Read Ibibio Contemporary Bible 2020 Rum 8 Bible Online

Rum 8 - Ibibio Contemporary Bible 2020 bible

Rum 8

¹Ke ntodo, ubiom ikpe ibaaha inọ mbon e-ebaaha ke Krais Yisọs,

²sia ato ke Krais Yisọs ke ibed ake Sịbidịd a-nọọhọ uwem itat ndufo ayaak ke ibed idiọọkñkpọ ye ñkpa.

³Sia se ibed mmiikinieeghe adudu adinam sia idiọọk ido abod ñnyịn amaabọ anye adudu, Abasi amaanam ke adinọ ukweeñe Ayịn amọ ke mbiod idiọọk ido abʌkidem adido uwa ñkpọ idiọọkñkpọ. Ndin anye amaabiom idiọọkñkpọ ikpe ke uduod abʌkidem,

⁴nọ ato do udọñ uneido aba ayọhọ-ayọhọ ke idem ñnyịn, a-mmiidʌññọ ikeene idiọọk uwem abʌkidem ado akeeneake Sịbidịd.

⁵Mbio e-edʌññọ naña idiọọk ido abʌkidem atemme ammọ esịn akikere ammọ ke mme udọñ abʌkidem ami akara udọñ ammọ; ado mbon se idu uwem a-asañake ke Sịbidịd esịn esịd ammọ ke se ido udọñ Sịbidịd.

⁶Akikere esịd idiọọk ido abʌkidem akarake adat aka ñkpa, ado akikere esịd awo a-Sịbidịd akarake adat aka uwem ye emem.

⁷Akikere a-bʌkidem idiọọknkpọ ado asua mme Abasi, anye isuuho iwuod inọ ibed Abasi, inyʌññọ ikan inam ntooro.

⁸Mbon se abʌkidem akara ikemeke inem Abasi esịd.

⁹Ado, idooho abʌkidem idiọọknkpọ ikara ndufo, ado Sịbidịd ikara, adieke Sịbidịd Abasi, adʌññọ ke esịd ndufo. Ndin adieke awo mmiinieeghe Sịbidịd Krais, anye inieeghe ewana ye Krais.

¹⁰Ado adieke Krais adʌññọ ke idem ndufo akpesʌk ado abʌkidem ndufo amaakpa ke ntak idiọọkñkpọ, Sịbidịd a-inọ ndufo uwem ato ke adinenido Abasi.

¹¹Ndin adieke Sịbidịd Abasi a-akenamma Yisọs ased ke ñkpa adʌññọ ye ndufo, anye a-keanamma Krais ased ke ñkpa ayaanyʌñ anọ abʌkidem ndufo uwem ato ke Sịbidịd amọ, a-adʌññọ mme ndufo.

¹²Ke ntodo, nditọete, ñnyịn iminie iso utom — ado idooho edidʌñ naña abʌkidem ñnyịn ayem.

¹³Sia ndufo ekpeeduuho uwem ekeene udọñ abʌkidem ndufo, ndufo eyaekpañña, ado ekpeeduuho ke Sịbidịd, ndufo eyaewot ndiọiñkpọ abʌkidem enyʌñ edu uwem.

¹⁴Sia ammọ a-Sịbidịd Abasi adatta usʌñ edoñño nditọ Abasi.

¹⁵Sia ndufo ikibọọhọ Sịbidịd a-anamma ndufo emaana edoñño ifʌn a-kpenamma ndufo ebaañña ke ndịk, ado ndufo ekebọ Sịbidịd nditọ amanaisọñ. Ndin ato anye ke ñnyịn ikood uko-uko, “Abba, Ete.”

¹⁶Sịbidịd ami ke idem amọ atie ntiense mme sịbidịd ñnyịn ate ke ñnyịn ido nditọ Abasi.

¹⁷Do ndin adieke ñnyịn idooho nditọ amanaisọñ ndin ñnyịn ido mme adiaakpa — adiaakpa ake Abasi ye mme adiana adiaakpa mme Krais; sia adieke ñnyịn iwuaanake ke ufen amọ ke akpanikọ, iyainyʌñ iwuaana ke ubọọñ amọ.

¹⁸Ami ndat nte ke ufen a-ñnyịn idahami idooho se eben edomo mme ubọọñ a-ñnyịn idiiwana mme anye.

¹⁹Afịd abod asʌk abet ke akpọsọñ udọñ ediyaara nditọ Abasi.

²⁰Sia emaeyak ederimbod esịn ke idak ndutʌkkọ, idooho ke unyimme amọ, ado ato ke ekikere awo a-akesịnne anye ke idodanyen,

²¹ete ke ederimbod ke idem amọ ayaawuọ ke ñkpakọb mbiara ndin adʌk ke ubọkkọ ubọọñ nditọ Abasi.

²²Ñnyịn imidiọọñọ ke afịd ederimbod asʌk akuun nte aba ke ubiak uman ayịn tutu asịm idahami.

²³Idooho abod ikpọọñ, ado ñnyịn ke idem ñnyịn i-inieeghe akpa mfịd Sịbidịd, ikookuun ke esịd idem naña ibet Abasi ye akpọsọñ udọñ ediidat ñnyịn isịn ke ubọọñ nte nditọ amanaisọñ; adooho adinyaaña abʌkidem ñnyịn.

²⁴Sia akedo ke idodanyen ami ke ekinyaaña ñnyịn. Ado idodanyen e-ekịtte idooho idodanyen ndomokeed. Anie adod anyen ke se anye amaakenenie?

²⁵Ado akpedo ñnyịn idotto anyen ke se ñnyịn miinieeghe diin, ñnyịn inie ime ibet ñkpọ ado.

²⁶Ke ukem usʌñ ado, Sịbidịd inyaaña ñnyịn ke ini mmemidem. Ñnyịn idiọọñọke se ñnyịn ikpibeeñe ke akam, ado Sịbidịd ke idem amọ atie ubiọñ mme ñkuun ake ikọ mmiikanna itañ.

²⁷Ndin anye a-aduuñọke esịd ñnyịn adiọọñọ akikere Sịbidịd, sia Sịbidịd atie ubiọñ anọ nditọ Abasi naña asaña ke uduak Abasi.

²⁸Nko ñnyịn imidiọọñọ ibo ke afịd ñkpọ, Abasi anam ke ufọn mbon e-emaaha anye, e-ekoodo ekeene uduak Abasi.

²⁹Sia mbon a-Abasi amaakebaabak idiọọñọ anye ñko amaabak amek ammọ ke mbiod Ayịn amọ, ma anye akpedo akpa ke atu uwak nditọeka.

³⁰Ndin ammọ ado a-anye amaakemeemek, anye ñko akood; ammọ se anye amaekeakood, anye ñko anam ammọ enen; mbon se anye anam enen anye ñkọ anọ ammọ ubọọñ.

³¹Nso ndin, ke ñnyịn idiitañ ke ñkpọ abaaha ntom? Adieke Abasi abaaha mme ñnyịn, anie awo adibiọññọ ñnyịn usʌñ?

³²Anye a-amiikiyimme Ayịn amọ, ado ayaak anye anọ afịd ñnyịn, die ndin ke anye ñko ukem ye anye akpetre aditat ubọk inọ ñnyịn afịd ñkpọ?

³³Anie awo adiben mbon a-Abasi amaakemek ika ikpe? Ado Abasi ke idem ammọ anọ unen.

³⁴Anie ndin ado awo adibiom ñnyịn ikpe? Awo ndomokeed ibaaha. Krais Yisọs a-akekpaaha — a-akanna ado, a-akesette ke ñkpa adʌk uwem — a-anyʌññọ atie ke ubọk udom Abasi nte ubiọñ anọ ñnyịn.

³⁵Anie awo akeme adidiañña ñnyịn ikpọñ ima Krais? Nte mfịna, me ukuud, me ukọbọ, me akañ, me ifed, me ñkpọ ndịk, me ñkpọ afai akeme idiana ñnyịn ke ima Abasi?

³⁶Nte emaekewet: “Ke ntak ndufo ñnyịn isoobo ye ñkpa afịd usen; idat ñnyịn nte mme edọñ a-anaaha nte ewot.”

³⁷Iyo-o, ke mme afịd ñkpọ ami ñnyịn ido mme anditʌm ñnwana ñkan ato anye a-akimaaha ñnyịn.

³⁸Sia ami mmenekke nnịm mbo ke mmenị ke akikere nte ñkpa, me uwem, me mme enyere, me dimọn, me idahami, me ini iso, me adudu keed ake adodo,

³⁹me anyan, me udeme, me ñkpọ ndomokeed ke afịd abod, idiikanna adidiañña ñnyịn ñkpọñ ima Abasi abaaha ke Krais Yisọs Abọọñ ñnyịn.