Read Ibibio Contemporary Bible 2020 Rum 9 Bible Online

Rum 9 - Ibibio Contemporary Bible 2020 bible

Rum 9

¹Ami ntañ akpanikọ ke Krais — Ami nsʌhọke nsu, akikere esịd mmi asọọñọ ami ato ke Adisana Sịbidịd.

²Ami mmenie ekandịk mfʌhọ ye nsinsi ubiak ke esịd mmi.

³Sia ami ñkpaama ensueñ miin ke idem mmi enyʌñ eñkpịkke miin esio ekpọñ Krais ke ntak nditọete mmi, mbon a-nnyịn itooho ubon keed,

⁴ubon Isred. Ake ammọ ado edidat ammọ nte nditọ amanaisọñ, ake ammọ edisana ubọọñ, mme adioomo, adibọ ibed, ukpono ke tembịd ye mme enwọñọ.

⁵Ake ammọ ado mme nsọbom, ndin ato ke ammọ ediọọñọ nte Mesaya aketo adimana nte awo, a-adooho andikara afịd ñkpọ. Yak itooro anie Abasi ke nsi-nsi! Amen.

⁶Idooho nte ke enwọñọ Abasi awuọ ikpu-ikpu. Ado idooho afịd awo se ito Isred edo mbon Isred.

⁷Inyʌññọ ido sia ammọ edoñño nditọ Ebraham, awʌt abo ke afịd ammọ edoñño nditọ Abasi ñko. Ke editʌm ntañ, ñkọ nte ñwed Abasi atañna “Adiito ke nditọ Aisik edidiọọñọ ubon mfo.”

⁸Ke editañ ke usʌñ mfen, idooho mme uduud nditọ abʌkidem edoñño nditọ Abasi, ado nditọ enwọñọ ke edat nte saña-saña ubon Ebraham.

⁹Sia naña ekewet enwọñọ ado ado ami: “Ke ini amaakem Ami ñyaatịmme ndi, ndin Sera ayaanie ayịn awodeen.”

¹⁰Idooho ado ikpọọñ, ado nditọ Ribeka ekenie ete keed ikpọọñ, ete ñnyịn Aisik.

¹¹Ado, mbemiso mme amanamba ado ekemana me edinyʌñ enam eti ñkpọ me idiọọk nọ uduak Abasi a-saññake akedʌk ke se Abasi akeamek asọñ ada.

¹²Itooho ke utom ado ato ke anye a-akoodo — emaedọdọkkọ Ribeka ebo ete, “Akpan ayaanam ñkpọ anọ udo eka.”

¹³Kpa nte emaekewet: “Yekọb ke ñkema, ado Isọ ke ñkesua.”

¹⁴Nso-o ndin ke ñnyịn idiitañ? Nte Abasi inenne? Idooho ntodo!

¹⁵Sia anye adọkkọ Moses, “Ami ñyaanie mbọm nnọ anye a-Ami nnieeghe mbọm nnọ, ndin Ami ñyaanie ekamba esịd mbọm nnọ awo a-Ami nniehe akamba esịd mbọm nnọ.”

¹⁶Ke ntodo, idooho ke udọñ awo me ke edinwana adinam ñkpọ, ado ado ke mbọm Abasi.

¹⁷Sia e-wet ke ikọ Abasi adọkkọ Fero: “Ami ñkudịppe fiin nnim nte Adidem ke ntak uduak ami, nọ ndiyaara adudu Mmi ke idem mfo ma anyịñ Mmi asuana ke afịd iso isọñ.”

¹⁸Ke ntodo Abasi anie mbọm abaña awo se anye ayem inie mbọm nnọ, ndin anye anyʌñ asọñ awo anye eyemme isọñ esịd.

¹⁹Keed ke atu ndufo ayambo miin: “Ndin nso-o ido ntak a-Abasi asʌkkọ akịd ndudue ke idem ñnyịn? Sia anie ikan ibiọọñọ uduak amọ?”

²⁰Ado afo ado soo, O awo edifaaña ikọ mme Abasi? Nte ñkpọ se ebod ayaakappa abo andibod anye ate, “Ntak a-afo ambotto miin ntom-o?”

²¹Nte andibod ñkpọ inieeghe unen adibod utọ ñkpọ iba nto ukem mbad keed ñkpọ ubọọñ, ye adañado-adañado ñkpọ?

²²Yak diin, adieke Abasi akpemekke adiwọt ifiọpesịd amọ ñnyʌñ nnam ediọọñọ adudu amọ, ado ayọ ye akamba ime mme ñkpọ ado e-enọọhọ anye ifiọpesịd a-anye akebeeñeke idem edisoobo?

²³Ñko, akpedo anye akenam ami adiyaara amọ ke ubọọñ nnọọ ñkpọ ami anye aniehe mbọm abaña, a-anye akebakka adiọñ anịm edinọ ubọọñ,

²⁴kpa ñnyịn, a-anye amaakekood, idooho mme Yuu ikpọọñ ado mme Yentaid ñko?

²⁵Nte anye ataña ke ñwed Osiya: “Ami ñyaakood ammọ ‘ikọt mmi’ akpasʌkado ammọ immiidooho ikọt mmi; ami ñkọ ñyaakood anye ‘ima mmi’ akpasʌkado a-nye immiidooho ama mmi,”

²⁶ndin, “Ayaatịppe kpa ke itie e-ekebooho ammọ, ‘Ndufo idooho ikọt mmi’ eyaakood ammọ ‘nditọ aduuwem Abasi.’ ”

²⁷Aisaya abọọñ ke akpọsọñ uyo ke abaña Isred: “Akpesʌk ado nte ibad nditọ Isred ewakka nte ntan ke mben inyañ mme usatusʌhọ kpọd ke edinyaaña.

²⁸Sia Abọọñ ayaasọp abiire ikpe amọ ke ederimbod ama ukeed-ukeed.”

²⁹Ado naña nte Aisaya amaaketatañ: “Ikpiikiidooho Abọọñ Andikpon Ñkan akeakpọññọ ubon asʌhọ inọ ñnyịn, ñnyịn ikpiidiiba nte Sọdọm ñnyịn ikpiidiiba nte Komora.”

³⁰Nso-o ndin ke ñnyịn ibiitañ? Ibiibo ke mme Yentaid, i-diikiikeenekke adinenido, ebọ adinenido a-tooho ke mbuọdidem;

³¹ado mbon Isred, e-ekeekeenekke ibed adinenido, ikanna inie anye.

³²Ke nso-o ntak? Sia ammọ ikiiyemme adinenido ito ke mbuọdidem ado nte ebo ke ato ke utom. Ammọ emaetuak ukod eduọ ke “itiad iduọ.”

³³Nte ewette: “Se Ami nnịm ke Sayọn Itiad a-anamma nọ mme awo ye ekandịk ye itiad a-anamma mme awo eduọññọ ndin awo a-anịmme anye ke akpanikọ ikemeke ikịt asuenne.”