Read Ibibio Contemporary Bible 2020 Utom 28 Bible Online

Utom 28 - Ibibio Contemporary Bible 2020 bible

Utom 28

¹Ke imaikisịm unaisọñ ke ifuuro, do ke ikididiọọñọ ibo ke isu-mmọọñ ado akekere Mọdta.

²Mme anie isọñ idʌñ ado emaenekke efọn ido ye ñnyịn. Ke ntak atueb ye edịm akedeppe, ammọ emaidaara ñnyịn ke adibara ikañ.

³Bọọd amaatañña abek ifia na abara ikañ, ndin anye akesịn ikañ, idiọọk udʌkikọd amaawuọ awaña ke ubọk amọ, ato ufiob ikañ.

⁴Mme anie idʌñ ado ekekịt nte udʌkikọd ami awaña ke ubọk Bọọd, ammọ emaebo keed aken, “Awo ami ado awodawo; akpesʌk ado anye amaakebọkkọ ke inyañ, ndem usieene idiọọk ñkpọ idiiyakka anye adu uwem.”

⁵Ado Bọọd amaasịppe udʌkikọd ado asịn ke ikañ, ñkpọ inamma anye.

⁶Mbon awo ado ekekere ke anye ayaayọọk mmiiduọhọduọ ini keed ikpa, ado akekpeene nọ ammọ mmiikịtte nte ñkpọ anam anye, ammọ emaekpəghọ akikere ebo ke anye ado abasi.

⁷Amaaba akwere a-mmiikiinyọọñọ usʌñ, a-Bobrus, ekamba andikara abio ado, akenieehe. Anye amaidaara ñnyịn anyʌñ inọ ñnyịn ndidia ye itie nna usen ita nte isenawo ke ufọk amọ.

⁸Ndin idem ikisọññọ ete amọ, ufiobidem ye utọrọ iyiib akenam anye anaana ke akwañ. Bọọd amaakese anye, akebọñ akam ama, adod anye ubọk anyʌñ akọk anye udọñọ.

⁹Ami akekweeñe, mbon mfen e-ekedọñọke ke idʌñ ado emaewuọñọ edibọ ukọk.

¹⁰Ami amaanam ammọ ikpono ñnyịn ke umiañ usʌñ, inọ ñnyịn mme ñkpọ se ikiyem ke ini ikibooho ikpọñ ammọ.

¹¹Ke afiọñ ita amaakeboiyo, ñnyịn imaikpọñ ke nsʌñikañ a-akedidianna abet ekarika akweeñe ke isu-mmọọñ ado. Nsʌñikañ ami aketo Adeksandra, a-akenieeghe iso mme amanamba abasi ekoodo Kastọ ye Boduks.

¹²Ñnyịn imaiwuọ Sirakus, itie do usen ita.

¹³Tọọñọ do, imaisio uwad ikiwuọ abio Rekium. Edem usen, afịm usuuk amaatọọñọ adifịme, ndin ke ayọhọ usen iba imaikiwuọ Butiodi.

¹⁴Ke udo ke ñnyịn ikisoobo ye ikọd Abasi e-ekikoodo ñnyịn ebo yak idiba ye ammọ udua keed. Ndin ñnyịn imaikiwuọ Rum.

¹⁵Ke mme ikọd Abasi ke Rum emaekekop ke ñnyịn isʌk idi, ammọ emaenam isañ tutu ekewuọ Afe Mbono Abios ye Tafen ita nọ edisoobo ye ñnyịn. Bọọd amaakọọm Abasi, ukod anyʌñ asọọñ anye ke adikịt ibon ami do.

¹⁶Ñnyịn ikikisịm Rum emaeyịmme Bọọd adʌñ ke idem amọ ikpọọñ, ado emaenọ awo ekọñ akpeme anye.

¹⁷Usen ita amaakeboiyo, Bọọd amaakood mbono mme adaiso mme Yuu. Ammọ emaekediboho, Bọọd amaabo ammọ ate: “Nditọete mmi, akpesʌk ado ami mmiidueehe mbon ñnyịn me ibed mme ete-ete ñnyịn, emaemmʌm miin ke Yerusedem enyʌñ eñkappa enọ mbon Rum.

¹⁸Ammọ emaenduuñọ miin enyʌñ eyem adinsaana ñyaak, sia ñkiidueehe ibed ntekeed a-adotto ñkpa.

¹⁹Ado ke ini mme Yuu ekefaañake, akena ami mben ikpe mmi ñka iso Sisa, idooho nte ñkenie ikọ se ndot mbio ñnyịn.

²⁰Ke ntak ami ke ami ñkeyem adisoobo ñnyʌñ nneme nneme ye ndufo. Sia ato ntak idodanyen Isred ke embọp miin ke ñkprọñ ami.”

²¹Ammọ emaebọọrọ, “Ñnyịn ibọọhọ deta ntekeed u-ubañake fiin ito Yudia, inyʌññọ iba awo ndomokeed ke atu mme ikọd Abasi a-atooho udo adi adinọ etop me atañ idiọọk ñkpọ ubaña fiin.

²²Ado ñnyịn imiyem adikop akikere mfo, sia ñnyịn imidiọọñọ ke mme awo ke afịd itie etaañ ikọ edot atu mme akpono Abasi ami.”

²³Ndin ammọ emaedot usen enyʌñ ebeeñe idem adisoobo ye Bọọd, enyʌñ esaña ye ata umiañ awo eka itie anye akedʌññọ. Tọọñọ ke ubakusen tutu ndubi, Bọọd amaanam anwaña ammọ, akwọrọ abio ubọọñ Abasi anwa-anwa anọ ammọ, anwana adinam ammọ ekịt ye anye ufọn adinịm Yisọs ke akpanikọ atooho ke Ibed Moses ye ake mme Brọfed.

²⁴Ubaak awo emaenịm ikọ amọ ke akpanikọ, ado ubaak ikinịmme.

²⁵Ke ntodo ammọ emaefaaña ke atu idem ammọ enyʌñ etọọñọ adinyọñọ ke Bọọd amaaketañ akpatre ikọ ami: “Adisana Sịbidịd aketañ akpanikọ anọ mme eteete ndufo ato ke brọfed Aisaya abo ate:

²⁶“ ‘Kaa ke tañ nọ mbon awo ami, “Ndufo eyaekop, ado ñkpọ idiiñwañake, ndufo eyaese ado idiikịtte.”

²⁷Sia esịd ibon ami asọñ; ammọ ikoppo ñkpọ ke utọñ ammọ, nkọ enyʌñ ebọp anyen ammọ. Mmiidooho ntodo anyen ammọ ekpaekịt ñkpọ, utọñ ammọ enyʌñ ekop ñkpọ, ñkpọ anyʌñ añwaña ammọ, ndin ammọ ekappa esịd, etịmme edi, ndin ami ñkpaakọk ammọ udọñọ.’

²⁸“Do ndin, ami ñyem ndufo ediọọñọ ebo ke enọ adinyaaña Abasi ami esọk mme Yentaid, ndin ammọ eyaekpañ utọñ.”

²⁹Anye amaaketañ mme ikọ ami ama, mme Yuu emaedaaña enyọñọ, esʌk efaaña mbiak-mbiak ke idem ammọ.

³⁰Bọọd amaadʌñ do ke ufọk a-anye akekpeehe ke idem amọ ke afịd isua iba anyʌñ adaara afịd awo se ikiidi idiise anye.

³¹Anye amaakwọrọ abio ubọọñ Abasi anyʌñ akpeeb mme awo abaña Abọọñ Yisọs Krais uko-uko, awo ndomokeed ikidomoke adikpan anye.