Read Ibibio Contemporary Bible 2020 2 Kọrint 11 Bible Online

2 Kọrint 11 - Ibibio Contemporary Bible 2020 bible

2 Kọrint 11

¹Mmenie idodanyen ke ndufo eyaeyọ ye ami ke etək ndisịme mmi; ado ndufo emenanam ntodo.

²Mmenie ufịb Abasi ibaña ndufo, sia ñkidat ndufo nnọ ebe keed, nnọ Krais nte adisana abọikpa.

³Ado mmenie ndịk sia naña udʌkikọd akebiaaña Iif ke ñkara, kpa ntodo ke esịd ndufo akeme adiwuọ ñkpọñ akpanikọ ye eti ido ke Krais.

⁴Sia awo akpedi adikwọrọ Yisọs a-akpəhọke ye Yisọs a-ñnyịn ikwọrọke; ekpenyʌñ ebọ sịbidịd a-akpəhọke ye sịbidịd a-ndufo ekebọọhọ, enyʌññọ ekop eti etob a-adooho isio ye anye a-ndufo ekekoppo ke inua ñnyịn, ndufo ibiada ini adinyịmme nnọ ammọ.

⁵Ado ami ñkereke mbo ke ami nsịp ñkan mbon e-ebatta nte mme “akaakan ke atu mme abọsịd.”

⁶Akpesʌk ado mmembọọhọ ukpeeb nte awo udọọñ ikọ ado mmenie ifiọk. Ñnyịn iminam ami anekke iñwaña ndufo ke afịd-afịd usʌñ.

⁷Me akedo idiọọkñkpọ ami adikisuuk idem mmi nọ ato do idịppe ndufo ke adikwọrọ eti etob Abasi inọ ndufo ke mfọn?

⁸Mmaatʌk mme ufọkabasi mfen ke adibọ unwam nto ammọ nọ ndat nnam ñkpọ inọ ndufo.

⁹Kpa ke ini a-ñkebaaha ye ndufo ñyem unwam, ñkedooho mbiomo nnọ baaba awo ndomokeed, sia nditọete e-eketooho Masidonia emaennọ se ñkeyem. Mmedʌt idem mmi nsio adido mbiomo inọ ndufo ke baaba usʌñ keed, ndiinyʌñ ñkakaiso nnam ntodo.

¹⁰Adaña nte akpanikọ Krais ambaaha ke idem, ba awo keed ke afịd Akaya idiintreke nnaminua mmi ami.

¹¹Ntaha? Ado nte ami imaaha ndufo? Abasi adiọọñọ ke mmima ndufo.

¹²Ndin ñyaasʌk ñka iso adinam se nnam ami nọ ato do ñwọt mbon awo e-eyemme ufañ adido ukem-ukem ye ñnyịn ke ñkpọ ammọ enamma inua ebaña itie ammọ.

¹³Sia utọ ibon ado edoñño mme abọsịd nsu, mme anam utom abiaaña, e-ebenne ñkpọ efʌghọ enam nte idoñño mme abọsịd Krais.

¹⁴Idooho ñkpọ ñkpaidem, sia Setan ke idem amọ afʌhọ ñkpọ ma anye atie nte enyere unwana.

¹⁵Idooho ñkpọ ñkpaidem, ndin, adieke mme asañautom Setan ebiotto mme asañautom ndinen ido. Ado utịd ammọ ayaakem ye ubọkutom ammọ.

¹⁶Mmetọọñọ ntak mbo nte, yak ba awo ndomokeed akụụndat miin nte ndisịme. Ado ekpendat nte ndisịme, enyʌñ enyọ nte ndisịme, ma ñkan nduaak inua etək-etək.

¹⁷Ke nduaak inua idem mmi ami, ntañña naña Abọọñ akpetañ, ado mbo ñtañ nte ndisịme.

¹⁸Sia uwak awo eduaha inua naña ederimbod enam, ami ñko ñyaakeene nnam ntodo.

¹⁹Inem ndufo esịd adiyọ ye mme ndisịme, sia ndufo ediọọñọ ñkpọ eti-eti.

²⁰Ke akpanikọ, ndufo emeyọ awo ake adodo i-isịnne ndufo ke ufʌn, ye anye a-adiaaha inie ndufo, ye anye a-atañña idem, ye asio idem ñwọt, me andisiak ndufo ufia.

²¹Ke ndọk mmi, mmenyịmme ke ñnyịn imaimem ibọhọ! Se awo ake adodo akpenieeghe ide adiduaak inua mbaña, ami ntañ ikọ nte ndisịme, ami mmenie uko adiduaak inua mbaña ñkpọ ado ñko.

²²Me ammọ edo mme Ibru? Ntodo ke ami ndo. Me edo mbon Isred? Kpa ntodo ke ami ndo. Me ammọ edo ubon Ebraham? Ntodo ke ami ndo.

²³Me ammọ edoñño mme asañautom Krais? (Ntañ nte awo iwuod aboiyoke.) Ami mmekan ammọ. Mmenam akpọsọñ utom ñkan ammọ, mba ke ufọk ñkpakọb uwak-uwak ini ñkan ammọ, emmia ata akpọsọñ-akpọsọñ ekan ammọ, ensio enọ ñkpa ndin-ndin.

²⁴Mmaabọ ubọk ikpa edịp ye duop mme usʌkkeed nto mme Yuu ñke ntion.

²⁵Ekedat eto ukwak entịm ñke nta, entọ ke itiad akañ keed, ubom asịp ñke nta, mmaanaa ke akpa inyañ ibom akoneyo keed ye uweemeayo keed,

²⁶Mmesaña isañ uwak-uwak ini, mmekịt mfịna ke inyañ, mmekịt afanikọñ ke atu mbon inọ, mmekịt afanikọñ ke ubọk mbon ñnyịn, mmekịt afanikọñ ke ubọk mme Yentaid, mmekịt afanikọñ ke ekamba abio, mmekịt afanikọñ ke esịd idʌñ, mmekịt afanikọñ ke akpa, mmekịt afanikọñ ke ubọk mme nsu-nsu mbon a-minịmme ke akpanikọ.

²⁷Mmenam akpọsọñ utom nnyʌñ ñwaidem, ñtaba idap uwak ini; uwak-uwak ini mmetie abiọñ, ñkop nsaditọñ nnyʌñ nnana se ndia, atuep ammʌm, nnyʌññọ nnie se nsịne.

²⁸Dian ye mme ñkpọ mfen, nyọhọ ye mfịna akikere mbaña afịd mme ufọkabasi.

²⁹Anie awo ke idem amem, ndin idem atre adimmem miin? Anie ke awo aduọ adʌk idiọọkñkpọ, ndin esịd mmi atre ibara nte ikañ?

³⁰Adieke anaaha nte nduaak inua, ñyaaduaak ke mme ñkpọ awọttọ mmemidem mmi.

³¹Abasi ye Ete Abọọñ ñnyịn Yisọs, u-ubọọñ anieeghe ediitooro anye ke nsi-nsi, a-adiọọñọke nsʌhọke nsu.

³²Ke Damaskọs akọfnọ ke idak Adidem Adetas amaanịm mbon ukpeme ke abio ate emmʌm miin.

³³Ado emaensịn ke akpasa, ensio ke windo ensuuk ke mben ndibene tutu nsịm isọñ, ntodo ke ñkebọkkọ anye.