Read Ibibio Contemporary Bible 2020 Utom 6 Bible Online

Utom 6 - Ibibio Contemporary Bible 2020 bible

Utom 6

¹Ke mme usen ado, nte ibad mme andikeene Krais akesʌkkọ atọt, mme Yuu e-ekesemme usem Krik emaesuuk mme Yuu ukañ Ibru uyo ke ntak ammọ mmiikiseeghe ibaña mme ebekpa ammọ ke ini edeemeke ndidia kwa usen.

²Ndin mbed duob ye iba emaesoobo atọ keed ye mbon andikeene Krais enyʌñ ebo ete, “Ikpifọnnọ ñnyịn adikpọñ utom usuan etob Abasi ñkappa ñkenedeeme ndidia.

³Nditọete, imek awo itiaba ke atu ndufo, e-eyọhọke ye Adisana Sịbidịd ye ifiọk. Ñnyịn iyaiyaak utom ami isịn ammọ ke ubọk,

⁴ndin ñnyịn iyaikan itʌm ise akpan utom adibọñ akam ye adikwọrọ ikọ Abasi.”

⁵Akikere ami amaanem afịd awo se ikiboho ami esịd. Ammọ emaemek Stifịn, a-akeyọhọke ye mbuọdidem ye Adisana Sịbidịd; ñko ye Fidib, Brokorus, Nikanọ, Timọn, Bamenas ye Nikodas awo Yentaid Antiọk, a-akekappake esịd akpọñ ukpono Abasi ke ido Yuu.

⁶Emaeben ammọ ewọt mme abọsịd e-ekebọññọ akam enyʌñ edot ammọ ubọk.

⁷Ndin ikọ Abasi amaaka iso asuana. Ibad mme andinịm ke akpanikọ ke Yerusedem amaatọt eti-eti, uwak mme aku Abasi enyʌñ esuuk iwuod enọ akpanikọ.

⁸Ndin Stifịn, a-akeyọhọke ye mfọn ye adudu Abasi amaanañña ikpọ utịbe ñkpọ ye utom idiọọñọ ke ufọọd atu awo.

⁹Mfịna ye utọk amaatọọñọ, eto mbon Sinakọk Ubọkkọ (naña ekekood itie ado adodo), e-ekedoññoke mme Yuu ake Sirin ye Adeksandra, ñkọrọ mbon Sidisia ye Esia, emaedaaña eda etọọñọ mfaaña ye Stifịn.

¹⁰Ado ammọ ikikanna anye ke ifiọk a-Sịbidịd akenọọhọ anye idaaha anye atañña ikọ.

¹¹Ammọ emaedọọñ mme awo ke ndịbbe, etemme ammọ aditañ mbo ntom, “Ñnyịn imikop naña Stifịn asappa Moses ye Abasi.”

¹²Ndin ammọ emaesịn nsọk, enam esịd abịmme mbon abio, mme etubom, ye mme akpeeb ibed. Ammọ emaekpappa Stifịn enyʌñ edat anye edi esob Sanhidrin mme Yuu.

¹³Emaesio mme atie ntiense nsu e-ekebooho ete, “Akenam awo ami itreke aditañ idiọọk ikọ ndian adisana itie ami ye ibed Moses.

¹⁴Sia ñnyịn imaikop nte anye abo ke Yisọs ayịn Nasared ayaabiad itie ami anyʌñ akpəgho mme ido a-Moses akinọọhọ ate ñnyịn inịm.”

¹⁵Afịd awo e-eketieeghe ke esob Sanhidrin emaewuuk anyen ese Stifịn, ammọ emaenyʌñ ekịt iso amọ naña abiod iso enyere.