Read Ibibio Contemporary Bible 2020 Fidibai 3 Bible Online

Fidibai 3 - Ibibio Contemporary Bible 2020 bible

Fidibai 3

¹Ke akpatre, nditọete mmi, idatesịd ke Abọọñ! Idooho mfịna innọ miin adimaana ñwet ukem ñkpọ ami innọ ndufo, sia ado ukpeme afọññọ ye ndufo.

²Itịñ anyen ise mme ewa ado, mbon e-enamma idiọọk, mme andisappa abʌkidem.

³Sia ado ñnyịn ido mme anịm mboppo, ñnyịn i-ikponoke Abasi ke Sịbidịd amọ, u-ubọọñ ñnyịn adooho ke Krais Yisọs, ñko ñnyịn idot anyen ke Krais Yisọs, idooho ke abʌkidem,

⁴akpesʌk ado ami ke idem mmi mmenie mme ntak adikpinie utọ idodanyen ado. Adieke awo ndomokeed akereke ke iminie mme ntak adinie utọ idodanyen ado ke abʌkidem, ami mmenie awak akan:

⁵Ekenịm mboppo ke ayọhọ usen itiaita, nto ubon Isred ke ufọk Benyamin, awo Ibru ke ubon Ibru, ke ñkañ ibed ndo awo Farisi;

⁶ke adikinie udọñ adikọbọ ufọkabasi; ke adinen ke ibed, ñkenieeghe ndudue ndomokeed.

⁷Ado afịd se ikido udʌk innọ miin, ndikịt idahami nte ntakudua ato ke ntak Krais.

⁸Mfen ñko, ñkịt afịd ñkpọ nte ntakudua adieke ebenne edomo mme anana mbied akwa ifiọk edidiọọñọ Krais Yisọs Abọọñ mmi, a-adooho ke ntak amọ ukeed ñkpọ akappa ado ntakudua. Ami ñkịt afịd ammọ nte mbio, ma ato do ami nnie Krais nte udʌk,

⁹ñko enyʌñ eñkịt miin ke anye, nnieeghe nti ido ake mmi a-atooho ke ibed, ado anye a-atooho ke mbuọdidem ke Krais nti ido a-atooho Abasi ado ke mbuọdidem ke Krais.

¹⁰Ami ñyem adidiọọñọ Krais ye adudu adised ke ñkpa amọ mme ewana adikeene ñwuana ke mme ukuud amọ,

¹¹ke ntak ado, naña adodo, adisịm adised ke ñkpa.

¹²Idooho nte ami mmebọbọi afịd mme ñkpọ ami me ke emaenanam mfọn mma, ado ami nsʌk ñnwanwana ñka iso adikimʌm ñkpọ ado a-Krais Yisọs akedatta ammʌm miin.

¹³Nditọete, ndatta idem mmi nte mmemʌm anye ñkama dion. Ado ñkpọ keed ke ami nnam; Adifre mbaña se imaikiboiyo ndin ñnyanna mbịne se ina ke iso.

¹⁴Ami nsʌk ñnwana adikisịm itie edikan ma mbọ ñkpọ ayịnutom nduba a-Abasi akeñkoodo anọ abio Abasi ke Krais Yisọs.

¹⁵Afịd ñnyịn i-ikponno inyʌñ idiọọñọ idem akpena ida ikịt mme ñkpọ ke utọ usʌñ ami. Ñko adieke abaaha ñkpọ a-ndufo ekereke ebaña ke nsio-nsio usʌñ, anye ado ñko Abasi ayaanam inwaña ndufo.

¹⁶Daña adodo, yak idu uwem nte asañake akekem ke itie a-ñnyịn imaikisesịm.

¹⁷Idiana ye mbon mfen ke edisaña ke uwọd-ñkpọ mmi, nditọete, inyʌñ ise mbon eduuho uwem a-asañake akekem ke udomo a-ñnyịn ikinọọhọ ndufo.

¹⁸Sia kpa nte nsimaaha adidọkkọ ndufo tọọñọ ke akpa, ye idahami, mmaana ntañ mme mmọọñayịd ke anyen mmi, uwak awo edu uwem nte mme asua krọs Krais.

¹⁹Utịd ammọ ado nsobo, Abasi ammọ ado idịp ammọ, ndin ubọọñ ammọ asịne ke ñkpọ abuud ammọ. Esịd ammọ asịne ke mme ñkpọ isọñ ami.

²⁰Ado abio idʌñ ñnyịn aba ke abio Abasi. Ndin ñnyịn isʌk ibet ye udọñ esịd Andinyaaña ake atooho do, Abọọñ ñnyịn Yisọs Krais,

²¹anye a-adooho ke adudu a-anọọhọ anye ukeme adiben afịd ñkpọ nsịn ke idak amọ, ayaanam usuuhọ-usuuhọ ikpọkidem ñnyịn ami akappa atie nte idem amọ ke ubọọñ.