Read Ibibio Contemporary Bible 2020 Utom 9 Bible Online

Utom 9 - Ibibio Contemporary Bible 2020 bible

Utom 9

¹Ado Sọọd akesʌk akaaka iso ke adikọbọ ye adidịkke mme mbed Abọọñ uwem. Anye amaadakka abịne akwa aku

²akebo yak anye inọ imọ ñwed iben ika mme Sinakọk ke Damaskọs nọ ato do adieke ikịtte awo ake adodo a-asañake ke usʌñ Krais, ideen me ibaan, imọ ikoono ammọ nte mbon ñkpakọb inyọñ idi Yerusedem.

³Ke anye amaakesaña adikpere Damaskọs, unwana ikañ amaato anyọñ idahado-idahado ayamma akanna anye.

⁴Anye amaaduọ ke isọñ, anyʌñ akop uyo naña abo anye ate: “Sọọd, Sọọd, ntak afo añkọbọke miin-e?”

⁵Sọọd amaabịp abo, “Afo ado anie, Abọọñ?” Abọọñ amaabọọrọ, “Ami ndo Yisọs a-afo akọbọke.

⁶Dakka da, nyʌñ saña dʌk esịd abio, ndin eyautemme se anie adinam.”

⁷Mbon se ikisaña ye Sọọd ikikanna uyo isio; ammọ emaekop uyo, ado ikikịtte awo ndomokeed.

⁸Sọọd amaadakka ada ke isọñ, ado ke anye amaaketaad anyen, ikikanna ikịt ñkpọ ndomokeed aba. Ke ntodo, emaemʌm anye ubọk eben eka Damaskọs.

⁹Anye amaatie usen ita ikịtte ñkpọ, idiaaha ñkpọ, inyʌññọ inwọñ ñkpọ.

¹⁰Ndin mbed keed amaaba ke Damaskọs a-akekereke Ananayas. Abọọñ amaatañ ikọ anọ anye ke ñkukịd ate, “Ananayas!” Anye amaabọọrọ ate, “Ih, Abọọñ se miin mi.”

¹¹Abọọñ amaabo anye, “Dakka da nyʌñ ka efaak ekoodo Stred ke ufọk Yudas, nyʌñ bịp baña Sọọd a-atooho Tasọs, sia anye asʌk abọñ akam.

¹²Anye akịt ke ñkukịd nte awo a-akekereke Ananayas adidot anye ubọk nọ anye atịmme amọọnọ ñkpọ.”

¹³Do ke Ananayas akebọọrọ abo ate, “Abọọñ, ami mmekop uwak mbʌk nto umiañ awo abañake awo ami, ye umiañ ndiọiñkpọ a-anye anamma ndisana awo mfo ke Yerusedem.

¹⁴Ndin anye adi mi ye adudu ato mme ikpọ aku nọ amʌm afịd mbon e-ekoodo anyịñ mfo.”

¹⁵Ado Abọọñ amaabọọrọ Ananayas ate, “Kaa! Awo ami ado ñkpọutom a-ami mmekke nnịm nnọ idem mmi, nọ anye aben anyịñ mmi akesuan anọ mme Yentaid ye mme ndidem ammọ ye nditọ Isred.

¹⁶Ami ñyaawọt anye adaña umiañ ukuud a-anaaha nte anye abọ ke ntak anyịñ mmi.”

¹⁷Ndin Ananayas amaadakka aka ufọk Sọọd, akedot anye ubọk abo ate: “Sọọd, ayịneka mmi, Abọọñ Yisọs a-akewuọọhọ uwọt fiin idem amọ ke usʌñ ke ini a-afo akedieeghe, andọñ utom unọ, nọ ato do afo amaana akịt usʌñ anyʌñ ayọhọ ye Adisana Sịbidịd.”

¹⁸Ke ataa idahado, mme ñkpọ e-eketieeghe nte ikpọk emaewuọọñọ Sọọd ke anyen, ndin anye amaamaana amọọnọ ñkpọ. Anye amaadakka ada, emaenyʌñ eduọk anye mmọọñ,

¹⁹ndin ke anye amaakedia ndidia, amaatịmme anie adudu. Sọọd amaaba ye mme mbed se ikiba ke Damaskọs ke ñkpọ nte usen ifañ.

²⁰Anye ikibiadda ini aditọọñọ ñkwọrọ ikọ ke mme Sinakọk, ate ke Yisọs ado Ayịn Abasi.

²¹Ado idem amaakpa afịd mbon e-ekekoppo naña anye akekwọrọ ikọ, ammọ emaenyʌñ ebịp ebo, “Me idooho awo a-akesitʌkkọke mbon e-ekekooddo anyịñ Yisọs ami ke Yerusedem, a-akenyʌññọ adi Damaskọs ke ukem ntak ado, nọ ato do amuum mme mbed nte mbon ñkpakọb asọk mme ikpọ aku ado mi?”

²²Ado Sọọd amaaka iso akop adudu, anyʌñ anam idem akpa mme Yuu e-ekedʌññọ ke Damaskọs, ke adiwọt mbo ke Yisọs ado Mesaya.

²³Ke umiañ usen emaekeboiyo, mme Yuu emaedʌk edioomo ammọ-ammọ adiwot Sọọd,

²⁴ado anye amaakop abaña edioomo ammọ. Ammọ emaekpeme mme usʌñ abio akoneyo ye uweemeayo nọ ato do enie ufañ ewot anye.

²⁵Ado mme mbed emaeben anye esịn ke akpasa esuuk ke adudu ke ndibene akonayo.

²⁶Ke Sọọd amaakedi Yerusedem, anye amaadomo ukeme adidʌk atu mme andinịm ke akpanikọ, ado afịd ammọ ekebaabaak anye, inịmme ke anye akedo emọ-emọ mbed.

²⁷Ado Banabas amaadat anye anyʌñ aben anye abịne mme abọsịd. Anye amaatañ anọ ammọ naña Sọọd akekịt Abọọñ ke usʌñ, ye naña Abọọñ aketañ ikọ ye anye, naña anye akekwọrọ ikọ uko-uko ke Damaskọs ke anyịñ Yisọs.

²⁸Ndin Sọọd amaadañ ye ammọ, asiekeene ammọ awuọ esiin naña amama ke Yerusedem, akwọrọ ikọ uko-uko ke anyịñ Abọọñ.

²⁹Anye amaasiefaaña ye mme Yuu e-ekesemme Krik, ado mbon ami emaeyem usʌñ naña ekpewot anye.

³⁰Ado ke mme andinịm ke akpanikọ emaekediọọñọ ibaña uduak ami, ammọ emaeben anye esọiyọ eka Siseria enyʌñ ekenọ anye aka Tasọs.

³¹Do ndin ke ufọkabasi ke afịd-afịd Yudia, ye ke Kadidi, ye ke Sameria ekebọ emem ye nsọọñọnda. Ke idak mbaak Abasi ye nsọọñọidem ake Adisana Sịbidịd, ufọkabasi amaatọt.

³²Naña Bita akekaaha mme nsio-nsio itie, anye amaasaaña akese mme ikot Abọọñ e-ekedʌñọ ke Dida.

³³Anye amaakịt awodeen keed do a-akekereke Enias, a-akedọñọke akpaubeñ ana ke ikʌk isua itiaita.

³⁴Ndin Bita amaabo anye ate, “Enias, Yisọs Krais anam udọñọ mfo akweeñe, dakka da, nyʌñ ben aya mfo.” Enias amaadakka ada ini keed.

³⁵Afịd mme andikidʌñ ke Dida ye Sarọn emaekịt anye, enyʌñ ekappa esịd ekeene Abọọñ Abasi.

³⁶Ado mbed keed amaaba ke Yopa a-akekereke Tabita, (a-awuọọñọke Dọkas ke usem Krik). Mma ami akeyọhọ ye nti utom ye andiyaaña mme uweene.

³⁷Akem anye amaadidọñọ anyʌñ akpa; emaeyet akpo amọ enyʌñ enịm ke ubeed keed ke ufọk anyọñ.

³⁸Ado sia Dida akekpereke Yopa, ndin mme mbed ñko emaenyʌñ ekop ke Bita mmọdo akeba, ammọ emaesio awo iba edọñ utom enọ anye, ete mbọk yak anye ibịne mmimọ, usọp-usọp.

³⁹Bita amaadakka ada akeene ammọ, ndin ke anye amaakekewuọ do, emaeben anye edọọk eka ubeed ufọk anyọñ. Afịd mme ebekpa emaeda ekanna Bita ekʌk, etua enyʌñ ewọt anye mme afọñ esịd idem ye ake anyọñ idem a-Dọkas akenamma ke ini a-anye akebaaha ye ammọ.

⁴⁰Ado Bita amaasiooño afịd ammọ ke ubeed, anyʌñ atọọñọ edọñ abọñ akam. Ndin anye akanna iso ase akpo mma ado, anyʌñ abo ate, “Tabita, dakka da.” Do ke anye aketaad anyen, ndin ke anye amaakekịt Bita, anye amaadakka atietie.

⁴¹Bita amaanyan ubọk amọ anọ anye, anyʌñ adịppe anye adaaha. Ke anye amaakekood mme andinịm ke akpanikọ, akpan-akpan mme ebekpa nọ edʌk edi, anye amaaben Dọkas ke uwem ayaak anọ ammọ.

⁴²Etob ñkpọ ami amaasuana akara ke afịd-afịd Yopa, ñko umiañ awo emaenịm Abọọñ Abasi ke akpanikọ.

⁴³Bita amaaba ke Yopa umiañ usen ye adeppeikpa keed a-akekereke Saimọn.