Read Ibibio Contemporary Bible 2020 Rum 2 Bible Online

Rum 2 - Ibibio Contemporary Bible 2020 bible

Rum 2

¹Afo, ndin, unieeghe ntak, afo a-akpeeghe ikpe anọ awo mfen, sia naña afo akpe ikpe mbon mfen, afo ñko amebiom idem mfo ikpe, koro afo akpe ikpe anam ukem mme ñkpọ ado.

²Idahami ñnyịn imidiọọñọ ke ubiereikpe Abasi abañake mbon e-enamma utọ ñkpọ ami akọñọ ke akpanikọ.

³Ndin afo ñkaña awo, umaubieere ikpe unọ ammọ ado afo asʌk anam ukem ñkpọ ado, afo akere abo ke imọ iyaibọkkọ ubiom ikpe Abasi?

⁴Me afo ase ke ndek utọ uwak mfọnido amọ, ediyọ mme ime, ado nte udiọọñọke ke mfọnido Abasi ado edudat fiin nọ aketua ñkpọfiọk?

⁵Ado ke ntak nsọñiwuod ye unana adikappa esịd, afo asʌk akọ ifiopesịd anịm anọ idem mfo ke usen iyadesịd Abasi, ke ini adinen ubiereikpe amọ adiyaara.

⁶Abasi, “ayaanọ awo keed-e-keed utịp akeeneke se anye anam.”

⁷Amaado mbon e-esịnne ifịk ke adinam nti ñkpọ, eyem ubọọñ, ukpono mme unana ñkpa ke nsi-nsi, anye ayaanọ nsi-nsi uwem.

⁸Ado amaado mbon e-eyemme ubọọñ idem ammọ, enyʌñ esịn akpanikọ ndin ekene idiọọk, ifiopesịd mme iyadesịd ayaaba.

⁹Afanekọñ ye nnanenyịn ayaaba anọ afịd awo e-enamma idiọọk, akpa anọ mme Yuu, ndin mme Yentaid;

¹⁰ado ubọọñ, ukpono ye emem anie afịd awo se inam nti ñkpọ; akpa anọ mme Yuu, ndin mme Yentaid.

¹¹Sia Abasi akpe ikpe afịd awo ukem-ukem.

¹²Afịd awo se inam idiọọk ke una ibed eyaekịt nsobo ke una ibed, ndin afịd awo se inam idiọọkñkpọ ke idak ibed eyaebọ ubiere ikpe ke idak ibed.

¹³Sia idooho mbon se ikop ibed edoñño mme andinen ke iso Abasi, ado mbon se inam ibed ke ediikood nte mme adinen.

¹⁴(Ke akpanikọ, ke ini mme Yentaid, a-mmiinieeghe ibed, enamma ke obod uwem mme ñkpọ e-ekewette ke ibed, ammọ edo ibed enọ idem ammọ, akpọkọm ado adooho ammọ inieeghe ibed.

¹⁵Sia ammọ ewọt ete ke ewet se ibed ayem ke esịd ammọ, ekikere esịd ammọ ado ntiense ndin ekikere ammọ ado abiom ammọ ikpe usʌk ini, anyʌñ afak ammọ asio ñko usʌk ini.)

¹⁶Ami ayaadat itie ke usen Abasi adikpe ikpe ndedịbe ekikere mme awo ato ke Yisọs Krais naña eti etob mmi abo.

¹⁷Idahami afo, akpedo akood idem mfo Yuu, akpedo ada ke ibed ndin anam inua abaña ewana mfo mme Abasi,

¹⁸akpedo afo amediọọñọ uduak amọ anyʌñ anyịmmme se ifọn ikan ke ntak afo adiọọñọke ibed;

¹⁹akpedo afo amenịm ke afo ado ada usʌñ anọ mme nnan, ado unwana anọ mme andiba ke akịm,

²⁰ado andikpeeb a-nọ mme akọi, ado andikpeeb anọ ntəkayịn, sia afo amenie ke esịd ibed ayọhọ ifiọk mme akpanikọ.

²¹Afo ndin, akpeebe mbio mfen, ukpeebe idem mfo ñko? Afo a-akwọrọke abo awo akuuyịp inọ, nte afo ameyib inọ?

²²Afo a-abooho ate mme awo ekuusịn efịbe, nte afo amesịn efịbe? Afo a-asuaagha usosoi ñkpọ, afo ameyiip ñkpọ ke mme tembịd?

²³Afo a-anamma inua abaña ibed nte afo emetre ikpono Abasi ke edibiad ibed?

²⁴Nte emaekewet: “Esappa anyịñ Abasi ke ufọọd mme Yentaid ke ntak mfo.”

²⁵Adinịm mboppo anie ufọn akpedo afo amenịm ibed, ado akpedo afo amebiaad ibed amekappa aba nte awo ikunịmme fiin mboppo.

²⁶Edieke mbio a-mmiinịmme mboppo enamma se isịne ke ibed, nte awo idiidatta ammọ nte mme anịm mboppo?

²⁷Awo a-mmiinịmme mboppo ke abʌkidem ado anye anam ibed ayaubiom fiin ikpe, akpesʌk ado afo anieeghe uwewed ibed anyʌññọ anịm mboppo, afo ado abiad ibed.

²⁸Awo idooho Yuu ke abʌkidem ikpọọñ, kpa naña adinịm mboppo mmiidooho se ekịt ke anyen me ke abʌkidem ikpọọñ.

²⁹Iyoo, awo ado Yuu ke adido ke esịd idem; ndin unịm mboppo, ado unịm mboppo ake esịd, ke Sịbidịd, idooho ke uwewed ibed. Utọ itooro ado itooho awo, ado ato Abasi.