Read Ibibio Contemporary Bible 2020 Kadesia 4 Bible Online

Kadesia 4 - Ibibio Contemporary Bible 2020 bible

Kadesia 4

¹Se ami ntañ ado ke adaña ini a-adiaakpa adooho etəkayịn, ukpəhọ ibaaha ke atu anye mme afʌn, akpesʌk ado anye anieeghe ukeed se ete ekekpa ekpọñ.

²Ana anye asịne ke idak ukara mme andikama anye mme mbon se ekeyak afịd ñkpọ esịn ke ubọk tutu ini e-ete amọ akenịmme adikem.

³Kpa ntodo ñko, ke idaha a-ñnyịn ikidoññoke ntəkayịn ikibañña ke ufʌn ke idak mme ibed ukara ederimbod.

⁴Ado ke ini amaakedikem ayọhọ-ayọhọ, Abasi amaadọñ Ayịn amọ a-akemanake ato awonwaan, amana ke idak ibed,

⁵nọ adifakka mbon e-ebaaha ke idak ibed, nọ ñnyịn ikan ibọ ayọọhọ unen nditọ.

⁶Sia ndufo edoñño nditọ, Abasi amaadọñ Sịbidịd Ayịn amọ isịn ñnyịn ke esịd, Sịbidịd a-asiooho uyo akood “Abba,” Ete.

⁷Ke ntodo afo udooho aba afʌn, ado Ayịn, ndin sia afo adooho Ayịn, Abasi unam fiin ñko adiaakpa.

⁸Akpa, ke ini a-ndufo mmiikidiọọñọke Abasi, ndufo ekedoñño ifʌn enọ mbon e-edooho ke idem ammọ, idoññoke mme abasi.

⁹Ado idahami emaediọọñọ Abasi, ke editʌm ntañ Abasi idiọọñọ ndufo, nsinam ekanna edem emaana ebịne mme ntək mmem-mmem ndiọi sịbidịd edo? Eyem ammọ emaana isịn ndufo ke ufʌn?

¹⁰Ndufo esʌk ese mme akpan usen, mme afiọñ ye mme ini ye mme isua.

¹¹Ndịk annam miin ibaña ndufo, sia adiba nte afịd ufen mmi ke idem ndufo ababaha.

¹²Ami mmikpe ndufo ubọk nditọete, ekappa eba nte ami, sia ami mmaakappa mba nte ndufo. Ndufo innamma miin idiọọkñkpọ.

¹³Nte a-ndufo emaediọọñọ akedo ke ntak udọñọ ke ami ñkekwọọrọ ikọ inọ ndufo ke akpa ifed.

¹⁴Akpesʌk ado nte udọñọ mmi akedooho nte ñkpọ idomo inọọ ndufo, ndufo ikiñkamake miin nsak-nsak, utu ke ado emaedaara edidi mmi nte ñkedo enyere Abasi; nte ñkedo Krais Yisọs ke idem amọ.

¹⁵Nso-o ikitịppe inọ afịd inemesịd ndufo? Ami mmekeme editañ ikọ ntiense mbo ke akpedooho emaekan enam ntodo, ekpaekesiooño mme anyen ndufo ennọ miin.

¹⁶Nte mmekappa ndo asua ndufo ke edidọkkọ ndufo akpanikọ?

¹⁷Mbon awo ado e-enekke esịn idem ke edidʌt ndufo nnọ idem ammọ ado idooho ke eti. Se ammọ eyem ado edidiañña ndufo ikpọñ ñnyịn, nọ ato do ndufo ekappa ekeene ammọ afịd-afịd.

¹⁸Afọfọn edinekke nsịn idem adieke adooho ke eti ntak, mme edinyʌñ nnam ntodo afịd ini, ado idooho ke mmaadiba ye ndufo kpọd.

¹⁹Ndima nditọ mmi, a-adooho ke ntak ndufo ami mmaana mba ke ubiak adimaana mman ndufo tutu ebot Krais ke esịd ndufo.

²⁰Ñkpaama adieke ñkpekanna ediba mme ndufo idahami ñnyʌñ ñkpəhọ uyo mmi, sia idem a-anekeke añkpa miin ibaña ndufo.

²¹Indọkọ miin, ndufo e-eyemme ediba ke idak ibed, ndufo idiọọñọke se ibed atañ?

²²Sia ewed ebo ke Ebraham akenie nditọ ideen iba, keed akemana ato afʌn awonwaan, anye ako akemana ato amanaisọñ awonwaan.

²³Ayịn a-afʌn awonwaan akemanna ke ñkaña usʌñ; ado ayịn a-amanaisọñ awonwaan akemanna adi ato ibọọrọ enwọñọ.

²⁴Eekeme edidat mme ñkpọ ami nte ñke, sia mme ibaan ami eda enọ nsio-nsio edioomo iba. Akaaña keed ato Abod Sainai anyʌñ aman nditọ e-ediidoñño ifʌn: anye ami ado Haka.

²⁵Ndin Haka ada anọ Abod Sainai ke Arebia a-anyʌññọ aba nte abio Yerusedem abio mfịn, sia anye asịne ke ufʌn mme nditọ amọ.

²⁶Ado Yerusedem a-abaaha ke anyọñ idooho afʌn ndin anye ado eka ñnyịn.

²⁷Sia ewewet: “Nem esịd, O ada, afo a-akenam muumanna ayịn: nsio ñkpo idaara nyʌñ bọọñ ke ekamba uyio; nyʌñ sio ñkpo afo a-akenam mmuukoppo ubiak uman; sia nditọ awonwaan a-amiinieeghe ebe ewak ekan ake andinie ebe.”

²⁸Idahami ndufo, nditọete, nte Aisik, edoñño nditọ enwọñọ,

²⁹Ke ini ado ayịn a-akemanake ke ñkaña usʌñ amaatʌkkọ ayịn a-akemanake ato adudu Sịbidịd. Ado ukem idahami.

³⁰Ado nso-o ke ñwed Abasi atañ? Bịne afʌn awonwaan ado sio mme ayịn amọ, sia ayịn afʌn awonwaan tutu amama idiiwaanake ñkpọ ke edidia akpa mme ayịn amanaisọñ awonwaan.

³¹Ke ntodo, nditọete, ñnyịn idooho nditọ afʌn awonwaan, ido ake amanaisọñ awonwaan.