Read Ibibio Contemporary Bible 2020 Rum 3 Bible Online

Rum 3 - Ibibio Contemporary Bible 2020 bible

Rum 3

¹Nso-o ido udoro, ndin, a-abaaha ke adido Yuu, nso-o inyʌñ ido ufọn a-asịneke ke adinịm mboppo?

²Awak ke afịd usʌñ! Ke akpa ifed, eyaak ata ikọ Abasi esịn mme Yuu ke ubọk.

³Yak ise ise, akpedo usʌk ammọ inamma akpanikọ-ọ? Nte unana edinam akpanikọ amọ ayaabiad akpanikọ Abasi?

⁴Iyoo! Abasi adisʌk ido akpanikọ, akpesʌk ado afịd awo edoññoke mme asu nsu. Kpa naña emaekeweewet: “Man ato do ewọt ke afo amenen ke se afo atañ anyʌñ akan ke ini afo akpeeghe ikpe.”

⁵Ado adieke mme ukwañ ido ñnyịn asiooho adinenido Abasi adaha anwa-anwa, nso-o ndin ke ñnyịn idiitañ? Nte ke Abasi inenne ke adiben ifiopesịd amọ idot ñnyịn? (Ami ñkama eniin ifiọk awo.)

⁶Idooho ntodo! Akpedo ado ntodo, Abasi akpenam die akpe ikpe ederimbod?

⁷Awo akeme ifaaña, “Edieke nsu-nsu uwem mmi anamma akpanikọ Abasi awuọ anyʌñ anam ubọọñ amọ akpon, ntak e-ekpe e-mbiommo ikpe nte anamidiọọk ñkpọ-ọ?”

⁸Ntak a-mmiitañña-daña usʌk awo edot ñnyịn uyo ebo ke ñnyịn ibo “Yak ñnyịn inam idiọọkñkpọ nọ nti ñkpọ awuọ adi?” Ammọ edot ubiom ikpe ammọ.

⁹Nso-o adido utịt iwuod ikọ ñnyịn ndin? Nte ñnyịn imifọn ikan ammọ? Idooho ntodo! Ñnyịn imiwọwọt ibo ke mme Yuu ukem-ukem ye mme Yentaid eba ke idak idiọọkñkpọ.

¹⁰Nte emaekeweewet: “Ibaaha awo se inen, ibaaha awo ndomokeed;

¹¹ibaaha awo keed se ñkpọ anwaña; ibaaha awo ndomokeed a-ayemme Abasi.

¹²Afịd etịmme edem ekpọñ, afịd ediana keed ekappa mme ñkpafi; ibaaha awo keed a-anamma eti, ibaaha awo ndomokeed.”

¹³“Usʌñ itọñ ammọ adoñño mme ana inwañ udi; edeme ammọ enam abiaaña.” “Idiọọk ibọk udʌkikọd ayọhọ inua ammọ.”

¹⁴“Mme inua ammọ ayọhọ ye nsue ye idiọkesịd.”

¹⁵“Mme ikpad ammọ esọp ke adiduọk iyiib;

¹⁶atahade ye ukuud eyọọhọ usʌñ ammọ,

¹⁷ndin usʌñ emem ammọ idiọọñọke,”

¹⁸“Uteñe Abasi ibaaha ke iso ammọ.”

¹⁹Idahami ñnyịn imidiọọñọ ke se ado ado ibed ataña, atañ anọ mbon e-ebaaha ke idak ibed, nọ afịd ederimbod edisịne ke ubiire ikpe Abasi.

²⁰Ke ntak ado awo ndomokeed idooho adinen ke iso Abasi ke adinịm ibed; utu ke ado, ato ke ibed ñnyịn idiọọñọ idiọọkñkpọ.

²¹Ado idahami enam ediọọñọ adinenido a-atooho Abasi, ke esiooho Ibed efep: Mbed ye mme Brọfed edoñño mme ntiense.

²²Adinenido ami ato Abasi ke mbuọdidem ke Yisọs Krais anọ afịd mbon se inịm ke akpanikọ. Ukpəghọ ndomokeed ibaaha ke ufọọd mme Yuu ye mme Yentaid,

²³sia afịd awo enam idiọọkñkpọ enyʌñ eduọọ ekpọñ ubọọñ Abasi,

²⁴afịd awo enyʌñ ekịt unen ke mfọn a-atooho adifak ake Krais Yisọs.

²⁵Abasi amaanọ Krais nte uwa a-akpeeghe asio awo ke idiọọkñkpọ ato ke iyiib amọ a-naaha ebo eto mbuọdidem. Anye akenam ami adiwọt ido amọ sia ke adiyọ amọ anye amaafeen mme idiọọk ñkpọ e-ekenamma ke usen edem, inyʌññọ imia ammọ ufen.

²⁶Anye akenam ami adiwọt adinenido amọ ke adaña ini ami, nọ anye anen anyʌñ ado andinam mbon awo enimme Yisọs ke akpanikọ anen.

²⁷Ke mmọ ndin ido ñwọkinua ñnyịn? Emaesio anye ado ifep. Ke ntak ake ibed? Me ke adinịm ibed? Iyo-o, ado ke ntak ibed a-yemme mbuọdidem.

²⁸Ñnyịn isʌk ibo ite ke awo anen ato ke mbuọdidem, ke abeehe adinam se ibed abo enam.

²⁹Nte Abasi ado Abasi mme Yuu ikpọọñ? Me anye idooho Abasi mme Yentaid ñko? Ih, ake mme Yentaid ñko,

³⁰sia adooho Abasi keed kpọd aba, a-adiinọ mme anịm mboppo ke mbuọdidem unen ye mbio a-mmiinịmme mboppo kpa ke ntak mbuọdidem keed ado.

³¹Nte ñnyịn ndin ibiad ibed ke ntak mbuọdidem ami? Idooho ntodo! Utu ke ado, ñnyịn isọsọọñọ ibed.