Read Ibibio Contemporary Bible 2020 Rum 13 Bible Online

Rum 13 - Ibibio Contemporary Bible 2020 bible

Rum 13

¹Eyak afịd awo esuuk iwuod enọ mme adaiwuod ke ukara, sia ukara nte keed ibaaha ibọọhọke anye a-Abasi akeanimme. Mme andikara e-ebaññake edoñño mbon se Abasi amaakemek.

²Ke ntodo, awo a-anwanake ye ukara anwana ye ukara a-Abasi amaakeanịm, ndin mbon se inam ntodo edat ubiomikpe enọ idem ammọ.

³Sia mme adaukara idoññoke ñkpọ ndịk inọ mbon enaññake nti ñkpọ, ado edoñño ntodo enọ mbon enaññake ndiọi ido. Ndufo emeyem ibọkkọ ndịk awo a-abaaha ke ukara? Inam se inem ndin anye ayaitooro ndufo.

⁴Sia andiba ke ukara ado ayịnufọk Abasi a-abaaha ke ufọn ndufo. Ado adieke enamma idiọọk inie ndịk sia anye ikamake akañkañ amọ ke ikpu-ikpu. Anye ado isʌñutom Abasi, anie unen adimia anam idiọọk ñkpọ ufen.

⁵Ke ntodo, adod edisuuk iwuod nnọọ ukara, idooho ke ntak umia ufen ikpọọñ ado ke ntak eti akikere esịd ñko.

⁶Ami ado ntak anaaha ndufo ekpe etịbe abio, sia mbon ukara edoñño nditọutom Abasi, e-enọọhọ afịd ini ammọ adinam utom ukara.

⁷Enọ afịd awo se ndufo akama ammọ nte isʌñ, adieke akamake taksi, kpe taksi, adieke akamake utịb akʌk abio, ndin kpe; adieke adooho mbaak, ndin baak; adieke adooho ukpono, ndin ukpono.

⁸Ikuukama awo ndomokeed isʌñ, ibọọhọke isʌñ adika iso ma keed aken, sia awo a-amaaha awo mfen a-anịm afịd ibed.

⁹Mme ibed, “Kuusịn efịbe,” “Kuuwot awo,” “Kuuyịp inọ,” “Kuusịn anyen ke ñkpọ awo,” ye ke mme ibed mfen ake adodoñño, adiana ke ewʌghe keed ami: “Ma mbọkidʌñ mfo naña afo ama idem mfo.”

¹⁰Ima inamma mbọkidʌñ amọ idiọọk. Ke ntak ami ima ado adinam ibed ayọhọ-ayọhọ.

¹¹Ndin nam ami, sia ndufo emediọọñọ ke ini ado idahami. Ini ado ami a-naaha ndufo edemme ke idap, sia adinyaaña ukpọñ ñnyịn adikpere idahami akan idaha a-ñnyịn ikitooho inịm ke akpanikọ.

¹²Ayo ayaasieere, ubahausen akpere. Ndin yak ñnyịn ikpọñ mme ndiọiñkpọ akịm, iben afọñ ekọñ ake unwana isịne ke idem.

¹³Yak ñnyịn inam ido afọññọ asaña akekem mme ini uweeme, idooho ke una mfadidem ye ido ukpa mmịn, idooho ke abʌd-abʌd ido me use me ndubiam eduuwem, idooho ke utọk me ke ufịb.

¹⁴Ado, isiine Abọọñ Yisọs Krais ke idem ndufo, ndin ikuukere ibaña ediyʌkkọ mme ndiọi udọñ abʌkidem ndufo.