Read Ibibio Contemporary Bible 2020 Rum 1 Bible Online

Rum 1 - Ibibio Contemporary Bible 2020 bible

Rum 1

¹Bọọd, ayịnufọk Krais Yisọs, ekoodo adido abọsịd enyʌñ esio enịm saña-saña enọ eti etob Abasi,

²eti etob anye amaakenwọnwọñọ ke esed ato mme brọfed ekeewet ke adisana ñwed Abasi,

³ke abaña Ayịn amọ, ke uduod amọ nte awo aketooho ufọk Defid,

⁴ndin ato ke Sịbidịd a-asañake mme adudu ewọt ebo ke anye ado Ayịn Abasi ke adised ke ñkpa amọ: Yisọs Krais Abọọñ ñnyịn.

⁵Ato ke anye ke ntak Ayịn amọ ñnyịn imibọ mfọn mme adido abọsịd nyʌñ kood afịd mme Yentaid ke adikop uyo a-atooho ke mbuọdidem ke ntak anyịñ Yisọs.

⁶Ndiin ndufo ñko edọñọ ke atu mme awo e-ekoodo yak edido ake Yisọs Krais.

⁷Enọ ñwed ami esọk afịd mbio Rum a-Abasi amaaha anyʌñ akood yak edido mme ndisana awo amọ: Mfọn ye emem a-atooho Abasi Ete mme Abọọñ Yisọs Krais asịm ndufo.

⁸Ke akpa ifed, ami mmekọọm Abasi mmi, ke Yisọs Krais, mbaña afịd ndufo naña mbuọdidem ndufo awuọ etop ke afịd ederimbod.

⁹Abasi, a-ami ñkponoke ke afịd esịd ke adikwọrọ eti etob ake Ayịn amọ, ado ntiense mmi ke naña ami itoiyo ndufo

¹⁰ke afịd-afịd ini ami mbọññọ akam; ndin ñnyʌñ mbọñ akam ke akpatre, ke uduak Abasi, usʌñ akpaakap abeere anọ miin ndisoobo mme ndufo.

¹¹Mmenie udọñ adikịt ndufo nọ ami inọ ndufo mme enọ sịbidịd adinọ ndufo nsọñidem,

¹²man ato do ndufo mme ami idoñño keed aken nsọọñọnda ato ke mbuọdidem.

¹³Ñyemme ndufo etre adidiọọñọ, ikọd Abasi, ke ami mmaanam akikere uwak ini adidise ndufo (ado emaeñkpañ adinam ntodo tutu idahami) nọ ato do ami nnie utịp ke ufọọd ndufo kpa naña ñkenie ye mme Yentaid mfen.

¹⁴Mmenie akpan iso utom adinam nnọ mme Krik ye mme mbon edooho asenawo, ye mme afiọkñkpọ ye mme akọi.

¹⁵Ado ado ntak a-ami nnieghe akpọsọñ udọñ adikwọrọ eti etob ami ñko nnọ ndufo e-ebaaha ke Rum.

¹⁶Ami ñkoppo abuud ke ntak eti etob ami, sia anye ado adudu Abasi adatta adinyaaña asọk afịd awo e-enịmme ke akpanikọ: akpa, ado anọ mme Yuu, ndin mme Yentaid.

¹⁷Sia ke eti etob ke eyaara adinenido a-atooho Abasi, adinen uwem a-atooho ke mbuọdidem tọọñọ ke akpa sịm akpatre, kpa naña emaekewet: “Mme ndisana awo eyaedu uwem ke mbuọdidem.”

¹⁸Eyaara iyadesịd Abasi ato ke abio Abasi ebaña mme unana adinie ukpono nnọọ Abasi ye mme ndiọi ido mme awo e-efiighe akpanikọ enịm ato ke ibak ndiọiñkpọ ammọ,

¹⁹sia ñkpọ e-ekemeke idiọọñọ mbaña Abasi ana inwañ-inwañ anọ ammọ, ke ntak adooho Abasi anam anye ana inwañ-inwañ anọ ammọ.

²⁰Sia tọọñọ ke ntọọñọ ederimbod mme edu Abasi a-awo mmiikịtte, nsi-nsi adudu ye ndisana uduod amọ, ekiit mfọn-mfọn, edat ifiọk eto ke se amaakenam, nọ ato do mme awo edinie ntak.

²¹Sia akpesʌk ado ammọ emaekediọọñọ Abasi, ammọ ikinọọhọ anye ubọọñ nte Abasi inyʌññọ inọ anye ekọọm, ado ekikere ammọ amaakappa ado ikpu-ikpu, ndisịme esịd amọ nko eyebeebre.

²²Akpesʌk ado ammọ ekereke ebo ke ido mme afiọk ñkpọ, ammọ emeekappa edoñño ndisịme,

²³enyʌñ ekpəhọ ubọọñ Abasi a-mmiikemeke adikpa tutu amama esịn ke mme uboobod ñkpọ, ke uduod awo, ke mbiod inuen ye unam mme se inyọnyọọn ke idịp.

²⁴Ke ntak ado Abasi amaayaak ammọ ke ndiọi udọñ esịd ammọ anọ mbubiam ido ke adisuakka idem ammọ ye keed aken.

²⁵Ammọ emaekpəhọ akpanikọ Abasi enọ nsu, ekpono enyʌñ enam ñkpọ enọ se ebobod ke ubọk utu-utu Andibod a-anaaha etooro ke nsi-nsi, Amen.

²⁶Ke ntak ami, Abasi amaayaak ammọ anọ mme ndiọi udọñ itọñ. Ibaan ammọ emaekpuuño ata uduod e-ekebotto ammọ enọ, ekappa se awo mmikibotto ammọ inọ.

²⁷Ke ukem usʌñ ami ideen emaenyʌñ ekpọñ ata uduod adinie ewana mme ibaan etịmme ndin edumakka idem ammọ ñkpa-ñkpa. Ideen edikappa enie ewana ye ideen ke ndedeghe usʌñ enyʌñ ebọi esịn ke idem ammọ utịb mbubiam ido ammọ.

²⁸Sia ammọ mmiikikereke ke afọn adinịm ifiọk Abasi, Abasi amaayaak ammọ anọ idiọọk iwuod, do ndin ammọ enaaña se ammọ ekpediinamma.

²⁹Ammọ ediyọhọ mme afịd nsio-nsio iba, ndiọi ido, idiọọk itọñ, ye ukpọñ nti usʌñ. Ñko ammọ eyọhọ mme ufịb, uwod awo, ndutịn, abiaaña ye ubi. Ammọ ebaaña awo ke edem,

³⁰ebiad awo ke ikọ inua, esua Abasi, esọọñ anyen, ekịt idem enyʌñ ekpọk inua; ammọ etʌppọ mme nsio-nsio usʌñ adinam ndiọiñkpọ; enyʌñ esọñ iwuod mme ete ye eka ammọ,

³¹ammọ edoñño ndisịme, enana mbuọdidem, inieghe ima, enana esịd mbọm.

³²Akpesʌk ado ammọ ediọọñọke nnen-nnen ibed Abasi a-abooho ke mme andinam utọ ñkpọ ami edot ñkpa, ammọ esʌk ekaaka iso enañña mme ñkpọ ami enyʌñ enyịmme enọ mbon se ikaiso inañña utọ ido ado ñko.