Read Ibibio Contemporary Bible 2020 Rum 7 Bible Online

Rum 7 - Ibibio Contemporary Bible 2020 bible

Rum 7

¹Ado nte ndufo idiọọñọke, nditọete, sia ami ntañ ikọ nnọ mbon e-ediọọñọke ibed, ke ibed akara awo ke ini anye abaaha ke uwem?

²Nte uwọd-ñkpọ, ke ibed awonwaan ufọk ebe adiana mme ebe amọ adaña nte ebe amọ abaaha ke uwem, ado ebe amọ akpekpa, etat awoawaan ado esio ke ibed ndọ.

³Ndin, adieke awonwaan ado aniehe ebuana ye awodeen mfen ke ini ebe amọ abaaha ke uwem, ekood awonwaan ado asịn efịbe. Ado adieke ebe amọ akpaaha etat anye esio ke idak ibed ndọ, ndin anye idooho asịn efịbe aba, akpekọm anye adọ ebe mfen.

⁴Ke ntodo, nditọete mmi, ndufo ñko emaekpaaña ke ibed eto ikpọkidem Krais ma ndufo enie ewana ye awo mfen, anye a-akesette ke ñkpa, ma ñnyịn inwịm mfịd inọ Abasi.

⁵Sia ke ini abʌkidem akikarake ñnyịn, mme ndiọi udọñ i-ibed akedemmeke ekeba ke utom ke idem ñnyịn, akenamma ñnyịn inwịm mfịd inọ ñkpa.

⁶Ado idahami, ke adikpa nnọ ñkpọ se ikimʌm ñnyịn ikama ini keed e-etat ñnyịn esio ke ibed man ñnyịn inam utom ke ufa usʌñ ake Sịbidịd, idooho ke akaan usʌñ ake uwewed ibed.

⁷Nso-o ke ñnyịn idiitañ ndin? Nte ibed adiọọk? Iyoo! Ado ke akpanikọ, ami ñkpediọọñọke se idiọọkñkpọ ado ke esiooho ibed efep. Sia ami ñkpekediọọñọke se isịnanyen ado adieke ibed mmiikpikibooho ntom, “Kuusịn anyen ke ñkpọ awo.”

⁸Ado idiọọkñkpọ, ke edidat ifed a-mbed anọọhọ, asioño ke idem mmi mme nsio-nsio udọọñ isịnanyen. Sia emaesio ibed ifep, idiọọkñkpọ akpa.

⁹Idaha ibed mmiikibaagha mmaadu uwem; ado ewʌhọ akeadi, idiọọkñkpọ adakka ada anie uwem, ndin ami ñkpa.

¹⁰Ami mmaadikịt ke ado ewʌhọ ke idem amọ a-akpedatta uwem adi akappa adat ñkpa adi.

¹¹Ndin idiọọkñkpọ adat ufañ a-atooho ewʌhọ, ambiaaña miin, nko ato ke ewʌhọ ami ansịn miin ke ñkpa.

¹²Do ndin ibed asana, ewʌhọ ñko asana, anen anyʌñ afọn.

¹³Nte nti ñkpọ, ndin, akappa ado ñkpa annọ miin? Idooho ntodo! Ado ma ediọọñọ idiọọkñkpọ nte idiọọkñkpọ, anye adat ñkpa ansọk miin ato ke se ikifọn ma ato ke ewʌghọ idiọọkñkpọ aneke tʌm adiọọk.

¹⁴Ñnyịn imidiọọñọ ke ibed ado ake sịbidịd; ado ami ndooho ake sịbidịd, e-ñnyam nte ifʌn enọ idiọọkñkpọ.

¹⁵Ami ndiọọñọke se ami nnam. Sia se ami ñyem inam ami nnamma, ado se ami nsua, ado ke ami nnam.

¹⁶Ndin adieke ami nnamma se ami mmeñyemme inam, ami mmenyịmme nte ke ibed afọñ.

¹⁷Daña ñkpọ aba ami, idooho ami ke idem mmi nnam ami, ado idiọọkñkpọ adʌññọ ke idem mmi.

¹⁸Ami mmediọọñọ ke etiñkpọ ndomokeed idʌññọ ke idem mmi, ado ado ke ñkpọ abod mmi. Sia ami mmenie udọñ adinam se ifọn, ado ñkanna nnam.

¹⁹Sia se ami nnam idooho nti ñkpọ a-ami ñyemme inam; Iyoo, ado idiọọkñkpọ a-ami mmiiyemme inam — ado ke ami ñka iso nnam.

²⁰Idahami adieke ami nnamma se ami mmiiyemme inam, idooho ami ñka iso nnam ado aba, ado idiọọkñkpọ a-adʌññọ ke idem mmi anam ado.

²¹Do ndin ami mmekịt ke ibed ami anam ke utom amọ ke idem mi: Ini a-ami ñyemme inam se ifọn, idiọọk ñkpọ ami iyakka nnam.

²²Sia ke ata esịd idem mmi ami mmenem esịd ke adinam ibed Abasi.

²³Ado ami mmekịt ibed mfen a-anamma utom ke idem mmi, a-anwanake ekọñ ye akikere mmi anyʌñ anam ami ndo awo ñkpakọb ibed ake idiọọkñkpọ a-anamma utom ke esịd idem mmi.

²⁴Nso-o utọ atịmede awo ke ami ndo! Anie idiimfak miin isio ke abʌkidem ubọk ñkpa ami?

²⁵Ekọọm anie Abasi, akefakka miin ato ke Yisọs Krais Abọọñ ñnyịn! Do ndin, ami ke esịd idem mmi ndo ifʌn nnọ ibed Abasi, ado ke idiọọk abod mmi ndo ifʌn nnọ ibed idiọọkñkpọ.