Read Ibibio Contemporary Bible 2020 Utom 7 Bible Online

Utom 7 - Ibibio Contemporary Bible 2020 bible

Utom 7

¹Ndin akwa aku amaabịp Stifịn abo, “Se etañ ami udian fiin ado akpanikọ?”

²Anye amaabọọrọ: “Nditọeka ye mme ete, ikpañ utọñ innọ! Ubọọñ Abasi amaayaara anọ ete ñnyịn Ebraham, idem ke ini anye akesʌkkọ aba ke Mesopotemia, mbemiso anye akedʌñ ke Haran.

³Abasi amaabo anye ate, ‘Kpọñ idʌñ mfo ye mbon mfo, nyʌñ kaa ke isọñ a-nduuwọt fiin.’

⁴“Ndin anye amaakpọñ isọñ Kaadian aka akedʌñ ke Haran. Ke ete amọ amaakekpa, Abasi amaanọ anye aka abio a-ndufo edʌññọ mfịn ami.

⁵Abasi ikinọọhọ udeme amọ do, ukpọk etək itie isọñ anyọọñọ ke ikpat keed. Ado Abasi amaanwọñọ abo ke anye ye ubon amọ eyaedat isọñ ado enie, akpesʌk ado Ebraham mmiikinieeghe ayịn idahado.

⁶Abasi aketañ ikọ anọ anye abo: ‘Ubon mfo adido asen ke idʌñ ake midooho ake ammọ, eyaesịn ammọ ifʌn, enyʌñ etʌkkọ ammọ ke isua ikie inaañ.

⁷Ado ami ñyaanọ idʌñ ado ammọ edọñọke ifʌn enọ ufen.’ Abasi amaabo, ‘Ke ado amaaboiyo, ammọ eyaewuọọñọ ke abio ado enyʌñ ediñkpono miin ke itie ami.’

⁸Ndin anye amaanọ Ebraham edioomo unịm mboppo. Akeama Ebraham amaabon Aisik, anyʌñ anịm anye mboppo ke ayọhọ usen itiaita. Aisik amaanyʌñ adibon Yekọb, Yekọb anyʌñ adikappa ado ete anọ mme nsọbom ñnyịn duob ye iba.

⁹“Sia mme nsọbom ami ekefịbeke Yosef ufịb, ammọ emaenyam anye nte ifʌn enọ Iyịpt. Ado Abasi amaaba ye anye,

¹⁰anyʌñ anyaaña anye asio ke afịd mfịna amọ. Abasi anọ Yosef ifiọk anyʌñ anam anye akịt mfọn ke iso Fero, adidem Iyịpt. Ndin Fero amaanam anye ado andikara Iyịpt ye afịd ufọk amọ.

¹¹“Akem akañ adidʌk afịd isọñ Iyịpt ye Kenan, adat ekamba ukuud adi, ndin mme eteete ñnyịn ikịtte ndidia.

¹²Yekọb akekop ke abakpa amaaba ke Iyịpt, anye amaasio mme eteete ñnyịn adọñ ke akpa ini.

¹³Ke etịmmeke eka, Yosef akeyaara idem amọ anọ nditọete amọ, ndin Fero amaadidiọọñọ ñkpọ abaña ubon Yosef.

¹⁴Ke ami aboiyoke, Yosef amaadọñ ate ekekoono ete amọ Yekọb ye afịd ufọk amọ e-ekedooho awo ata ye duob ye ition edi.

¹⁵Do ndin Yekọb amaaben isañ aka Iyịpt. Do ke anye ye mme eteete ñnyịn ekekpañña.

¹⁶Emaekoono akpo ammọ etịmme edi Sekem edibuuk ke udi Ebraham akedeppe ato nditọ Hamọ ke ekọmudua.

¹⁷“Ke ini a-Abasi akenwọñọke anọ Ebraham adikpereke, ibad nditọ ñnyịn ke Iyịpt emaetọt eti-eti.

¹⁸Ndin adidem mfen a-ammiikidiọọñọke Yosef adikara Iyịpt.

¹⁹Anye akedu uwem ñkara-ñkara ye ikọd ñnyịn anyʌñ atʌkkọ mme eteete ñnyịn, anam ammọ etoomo mme ufa nsek nditọ e-ekemanake eduọọñọ nọ ekekpañña.

²⁰“Ke ini ado ke Moses akemana, ado anye ikidooho ñkaña ayịn. Ete ye eka amọ ekebọọk anye ke ufọk ammọ ke ñkpọ nte afiọñ ita.

²¹Emaekesio anye enịm ke anwaesiin, adiaha Fero amaaben anye abọọk, akama anye nte ayịn amọ.

²²Moses amaabọ ukpeebñkpọ ke afịd usʌñ ifiọk nditọ Iyịpt, anyʌñ akappa ado akpọsọñ awo ke ikọ inua ye edu unam ñkpọ.

²³“Moses amaakeyọhọ isua aba ke emana, anye abiire adika ñkese nditọete amọ, nditọ Isred.

²⁴Anye akekịt naña ayịn Iyịpt keed afịna ayịn ammọ keed uwem, anye aka inyaaña anye, ndin awot ayịn Iyịpt ke usieene anọ awo ammọ e-ekefịnake.

²⁵Moses akekere abo ke mbon mmimọ eyaediọọñọ ke Abasi abiidat imọ inyaaña ammọ, ado ammọ ikidiọọñọke ntodo.

²⁶Edem usen, Moses akekịt nditọ Isred iba naña enwana anwan. Anye amaanwana adisịn emem nnọ ammọ ke adibo: ‘Ukañ ñnyịn, ndufo edo nditọeka: ntaha eyemme inam emọ-emọ idiọọk ñkpọ-ọ?’

²⁷“Ado andikisịn mfịna ye awo anye ako amaanək Moses asio, abo anye, ‘Anie akunam fiin andikara ye abiireikpe inọ ñnyịn?

²⁸Ayem iñwot miin naña akewot ayịn Iyịpt ñkpọñ a-akeboiyoke?’

²⁹Moses akekop ami, anye amaafeghe akedʌñ ke Midian nte asenawo anyʌñ abon nditọ iba do.

³⁰“Isua aba amaakeboiyo, enyere Abasi amaawuọ ada ke edeme ikañ a-aketaaha ikọd akpautatan a-akekpereke Abod Sainai, awọt Moses idem.

³¹Anye akekịt ami, idem amaakpa anye, ndin anye akesaña akpere adikinekke nse utọ ñkpọ ami, anye amaakop uyo Abọọñ naña abo:

³²‘Ami ndo Abasi mme usọ, Abasi Ebraham, Aisik ye Yekọb.’ Idem amaanyeñ Moses, uteñe amaamʌm anye, anye ideiye-de ise aba.

³³“Akem Abọọñ abo anye ate, ‘Siooño ikpaukod mfo ke ukod, sia itie a-afo adaha do ado adisana itie.

³⁴Ke akpanikọ, ami mmekịt naña efʌnnọ ikọd mmi ke Iyịpt. Mmekop ñkuun ammọ, anam mmedi adisio ammọ ke ukuud. Di idahami, ñyaudọñ fiin atịmme aka Iyịpt.’

³⁵“Kpa Moses ammọ ekesịnne ado ado, etañ ebo, ‘Anie akunam fiin andikara ye abiireikpe inọ ñnyịn?’ Kpa Moses ado ke Abasi akedọñ enyere ado a-akewọttọ anye idem ke ikọd ado ate anye akedo andikara ye Andinyaaña nditọ Isred.

³⁶Anye amaadat ammọ awuọ ke isọñ Iyịpt anyʌñ anañña mme utịbe utom ye utom idiọọñọ ke Iyịpt, ke Idoduod Inyañ ye akpautatan ke isua aba.

³⁷“Anye ado kpa Moses ado a-akebooho nditọ Isred, ‘Abasi ayaasio brọfed a-adiiba nte ami awuọ ke ubon ndufo inọ ndufo.’

³⁸Anye akeba ke mbono ke akpautatan ye enyere a-akenemeke nneme ye anye ke Abod Sainai, ye mme eteete ñnyịn, anyʌñ abọ aduuwem ikọ isọk ñnyịn.

³⁹“Ado mme eteete ñnyịn ikikoppo uyo ammọ. Utu ke do, ammọ emaesịn anye, ndin ke esịd ammọ, emaetịmme eka Iyịpt.

⁴⁰Ammọ emaebo Erọn, ‘Bot mme abasi mfen e-ediidat ñnyịn usʌñ. Amaado awo ami, Moses, a-akidatta ñnyịn usʌñ awuọ ke Iyịpt, ñnyịn idiọọñọke se itịppe inọ anye!’

⁴¹Ini ado ke ammọ ekenam ubobod ñkpọ ke mbid ñnyịn enañ. Ammọ emaewa uwa enọ anye, enyʌñ enam usọrọ adidat ñkpono se ubọk ammọ akebot.

⁴²Ado Abọọñ amaawọññọ iso akpọñ ammọ anyʌñ anam ammọ ekappa ekpono utịn, afiọñ ye mme ntantaafiọñ, nte Abasi ammọ. Ami asaña akekem ke se ekewet ke ñwed mme brọfed ebo: “ ‘Ufọk Isred, ndufo emaekoono mme ñkpọ uwa ye enọ ensọk miin ke isua aba ke akpautatan?

⁴³Ndufo emedịppe atayad Mọdek ye ntantaafiọñ abasi ndufo Refan, ye mme ñkpọ a-ndufo ekebotto ebon adikpono. Ndin ami ñyaibịne ndufo nsịññe ke abio tutu ndufo esuana ebọhọ Babidọn.’

⁴⁴“Mme eteete ñnyịn emaenie atayad ibed enwọñọ Moses ke ini ammọ ekebaaha ke akpautatan. Ekebọp anye naña Abasi aketemme Moses akeene mbid se anye akekịt.

⁴⁵Atayad ami amaaka iso aboiyo ke ubọk mme eteete ñnyịn tutu Yosua akeben anye adʌk isọñ mme idịd a-Abasi akebịneke asiooñọ ke iso ammọ. Do ke atayad ado akeba tutu asịm ukara Defid,

⁴⁶a-akekịtte mfọn Abasi anyʌñ abeeñe Abasi abo ayak nọ imọ ibọp itieidʌñ inọ anye Abasi Yekọb.

⁴⁷Ado Sọdọmọn akekappa abọp ufọk ado anọ Abasi.

⁴⁸“Ado, Abasi Andikoñ Ñkan idʌññọ ke ufọk ubọkawo abọppọ. Nte brọfed abooho:

⁴⁹“ ‘Abio Ubọọñ Abasi ado ebekpo mmi, isọñ anyʌñ ado itie udodukod mmi. Nso-o utọ ufọk ke uduubọp unnọ miin? Abọọñ abo. Itie uduọk udu mmi adiiba ke mmọ-ọ?

⁵⁰Idooho ubọk mmi akenañña afịd mme ñkpọ ami?’

⁵¹“Ndufo mbon nsọñiwuod! Esịd ye utọñ ndufo asʌk adodoro ufiọn. Ndufo eba nte mme eteete ndufo: Esʌk enwanwana ye Adisana Sịbidịd afịd ini!

⁵²Ake-e brọfed ke mme eteete ndufo mmiikikọbọke? Ammọ ekekap ewot mbon e-ekeyaarake adidi Adinen Ayịn Awo. Idahami, ndufo emetap anye enyʌñ ewot anye,

⁵³ndufo e-ekebọọhọ ibed ami eto mme enyere, ekap edo mbon a-ammiinamma se ibed abo enam.”

⁵⁴Mbon esob Sanhidrin ekekop ami, ammọ emaekop akpọsọñ ifiobesịd enyʌñ ekwaaha ntak eded ese anye.

⁵⁵Ado Stifịn, a-akeyọhọke ye Adisana Sịbidịd, amaawuuk anyen ase anyọñ anyʌñ akịt ubọọñ Abasi, ye naña Yisọs ada ke ubọkudom Abasi.

⁵⁶Anye amaabo ate, “Se, mmekịt naña anyọñ abeere ye naña Ayịn Awo ada ke ubọkudom Abasi.”

⁵⁷Ke ammọ ekoppo ikọ ami, ammọ emaesiid utọñ, ebọọñ ñkpo, enyʌñ ebịmme ebịne anye emʌm,

⁵⁸edʌt anye esio ke abio, enyʌñ etọọñọ aditọọñ anye ke itiad. Ndin mme ntiense emaebon afọñ ammọ ke iso akparawa keed a-akekereke Sọọd.

⁵⁹Ke idaha ammọ esʌkkọ etọọñ anye ke itiad, Stifịn amaabọñ akam abo ate, “Abọọñ Yisọs, dat sịbidịd mmi.”

⁶⁰Ndin anye amaatọọñọ edọñ anyʌñ abọñ ke akpọsọñ uyo, “Abọọñ, kuudat idiọọkñkpọ ami udot ammọ ke iwuod.” Aketañ ami ama, anye amaakpa.