Read Ibibio Contemporary Bible 2020 Rum 10 Bible Online

Rum 10 - Ibibio Contemporary Bible 2020 bible

Rum 10

¹Nditọete, se ido udọñ esịd mmi ye akam a-mbọññọ nnọ Abasi mbaña nditọ Isred ado yak ammọ ekpekap ebọ edinyañña.

²Sia mmekeme aditie ntiense mbaña ammọ nte ke ammọ enie udọñ enọ Abasi, ado udọñ ammọ isañake ikeene ifiọk.

³Sia ammọ miikidiọọñọke adinenido Abasi ndin eyem adinie usʌñ ake ammọ, ammọ ikisuuhọ iwuod inọ adinenido Abasi.

⁴Krais ado utịd afịd ibed nọ ato do adinenido aba anọ afịd awo se inịm ke akpanikọ.

⁵Moses awed ami abaña usʌñ adinenido a-asañake ke ibed: “Awo a-anamma mme ñkpọ ami ayaadu uwem akeene ammọ.”

⁶Ado adinenido atooho ke mbuọdidem abo ntom: “Kuubo ke esịd mfo, ‘Anie adidọọk ika abio ubọọñ Abasi?’ ” (a-adooho, adikiben Krais nsuho ndi)

⁷“me, ‘Anie aditịkke idʌk ke ntọtəñọ itie?’ ” (a-adooho, adibenne Krais nsio ke ñkpa).

⁸Ado nso-o ke anye atañ? “Ikọ ukpere fiin; asịne ke inua mfo mme ke esịd mfo,” ado ado, ikọ mbuọdidem a-ñnyịn ikwọrọke ibaña:

⁹Ate adieke afo atañña ke inua mfo abo ke, “Yisọs ado Abọọñ” ndin anyʌñ anịm ke esịd mfo ate ke Abasi amaanam anye ased ke ñkpa, afo ayaanie adinyaaña.

¹⁰Sia ado ke esịd mfo ke afo anịm ke akpanikọ ndin anie unen, ñko ato ke inua mfo, afo ayaara mbuọdidem ndin anie adinyaaña.

¹¹Nte ikọ Abasi atañña, “Awo keed ake adodo a-anịmme Yisọs ke akpanikọ idiikịtte asuenne.”

¹²Sia ukpəhọde ibaaha ke ufọọd mme Yuu ye mme Yentaid — ukem Abọọñ ado ado Abọọñ afịd awo a-adiọññọ afịd mbon awo se ikood anye ayọhọ-ayọhọ.

¹³Sia, “Afịd awo se ikood anyịñ Abọọñ eyaebọkkọ.”

¹⁴Die, ndin ke ammọ ediikan ikood anye a-ammọ miinịmme ke akpanikọ? Ndin, die ke ammọ ediikan inịm anye a-ammọ mmiikoppo ñkpọ ibaña? Ndin die ke ammọ ediikop ke mmibaagha awo se ikwuọọrọ ikọ Abasi inọ ammọ?

¹⁵Ndin die ke edikwọrọ ke mmibọhọke edọdọñ ammọ? Kpa naña emaekewet, “Ikpad mbon ado e-edatta nti etob edi ayaiya die!”

¹⁶Ado idooho afịd nditọ Isred ekeenyịmme eti etob ami. Sia Aisaya abo, “Abọọñ, mme anie awo ekeenịm etob ñnyịn ke akpanikọ?”

¹⁷Ke ntodo, mbuọdidem ato ke adikop etop, ndin adikop etop ami ato ikọ Krais.

¹⁸Ado ami mbịp, nte ammọ ikikoppo? Ke akpanikọ, ammọ emaekop: “Uyo ammọ amaawuọ adʌk afịd ederimbod, ikọ ammọ ñko awuọ utịd ederimbod.

¹⁹Ñko mmaana mbịp: Nte ikinwañake Isred? Akpa, Moses abo, “Ami ñyaanam ndufo esịn anyen ebaña mbon a-mmiidoññoke idịd; ami ñyaanam ndufo ediọọk esịd ebaña idịd e-mmiinieeghe ifiọk.”

²⁰Ndin Aisaya atañ uko-uko, “Mbon i-ikidiiñyemme emaeñkịt, Ami mmaayaara idem mmi nnọ mbon a-mmiikibịppe ñkpọ imbaña miin.”

²¹Ado ke atuuhọ Isred anye abo, “Ke afịd usen ami mmesio ubọk mmi ñnyan nnọ mbon nsọñiwuod ye mbon ukpọtiọ.”