Read Ibibio Contemporary Bible 2020 1 Kọrint 8 Bible Online

1 Kọrint 8 - Ibibio Contemporary Bible 2020 bible

1 Kọrint 8

¹Idahami, kebaña ndidia uwa e-ewaaha enọ mme ndem: Ñnyịn imidiọọñọ ke afịd ñnyịn iminie ifiọk. Ado ifiọk asaña ye ntañidem, ado ima abọbọp.

²Awo a-akereke ke imọ imidiọọñọ ñkpọ, idiọọñọke ikikem idaha naña anye akpediọọñọ.

³Ado Abasi adiọọñọ awo a-amaaha anye.

⁴Ke ntodo, kebaña adidia ndidia uwa e-enọọhọ mme ndem: Ñnyịn imidiọọñọ “Ke ndem idooho ba ñkpọ ndomokeed ke ederimbod” ñko “Ke Abasi ibaaha ikan Abasi keed.”

⁵Akpedodo mme “abasi” mfen ebañña, me ke anyọñ me ke isọñ (kpa nte mme uwak-uwak “abasi” mme “mbọọñ” ebaññake),

⁶ado ñnyịn inie Abasi keed, Abasi Ete, a-afịd ñkpọ aketooho, anye ñko ke ñnyịn idu uwem inọọ; ñko Abọọñ keed aba, kpa Yisọs Krais; afịd ñkpọ aketo ke anye, uwem ñnyịn anyʌñ ato anye.

⁷Ado idooho afịd awo ediọọñọ ami. Uwa ndem ameeghe ubaak awo ado anam ammọ ekere ke mmimọ imaidia mme ndidia ado, ayetie nte ndidia e-ekewaaha enọ mme ndem, ndin sia esịd ammọ adooho mmem-mmem, adido mbubiam.

⁸Ado idooho ndidia anam nọ ñnyịn ikpere Abasi; idiọọk-ọ-diọọk ye ñnyịn ke ñnyịn ikpidia, inyʌññọ ifọfọn ye ñnyịn ikpitre adidia.

⁹Ado ikpeme mbaak uwuọufʌn adido ñkpọiduọ anọ awo mmemidem.

¹⁰Awo mmemidem akpekịt nte afo awo ifiọk adia ndidia ke itie ukpono ndem, nte ado ikemeke isọọñọ anye idem adidia ñkpọ e-ewaaha enọ ndem?

¹¹Ndin ayịnete a-abaaha ke mmemidem, a-Krais akekpaaha anọ, akịt nsobo ato ke ifiọk mfo.

¹²Ke ini afo anamma nditọete mmemidem edue ke utọ usʌñ ami, afo ñko amedue Krais.

¹³Ke ntodo, adieke se ami ndia anamma nọ ayịnete adue Abasi, ami ndiidiaaha utọ ndidia ado aba, mbaak ndinam anye asop usʌñ.