Read Ibibio Contemporary Bible 2020 Rum 16 Bible Online

Rum 16 - Ibibio Contemporary Bible 2020 bible

Rum 16

¹Ami mmeben ayịneka awonwaan ñnyịn Fobe, dikịn ufọkabasi ke Sentre iwọt ndufo.

²Ami ibo yak ndufo ebọ anye ke Abọọñ ke usʌñ a-adotto ke se mme ndisana awo ekpenam, enyʌñ enọ anye unwam akeadodo anye akeyemme sia anye ado unwam anọ uwak awo, ye miin ñko.

³Kọọm Prisida ye Akwida, mme mbon nsaña utom mmi ke Krais Yisọs.

⁴Ammọ emaenyịmme adiduọọk itọñ uwem ammọ ke ntak mmi. Idooho ami ikpọọñ ado afịd ufọkabasi eke mme Yentaid, ekọọm ammọ.

⁵Ekọọm ñko ufọkabasi esisooboke ke ufọk ammọ. Ekọọm adima ufan mmi Ebenetus, a-akedooho akpa awo se ikappa esịd inọ Krais ke ñkanñkʌk idịd Esia.

⁶Ekọọm Mmeri, a-akeasịnne ifịk anam utom inọọ ndufo.

⁷Ekọọm Andronikos ye Yunia, mme nditọete mmi e-ekebaaha ke ñkpakọb ye ami. Ammọ edo mme awuọ-iso ke atu mme abọsịd, emaenyʌñ ediọọñọ Krais embemiso ami.

⁸Ekọọm Ambriatọs, adima ufan mmi ke Abọọñ.

⁹Ekọọm Ubanọs, awo nsaña utom ñnyịn ke Krais, ye mme ata adima ufan mmi a-Stakis.

¹⁰Ekọọm Abedes, ke nsuukiwuod nọ Krais e-emaekedomo ndin ebieere ete ke afọn. Ekọọm mbon edooho ikọt ufọk Aristobudọs.

¹¹Ekọọm Erọdion, awo Yuu nte ami. Ekọọm ikọd ufọk Nasisọs e-ebaññake ke Abọọñ.

¹²Ekọọm Trifana mme Trifosa, mme ibaan ado e-enamma akpọsọñ utom ke Abọọñ. Ekọọm adima ufan mmi Besis, awonwaan mfen a-anamma akpọsọñ utom ke Abọọñ.

¹³Ekọọm Rufọs e-emekke ke Abọọñ, mme eka amọ, a-akedooho eka annọ miin ñko.

¹⁴Ekọọm Asinkritọs, Frekọn, Emes, Batrobas, Emas, ye mme nditọete mbon ñko e-ebaññake mme ammọ.

¹⁵Ekọọm Firọrọkọs, Yudia, Nerus mme ayịneka ammọ awonwaan, ye Odimpas ye mme ndisana awo e-ebaññake mme ammọ.

¹⁶Ekọọm keed eken ke adisana ntʌminua. Afịd mme ufọkabasi Krais e-edọñ ekọọm.

¹⁷Ami mmibeeñe ndufo nditọete, aditiñ anyen nse mbon e-esịnne ubakka enyʌñ enịm ñkpọiduọ ke usʌñ ndufo a-mmiisañake ke ukpeeb a-ndufo ekebọọhọ. Idiañña nsaña ikpọñ ammọ.

¹⁸Sia utọ ibon ado inamma ñkpọ inọ Abọọñ Krais, ado enam enọ idọọk itọñ ammọ. Ke ñkara utañ ikọ ye nnem inua ammọ ebiaaña mbon enieghe mfefeere esịd e-mmidiọọñọke.

¹⁹Afịd awo ekop ebaña nsuukiwuod ndufo, ndin ami mmekop ayọọhọ inemesịd ibaaña ndufo; ado ami ñyem ndufo ediọọñọ ñkpọ ebaña se ifọn ndin enana ndudue ke se ido idiọọk.

²⁰Abasi emem ayaasọp inuak Setan ke idak ukod ndufo. Yak mfọn Abọọñ Yisọs aba mme ndufo.

²¹Timoti awo nsaña utom mmi, adọñ ekọọm inọ ndufo, ukem ñko nte Dusiọs, Yasọn ye Sosipato, e-edooho mbon Yuu ñnyịn mfen ñko.

²²Ami, Tetius, andiwet deta ami mmikọọm ndufo ke Abọọñ.

²³Keyọs a-ami ye mme afịd ufọkabasi idiaaha ukama isenawo amọ, adọñ ekọọm inọ ndufo. Edastus, a-adooho adaiwuod ke utom abio, ye mme ayịneka ñnyịn Kwaatọs, edọñ ekọọm inọ ndufo.

²⁴Yak mfọn Abọọñ ñnyịn Yisọs Krais aba ye afịd ndufo. Amen.

²⁵Idahami enọ anye a-akemeke adisọọñọ ndufo ke ikọ Abasi ye ke adisiak ntọd Yisọs Krais nte asañake akekem ke adiyaara ndedịbe akpanikọ e-ekedịppedịp ke mme uwak emana a-amaekeboiyo,

²⁶ado idahami eyaara enyʌñ enam ediọọñọ eto ke se mme brọfed ekewet a-atooho ke ewʌhọ nsi-nsi Abasi, nọ ato do afịd mme Yentaid ekpenịm enyʌñ esuuk iwuod enọ anye ke mbuọdidem.

²⁷Itooro anie Abasi ke nsi-nsi a-adiọọñọke afịd ñkpọ ato Yisọs Krais! Amen.