Read Ibibio Contemporary Bible 2020 Fidibai 1 Bible Online

Fidibai 1 - Ibibio Contemporary Bible 2020 bible

Fidibai 1

¹Bọọd ye Timoti, mme isʌñutom Krais Yisọs. Ewed enọ afịd ndisana ikot Abasi ke Krais Yisọs ke Fidipai, ye mme etubom ye mme dikịn:

²Mfọn ye emem a-atooho Abasi, Ete ñnyịn ye Abọọñ Yisọs Krais isịm ndufo.

³Ami ñkọkọọm Abasi mmi afịd-afịd ini ami itoiyoke ndufo.

⁴Ke afịd akam se ami mbọñ inọọ afịd ndufo, afịd ini nsʌk nsibọñ ke inemesịd ke

⁵ntak adiwana keed ke eti etob tọọñọ ke akpa usen tutu asịm idahami,

⁶sia mmenie ayọhọ nsọọñọnda ke ami ke anye a-aketọọñọke nti utom ke idem ndufo ayaaben anye akesịm utịd tutu usen ake Krais Yisọs.

⁷Ado nnen-nnen ñkpọ ami adinie utọ udọñ ami ibaña afịd ndufo, sia ami ikamake ndufo ke esịd mmi, sia mme ñyịre ke ñkpọnọ me adifaaña nnọ, me nsọ-sọọñọ eti etob, afịd ndufo emekeene ewuaana ke mfọn Abasi ye ami.

⁸Abasi akeme aditie ntiense naña ami nnie udọñ ibaña afịd ndufo ye ima ake Krais Yisọs.

⁹Ndin akam mmi ado: yak ima ndufo akpokpon akan ke ifiọk ye ekike,

¹⁰nọ ndufo ekan edikan ndiọọñọ ñkpọ se ifọn a-akemeke adisana ñnyʌñ nnana ndo tutu usen Krais,

¹¹a-keyọihọke me mfịd nti ido a-atooho ke Yisọs Krais ke ubọọñ ye itooro Abasi.

¹²Idahami ñyem ndufo, nditọete, ediọọñọ ke se ikitịppe innọ miin atọtʌm anyaaña ke adinam eti etob akaaka iso.

¹³Ke ntak ami, amaakappa anwaña afịd mme akpeme atʌñ adidem ye afịd mbon mfen ke ami mba ke ñkpakọb ke ntak Krais.

¹⁴Ato ke mme ñkpọnọ mmi, uwak mme nditọete ke Abasi enie nsọọñọukod aditañ ikọ Abasi uko-uko inyʌññọ ifeghe ndịk.

¹⁵Ado akpanikọ ke usʌk awo ekwọrọ Krais ke ufịp mme utọk, ado usʌk awo enyʌñ ekwọrọ ke etiesịd.

¹⁶Mbon e-ekwọrọke ke etiesịd enam ado ke ima, ediọọñọ ke insịn miin mmi ke ntak adifaaña nnọ eti etob.

¹⁷Mbon e-ekwọrọke ke utọk ye ufịb ekwọrọ Krais ato ke udọñ adiwọt idem ammọ, idooho ke akpanikọ, ekere ke mmimọ imikeme adinam insịn miin ke ntịme ke ini ami nsịneke ke ñkpọnọ.

¹⁸Ado ufọn aba mọọ? Akpan ñkpọ ado ke afịd usʌñ, mme ato ke nsu-nsu udọñ me akpanikọ, esʌk ekwọrọ Krais. Ndin ato ke ntak ami esịd mmi a-anem. Ih, ami ñyaasʌk ñkakaiso adinem esịd.

¹⁹Sia ami mmediọọñọ ke ayaato ke akam ndufo, ye unwam Abasi a-Sịbidịd Yisọs Krais anọọhọ, ñkpọ se ikitịppe ami inọọ miin ayaakappa ado ñkpọ ubọkkọ annọ miin.

²⁰Ami ke udọñ esịd nsʌk nse ñnyʌñ nsʌk ndodanyen mbo ke ndiikoppo abuud ke baaba usʌñ ndomokeed, ado ke ñyaasọọñọ nda nte ñkanna ma ato do, idahami ye ke afịd ini, eyaedịppe Krais ke idem mmi, adooho ke uwem mme anyʌñọ ado ke ñkpa.

²¹Ke idem mmi, adidu uwem ado Krais, adinyʌñ ñkpa ado udod.

²²Adieke anaaha ñka iso adidu ke abʌkidem, ami adiwuọ utom a-anwịmme mfịd annọ miin. Kpa ye ado, nso-o ke ami ndiimek? Ami ndiọọñọke!

²³Ami nda ke ufọọd ñkpọ iba ami: Ami mmenie udọñ adikpọñ ñnyʌñ mba ye Krais, a-atʌmmọ afọn akan;

²⁴ado anekke anie ufọn inọ ndufo ami ediba ke abʌkidem.

²⁵Sia mmeyʌkkọ ke ado, ami mmediọọñọ ke ñnyaasʌhọ mi, ñko ami ñnyaanyʌñ ñka iso ye afịd ndufo ke ntak ñkaiso ndufo ye inemesịd ke mbuọdidem,

²⁶nọ ato do ke ami adimaana mba ye ndufo, inemesịd ndufo ke Krais Yisọs adiyọhọ aduọiyọ ke ntak mmi.

²⁷Daña akpedodo, ikama idem ndufo ke usʌñ a-adotto ke eti etob Krais. Ndin mme ndedi ndikịt ndufo me ñkokop ibaña ndufo ke ini membaaha, ami ñyadiọọñọ ke ndufo emesọọñọ eda ke Sịbidịd keed, enyʌñ enwana nte awo keed ke abaña mbuọdidem eti etob.

²⁸Ikiiyak ndịk imʌm ke ntak mbon e-enwanake mme ndufo. Ami ado idiọọñọ anọ ammọ ke eyaesobo ammọ ado ke eyainyaaña ndufo ñko ke Abasi.

²⁹Sia emaesaana eyaak enọ ndufo, ke iwuod Krais, idooho adinịm anye ke akpanikọ ikpọọñ, ado adinyʌñ mbọọ ufen ke ntak amọ,

³⁰sia adooho esʌk ebọ ukem mfịna a-ndufo ekekịtte naña ami nnie, e-enyʌññọ ekop ke nsʌk nnenie.