Read Ibibio Contemporary Bible 2020 1 Kọrint 1 Bible Online

1 Kọrint 1 - Ibibio Contemporary Bible 2020 bible

1 Kọrint 1

¹Ami Bọọd e-ekekoodo nte abọsịd Krais Yisọs ato ke uduak Abasi ye ayịneka ñnyịn awodeen a-akereke Sositenesi.

²Enọ ñwed ami esọk ufọkabasi ke Kọrint, ye mbon e-enamma esana ke Krais Yisọs, enyʌñ ekood edido mme ndisana ye ukeed awo ke ukeed itie e-ekoodo anyịñ Abọọñ ñnyịn Yisọs Krais, Abọọñ ammọ ye ake ñnyịn.

³Mfọn ye emem a-atooho Abasi Ete ñnyịn ye Abọọñ Yisọs Krais ado udeme ndufo.

⁴Ami mmekọọm Abasi afịd-afịd ini inọ ndufo ato ke mfọn Abasi inọọhọ ndufo ato ke Krais Yisọs.

⁵Sia ato ke anye emọinyọ ndufo ke afịd-afịd usʌñ ke afịd aditañ ikọ ye ke afịd ifiọk,

⁶Abasi ñko asọọñọ ntiense ndufo kebaña Krais ke idem ndufo.

⁷Ke ntodo, ndufo inanake enọ Adisana Sịbidịd ndomokeed ke ini ndufo esʌkkọ ebet adiyaara Abọọñ Yisọs Krais.

⁸Anye ayaisọọñọ ndufo idem tutu asịm utịd nọ ato do ndufo enana ndo ke usen Abọọñ ñnyịn Yisọs Krais.

⁹Abasi, anye a-akikoodo ndufo asịn ke ewana ye Ayịn amọ Yisọs Krais Abọọñ ñnyịn, ado anam akpanikọ.

¹⁰Mmedat anyịñ Abọọñ ñnyịn Yisọs Krais ikpe ndufo ubọk mbo yak afịd awo enyịmme ye keed aken mbaak ubakka adiba ke atu ndufo nọ ato do ndufo ediana keed ke esịd ye ke akikere.

¹¹Nditọeka, usʌk awo ke ufọk Klo, editañ ebo ke mme utọk aba ke ufọọd ndufo.

¹²Usʌk awo ete, “Ami ndo mbed Bọọd,” awo mfen ate, “Ami ndo mbed Apọdọs”; ñnwen ate, “Ami ndo mbed Kefas”; ñnwen ate, “Ami ndo mbed Krais.”

¹³Me ebabakka Krais? Me Bọọd ke ekekọñ ke eto enọ ndufo? Me ekiduọk ndufo mmọọñ esịn ke anyịñ Bọọd?

¹⁴Mmekọọm Abasi ke ñke duọkkọ awo ndufo ndomokeed mmọọñ ke miibọhọke Krispus ye Keyọs,

¹⁵mbaak mme awo edibo ke ekiduọk ndufo mmọọñ ke anyịñ mmi.

¹⁶(Ih, ami mmaaduọk mbon ufọk Sitefanas mmọọñ, ñko aboiyoke ado ntoiyoke me mmaaduọk awo ñnwen.)

¹⁷Sia Krais ikindọññọ ndiduọk mmọọñ ado akendọñ ndikwọrọ eti etob, itooho ke ikọ ifiọk awo, mbaak adudu krọs Krais adido ke ikpu-ikpu.

¹⁸Sia etob krọs ado ndisịme anọ mbon nsobo, ado ñnyịn e-enyaañake anye ado adudu Abasi.

¹⁹Sia ewet ete: “Ami ñyaasobo aniọñ mbon ifiọk; ntịmede mbufiọk mme ntaifiọk.”

²⁰Mmọ anye afiọk ñkpọ awo? Mmọ anye ataifiọk? Mmọ abia ifiọk eyo ami? Nte Abasi inamma nọ ifiọk ekondo akappa ado ndisịme?

²¹Sia ato ke ifiọk ake Abasi, ekondo ke ifiọk ammọ ikidiọọñọke anye, Abasi amaakop inemesịd ato ke ndisịme se ekwọrọ anyaaña mbon se inịm ke akpanikọ.

²²Mme Yuu eyem idiọọñọ, mme Krik eyem aniọñ,

²³ado ñnyịn ikwọrọ Krais e-ekekọññọ ke eto krọs; adooho ñkpọ ubiọọñọ anọ mme Yuu, ndisịme ñkpọ anọ mme Krik,

²⁴ado mbon Abasi akoodo, mme Yuu ye mme Krik, Krais adudu Abasi mme aniọñ Abasi.

²⁵Sia ndisịme Abasi anie aniọñ akan aniọñ awo; mmemidem Abasi asọñ adudu akan adudu awo.

²⁶Nditọeka, ikere ibaña se ndufo ekedo mbemiso ekebọ ikood. Uwak ndufo ikidooho mbon akpọsọñ aniọñ ke udomo ñkpọ awo; uwak ndufo ikidooho mme awuọiso awo; uwak ndufo ñko ikitooho ekpurikpu imana.

²⁷Ado Abasi amaamek ndisịme ñkpọ ake ekondo nọ ato do asịn awo aniọñ ke buud; Abasi amek mmem-mmem ñkpọ ekondo nọ ato do anam abuud amʌm awo uko.

²⁸Abasi amek usuuk itie ñkpọ ye ñkpọ e-esịnne ke ndek, mme ñkpọ se miibaaha, nọ abiad ñkpọ se iba,

²⁹mbaak awo ndomokeed adikpọ inua ke iso amọ.

³⁰Ado ato ke anye ke afo aba ke Krais Yisọs, a-amaakekappa ado aniọñ ake atooho Abasi, ado ado, etiido ñnyịn, adisana ye adifakka.

³¹Ke ntodo, ke naña ewewet: “Yak awo a-anamma inua anam ke Abọọñ.”