Read Ibibio Contemporary Bible 2020 2 Kọrint 2 Bible Online

2 Kọrint 2 - Ibibio Contemporary Bible 2020 bible

2 Kọrint 2

¹Ndin mmaabiire nte ke ndiitịmmeke nnam isañ mfen adinọ ndufo ubiak.

²Sia adieke ami nnamma ndufo efʌghọ, anie ndin isʌhọ a-adinnem miin esịd ke miibọhọke kpa ndufo a-ami nnamma nọ efʌghọ?

³Ndin ñkewet ñwed ke ntak ami, mbaak mmaadi ndibọ mfʌghọ ke ubọk mbon a-ami ñkpekoppo idadesịd nto sia mmenie idodanyen ke afịd ndufo, nte ke idadesịd mmi ado idadesịd afịd ndufo.

⁴Sia aketo ke ekamba ukuud ye mbaba ke esịd akenam ñwet ñwed ado nnọ esọk ndufo ye mmọọñayịd; ñkewette nọ ato do ndufo eba ke mfʌghọ, ado nọ ndufo ekpediọọñọ utọ ntotəño ima a-nnieeghe inọ ndufo.

⁵Ado akpedo aba awo a-anamma mfʌghọ aba, inekkeke ido ami ke anye anọ mfʌghọ, akap ado afịd ndufo, akpesʌk ado ami mmenie ake mmi ñko, mbaak adiba nte mmenekke ndiọọk itañ.

⁶Ufen ake uwak awo ekenọọhọ akem ye utọ awo ado.

⁷Ntom ke ndufo ekpekap afeen enọ anye, enyʌñ edọñ anye esịd, mbaak akaakan mfʌghọ adiben anye amen.

⁸Ke ntodo, mmikpeiye ndufo nte emaana esọọñọ ima a-ndufo emaaha anye.

⁹Ntak mfen ami ñkiwette ndufo ado ke ñkeyem idiọọñọ me ndufo eyaekan eboiyo udomo enyʌñ enam item ke afịd ñkpọ.

¹⁰Awo keed ake adodo ake ndufo afeene ñkpọ enọ, ami ñko mmafeen awo ado. Se ami mfeen, akpedo aba se efefeen, ami mmafeen ke iso Krais ke ntak ndufo,

¹¹mbaak Setan adikan ñnyịn ubọk ke baaba usʌñ ndomokeed; sia ñnyịn miinanake ifiọk ibaña ñkara amọ.

¹²Ke ñkekaaha Troas adikikwọrọ eti etob Krais, ñkekịt ke Abọọñ amaabeere usʌñ annọ miin,

¹³ami ñkenieeghe emem ke sịbidịd sia mmeñkekịtte Taitọs ayịnete mmi (awodeen) do. Ndin mmakọọm ammọ itiesʌñ mboiyo do ñka Masidonia.

¹⁴Ado ekọọm anie Abasi, i-idatta ñnyịn asaña ubọọñ-ubọọñ ke Krais afịd-afịd ini, a-anyʌññọ idat ñnyịn anam ekop anwa-anwa ufịk ifiọk Andinyaaña ke inua ñnyịn ke afịd itie.

¹⁵Ñnyịn iba nte inem ufịk ake Krais inọ Abasi ke atu mbon e-enyaañake ye mbon e-etakka.

¹⁶Ke mbon keed ñnyịn ido idiọọk ufịk ñkpa, ado ke mbon mfen ñnyịn ido eti ufịk uwem. Ndin anie ikan inam utọ utom ado?

¹⁷Ñnyịn ibaaha nte uwak awo e-enyamma ikọ Abasi edia udod. Utu ke ado, ado ke Krais ñnyịn itañ ikọ ke iso Abasi ke esịd akpanikọ, nte mme awo a-Abasi asiooñoke adọñ.