Read Ibibio Contemporary Bible 2020 1 Kọrint 3 Bible Online

1 Kọrint 3 - Ibibio Contemporary Bible 2020 bible

1 Kọrint 3

¹Nditọeka, ñkpekanna mbo ke ndufo edoñño mbon Sịbidịd ado edoñño mbon abʌkidem, mme ata nsekayịn ke Krais.

²Ñkinọ ndufo mmọọñeba, inọọhọ ata ndidia, sia ndufo ikibeeñeke idem adidia ata ndidia. Kpasʌk ado, ndufo isʌkkọ ibebeeñe idem.

³Esʌk eba ke abʌkidem. Sia ufịb ye utọk e-ebaaha ke ufọọd ndufo, nte ndufo ibaaha ke abʌkidem? Nte ndufo inamma ñkpọ nte mbon ñkaña abʌkidem?

⁴Ke ini awo keed abooho, “Ami ndo mbed Bọọd,” awo mfen ate, “Ami ndo mbed Apọdọs,” nte ndufo idooho mbon ñkaña abʌkidem?

⁵Nso-o ke Apọdọs ado? Nso-o ñko ke Bọọd ado? Mbon ami edoñño mme isʌñutom a-atooho ke ammọ ndufo enịm Krais ke akpanikọ, kpa nte Abọọñ anọọhọ awo keed-e-keed ubọkutom amọ.

⁶Ami ñketọ ñkpasi, Apọdọs akeduọk mmọọñ, ado Abasi akenam nọ akọt.

⁷Ke ntak ado, anditọ ye andiduọk mmọọñ idooho ba ñkpọ keed, ado Abasi ikpọọñ, andinam ñkpọ akọt.

⁸Anditọ ye andiduọk mmọọñ enie utom keed, eyaenyʌñ enọ ammọ keed-e-keed utịp a-akemme ke ubọkutom ammọ.

⁹Sia ñnyịn idoñño mme nsaña utom Abasi keed; ndufo edoñño inwañ Abasi.

¹⁰Ke mfọn a-Abasi a-nnọhọ, mmaasịn itiad idakisọñ nte ata abọp ufọk ndin awo mfen adibọp. Ado yak awo keed-e-keed atịñ anyen naña anye abọp.

¹¹Sia awo ndomokeed ikemeke isịn itiad idakisọñ mfen ikan se emaekesesịn, adooho Yisọs Krais.

¹²Adieke awo akamake kood, me sịrifa me nsọñudua itiad, me eto, me mbid, me ndak abọp ke itiad idakisọñ ami,

¹³utom amọ ayaawuọ ada, sia usieere ayaayaara ubọkutom. Eyaeyaara ke ikañ, ndin ikañ ayaadomo ubọkutom awo keed-e-keed.

¹⁴Ñkpọ se anye abọp akpesọñ ada, andibọp ayaabọ utịp amọ.

¹⁵Ado ikañ akpeta, ado ayaatak anye; anye ke idem amọ ayaabọkkọ, ado kpa nte awo a-abọkkọke awuọ ke edeme ikañ.

¹⁶Ndufo idiọọñọke ke ndufo edo itie ukpono Abasi ndin ñko ke Sịbidịd Abasi mmọdo adʌñ ke idem ndufo?

¹⁷Abasi ayaasobo awo keed adohodo a-asoboke itie ukpono Abasi; sia itie ukpono Abasi ado adisana, ndufo edoñño itie ukpono ado.

¹⁸Ikiibiaaña idem ndufo. Awo ndufo ndomokeed akpekere ke iminie aniọñ ake ayo idahami, yak anye akappa ado akọi nọ ato do anye anie aniọñ.

¹⁹Sia aniọñ ake eyo ami ado akọi ke iso Abasi. Nte ewette: “Anye ayaara mbon ifiọk ke ñkara ammọ”

²⁰Emaana ete, “Abọọñ adiọọñọ ke akikere afiọk ñkpọ awo ado ikpu-ikpu.”

²¹Ke ntodo, ke awo akpọ inua aba abaña awo! Afịd-afịd ñkpọ ado ake ndufo,

²²me Bọọd, me Apọdọs, me Kefas, me ederimbod, me uwem, me ñkpa, me ayo mfịn, me ayo iso, afịd inie ndufo,

²³ndin ndufo edo ake Krais, ndin Krais ado ake Abasi.