Read Ibibio Contemporary Bible 2020 Rum 12 Bible Online

Rum 12 - Ibibio Contemporary Bible 2020 bible

Rum 12

¹Ke ntodo, ami mmikpeiye ndufo, nditọete, ke ntak mfọn Abasi, nte yak enịm idem ndufo nte aduuwem uwa, asanake anyʌñ anem Abasi esịd-ami ado akpan-akpan ye eti usʌñ adikpono Abasi.

²Ikiinañña ñkpọ aba ikeene naña ederimbod enam, ado ikpəhọ akikere mme esịd ndufo ke edidu ufa uwem. Ndin ndufo eyaekan edomo enyʌñ enyịmme se ido mfọnñkan uduak Abasi eti ido, afọnnọ, anyʌñ anem Abasi esịd.

³Sia ato ke mfọn e-nnọọhọ miin, ami mbo ndufo keed-e-keed: kuukịt idem mfo akpon akan naña akpena akịd, ado kap nie eti iwuod mme mfara ke idem mfo nọ asaña akekem ke udomo mbuọdidem a-Abasi inọọhọ ndufo keed-e-keed.

⁴Kpa naña ñnyịn keed-e-keed inie abʌkidem keed ye mme uwak ndido, ndin, mme ndido ami inieeghe ukem ubọkutom,

⁵ntodo ñko ke Krais akpasʌkado ñnyịn i-iwakka, ido abʌkidem keed, ndin afịd ñnyịn idoñño ndido inọ keed-e-akan.

⁶Ñnyịn inie nsio-nsio enọ, a-asañake ke mfọn a-Abasi inọọhọ ñnyịn keed-e-keed. Adieke enọ mfo adooho ukịd ñkukịd, ndin kịd nkukịd nọ asaña akekem ke mme mbuọdidem mfọ.

⁷Adieke adooho adinam ñkpọ nnọ awo, yak anye anam ñkpọ; adieke adooho adikpeeb ñkpọ, ndin kpeep;

⁸adieke adooho adinọ item, nọ item; adieke adooho adinọ mbon unanna ñkpọ, tat ubọk nọ, adieke adooho adidat usʌñ, dat usʌñ; adieke adooho adiwọt mbọm, nam ado ke inemesịd.

⁹Ima ana ado ke akpanikọ. Isua se ido idiọọk; isọọñọ iyiire ke se ifọn.

¹⁰Inam ñkpọ inọ keed aken ke ima nditọete. Ikpono keed aken ikan idem ndufo.

¹¹Ikiinana akpọsọñ udọñ, ado inie ekamba ufiop udọñ ke Sịbidịd, ke adinam ñkpọ nnọ Abọọñ.

¹²Ndufo idara ke idodanyen, inie ime ke ini afanikọñ, inyʌñ ibọñ akam afịd ini.

¹³Wana inie mfo ye mme ikọd Abasi e-ebaaha ke unana. Ka iso adinam etiido.

¹⁴Idiọñ mbon i-kọbbọke ndufo, diọñ ado kuusuuñọ ammọ.

¹⁵Idara ye mbon se idara, itua ye mbon e-etuaahake.

¹⁶Idʌñ ke emem mme keed aken, ikiiwʌt idem, ado inyịmme idiwana mme mbon awo ke usuuk itie. Ikiikokko idem ndufo.

¹⁷Ikiidat idiọọk isio awo ndomokeed usieene idiọọk ñkpọ. Ikpeme adinam se ifọn ke anyen afịd awo.

¹⁸Daña ndufo akpekakan, iyem usʌñ idʌñ ke emem mme afịd awo.

¹⁹Ikiisio awo usieene, mme ndima ufan mmi, ado iyak ufañ inọ ifiopesịd Abasi, sia emaewet: “Usieene annie miin; Ami ñyaasio usieene,” Abọọñ abo.

²⁰Utu ke ndo, ñwed Abasi abo ate: “Adieke abiọñ adọññọ awo usua mfo, nọ anye ndidia, adieke itọñ asatta anye, nọ anye ñkpọ ñwọñ. Ke adinam ntom, afo ayaabək ufiop ikañ ke iwuod amọ.”

²¹Ikiiyak idiọọkñkpọ ikan ndufo ubọk, ado idat nti ñkpọ ikan idiọọk ñkpọ.