ndin ami mmaanọ uyo nte emʌm anye enịm tutu ñkan nnọ anye esọk Sisa.”

²²Festus aketañ ami ama, Adidem Akripa amaabo anye, “Ami ke idem mmi ñkpaama adikop nto Bọọd.” Ndin Festus amaabọọrọ anye ate, “Ayaakop ato anye ñkpọñ.”

²³Edem usen, Akripa ye Benis emaedi uko-uko, edʌk ufọk ukob ikpe, esaña ye mme ikpọ awuọiso mbon ekọñ ye mme awuọiso mbon kọnsịn ke abio. Festus amaanọ uyo ate eben Bọọd edʌk edi.

²⁴Ndin Festus amaabo: “Adidem Akripa ye afịd awo se iba mfịn ami ye ñnyịn, emekịt awo ami! Afịd idịd mme Yuu enam ebeeñe ebaña anye ennọ ke Yerusedem ye mi ke Siseria, enyʌñ ọñkpo ete ke ikpinaaha anye aba ke uwem aba.

²⁵Ado ami ke idem mmi mmeyʌkkọ ke anye inamma ñkpọ ndomokeed adotto ñkpa, ado sia anye ke idem amọ amaakebeeñe abo Sisa akpe ikpe imọ, mmaabiere adinọ anye aka Rum.

²⁶Ado ami nnieeghe ata akpan ñkpọ adiwet nnọ Adidem mbaña anye. Ke ntodo, ami mmeben anye ndi ke iso afịd ndufo, akpan-akpan iso mfo, Adidem Akripa, nọ ato ke utịd nduuñọ ami, ami nnie ñkpọ se ñwet.

²⁷Sia ami ñkere ke ufọn ibaaha adinọ awo ñkpakọb aka Rum ke ini awo mmiitʌmmọ itañ se ndiọiñkpọ anye anam.”