Read Ibibio Contemporary Bible 2020 Kadesia 1 Bible Online

Kadesia 1 - Ibibio Contemporary Bible 2020 bible

Kadesia 1

¹Ado ami Bọọd abọsịd e-esiooho edọñ, idooho mme awo inyʌññọ ido awo ndomokeed andọñ, ado Yisọs Krais mme Abasi Ete, a-akenamma anye ased ke ñkpa,

²ye afịd nditọete e-ebaaha ye ami. Enọ esọk ufọkabasi ke Kadesia.

³Mfọn ye emem a-atooho Abasi Ete ye Abọọñ ñnyịn Yisọs Krais aba mme ndufo.

⁴Anye a-akenọọhọ idem amọ ke ntak mme idiọọkñkpọ ñnyịn ma inyaaña ñnyịn asio ke idiọọk ayo emana ami, nte asañake akekem ke uduak Abasi Ete,

⁵ubọọñ anieeghe anye ke nsi-nsi, nsi-nsi. Amen.

⁶Añkpa idem eti-eti ke ndufo emesọsọp esịn anye a-akikoodo ndufo ke mfọn Krais ndin ekappa ekpañ utọñ enọ etob mfen,

⁷a-mmiidooho ata eti etob ke ba usʌñ ndomokeed. Ami mmediọọñọ ke abañña mme awo e-edinamma esịd ndufo adʌk ndutịme sia ammọ enwana adibiabiad eti etob Krais.

⁸Ado adieke ñnyịn, mme idem enyere a-atooho abio ubọọñ Abasi akpadikwọrọke eti etob mfen a-mmiidooho se ñnyịn imaikikwọọkwọrọ inọ, yak ebiom anye ikpe.

⁹Naña imaikitatañ, ñnyʌñ mmaana ñtañ: Awo ndomokeed akpekwọọrọ eti mbʌk a-awuọọhọ akpọñ se afo umaukunyimme, yak eba ke isuuñọ Abasi?

¹⁰Idahado me ami ñnwana adinem mme awo esịd mme Abasi? Mme ami ñnwana adinam esịd anem mme awo? Akpedo ñkesʌk ñnwana adinem mme awo esịd, ñkpedooho isʌñutom Krais.

¹¹Ami ñyem ndufo nditọete ediọọñọ ke eti etob: a-ami ñkekwọọrọke idooho ubọkutom awo,

¹²Ami ñkibọọhọ anye nto awo ndomokeed, inyʌññọ ido nte ekeñkpeekpeeb; ñkebọ nto adiyaara Yisọs Krais.

¹³Sia ndufo emekop ebaña akpa usʌñ eduuwem mmi ke idak edu ukpono Abasi mme Yuu naña ñkesidutʌkkọ ufọkabasi afai-afai ke afịd usʌñ mme naña ñkeyem adibiabiad ukeed nsio.

¹⁴Mmaadọọk idaha ke edu ukpono Abasi mme Yuu ñkan uwak mme Yuu e-ekedooho ubọk ñka mmi, ñkenyʌñ nsịn idem eti-eti ke adinam eduuwem mme eteete mmi.

¹⁵Ado ke ini Abasi a-akensiooho miin asaña-asaña anịm tọọñọ ke emana mmi a-akenyʌññọ añkood ke mfọn amọ, anemme esịd

¹⁶adiyaara Ayịn amọ ke ami ma ato do ñkwọrọ anye ke atu mme Yentaid, ami ñkebịppe awo ndomokeed,

¹⁷ñkenyʌññọ ñka Yerusedem mbo ñkekịt mbon e-ekembemme iso edo abọsịd, ado ñkesọọsọp ñka Arebia, ñkema nditịmme ñka Damaskọs.

¹⁸Ke isua ita emaekeboiyo mmaadidọọk ñkaa Yerusedem mbo ñkediọọñọ Kefas ñnyʌñ ntie mme anye usen duop ye ition.

¹⁹Ami ñkekịtte mme abọsịd mbon ñko ibọọhọke Yemsi ayịneka Abọọñ ñnyịn.

²⁰Ami mmenwọñọ ke iso Abasi mbo ke afịd se ñwed ndomokeed idooho nsu.

²¹Akema, mmaadika Siria mme Sidisia.

²²Ami ke idem mmi, mme ufọkabasi ke Yudia e-ebaaha ke Krais ikindiọọñọke.

²³Ammọ ekekop etop kpọd: “Awodeen a-akesidutʌkkọke ñnyịn, adikwọkwọrọ ikọ mbuọdidem a-anye akenwanake-nwana adisobo.”

²⁴Ndin ammọ emaetooro Abasi ke ntak mmi.