Read Ibibio Contemporary Bible 2020 Kadesia 5 Bible Online

Kadesia 5 - Ibibio Contemporary Bible 2020 bible

Kadesia 5

¹Ke ntak adinam ñnyịn ido mme nditọ amanaisọñ ke Krais akisiooño ñnyịn ke ufʌn. Sọọñọ da, ndin, kuumaana uben akpọnọ ufʌn ukọñọ.

²Wet ikọ mmi nịm, ami Bọọd ntañ mbo ke emaeyak inịm ndufo mboppo, Krais idiinieeghe ufʌn ndomokeed inọ ndufo.

³Nsʌk mmaana ntañ nnọ afịd se iyak idem ammọ inọ unịm mboppo ke e-emaana etịmme ekekpono afịd ibed.

⁴Ndufo e-enwanake edibọ utoppo ikpe nto ke ibed emaidiañña ndufo ekpọñ Krais; ndufo emewuọ ekpọñ mfọn.

⁵Ado ke mbuọdidem ye ke ñnyekidem ñnyịn isʌk ibet mme nti ido a-ñnyịn idotto anyen ibaña ato ke Sịbidịd.

⁶Sia ke Krais Yisọs adinịm mboppo mme aditre adinịm mboppo ibaaha ufọn ndomokeed. Ñkukwere ñkpọ a-abaaha ufọn ado mbuọdidem e-ekịtte eto ima.

⁷Ndufo ekefeghe eti itọk. Anie awo ikikpịkke ndufo iso ibo ikiinịm se ido akpanikọ?

⁸Utọ ukpek ado itooho anye i-ikoodo ndufo.

⁹Etək yis asinam afịd eboho uyo atịt.

¹⁰Ami mmenie isọñesịd ke Abọọñ mbo ke ndufo idiidʌkkọ usʌñ mfen. Anye i-itoppo ndufo asịn ke ndutịme, ake anye akpedodo, ayaabọ ufen.

¹¹Nditọete, adieke adooho nsʌk ñkwọrọ adinịm mboppo, ntak e-esʌkkọ eduntʌkkọ miin-e? Ke utọ usʌñ ado ñkpọ iyadesịd ke krọs ibaaha aba.

¹²Amaado mme andisịn ndutịme ado, ñkpaama ammọ edusuunọ idem ammọ!

¹³Ndufo, nditọete mmi, ekikood ndufo ebo nọ ebọkkọ. Ado ikiidat ubọkkọ ndufo inam idiọọkñkpọ, utu ke ado inam ñkpọ inọ emọ-emọ ke ima.

¹⁴Afịd-afịd ibed esaña ekedʌk ke ibed keed kpọd: “Ma mbọhọidʌñ mfo nte idem mfo.”

¹⁵Adieke ekaaha iso ke adidom ñnyʌñ mbiaad emọ-emọ, ikpeme, mmiidooho ntodo eyaeduwotto idem ndufo.

¹⁶Ke ntodo, ami mbo, idu uwem ke Sịbidịd, ndin ndufo idiibọọhọ uyʌkkọ ke mme udọñ abʌkidem.

¹⁷Sia abʌkidem ayem se Sịbidịd miimaaha, ndin Sịbidịd inyʌññọ iwʌrọ se abʌkidem ama. Sịbidịd mme uduod idiọọkñkpọ eba ke ndusuaara, ke ntodo ukanna unam se afo ayem inam.

¹⁸Ado adieke afo abaaha ke ndadusʌñ Sịbidịd, afo ubaaha ke idak ibed.

¹⁹Mme utom abʌkidem eba anwa-anwa: use, efịbe, unana adisana uwem;

²⁰ukpono ndem ye ufọt ifọd, unana mfadidem, usua, ntịme, ufịb, ubakka

²¹ye ufịb, edikpa mmịn, usiak uduọd ñka mfen, udia uwem ye mme ndiọi uwem mfen. Ami mmetañ inọ ndufo nte mmaaketatañ, mbon e-eduuho uwem ntom idiidʌkkọ ke abio ubọọñ Abasi.

²²Ado mfịd Sịbidịd ado ima, idadesịd, emem, ime, mfọnido, eti uwem, mbuọdidem,

²³ifuuro-ifuuro uwem mme mfadidem. Mbed ndomokeed ibịọñọke mme ñkpọ ntodo.

²⁴Mbon e-ebaaha ke Krais Yisọs emaekọñ abʌkidem ye afịd nduwʌd ye idiọọk itọñ ammọ ke krọs.

²⁵Sia ñnyịn iduuho ke Sịbidịd, yak ñnyịn isaña ke Sịbidịd.

²⁶Yak ñnyịn ikuukappa ikịt idem, inam esịd ayat emọ-emọ ñnyʌñ nnie ufịb ye emọ-emọ awo.