Read Ibibio Contemporary Bible 2020 Fidibai 4 Bible Online

Fidibai 4 - Ibibio Contemporary Bible 2020 bible

Fidibai 4

¹Ke ntodo nditọete, ndufo a-ami mmaaha ñnyʌñ nnie udọñ nnọ, inemesịd mmi ye anyanya mmi, ado naña ndufo ekpesọọñọ eda ke Abọọñ, mme adima ufan mmi!

²Ami mmekpeiye Eyudia ubọk, mmenyʌñ ñkpe Siintaike ubọk mbo yak ammọ awo iba edukemme esịd ke abọọñ.

³Ih, ñko mmenyʌñ mbeeñe ndufo nte ekop item andikeene ñkọñọ akpọnọ, nyaaña mme ibaan e-ekedaaha mme ami ke adinam utom eti etob, ye Kremen ye afịd mbon ñko e-eñkeeneke enam utom, a-adooho anyịñ ammọ mmọdo ke ñwed uwem.

⁴Inemesịd ke Abasi ukeed ini, yak nsʌk mmaana mbo nte: Inemesịd!

⁵Iyak afịd awo ekịt ke enie ifuuro-ifuuro uwem. Abọọñ akpere.

⁶Ikiiyak mfịna ndomokeed ifịna ndufo, ado ke afịd ñkpọ, ke akam ye ebeeñe ye adinọ ekọọm, iben mme ebeeñe ndufo inịm Abasi ke iso.

⁷Ndin emem Abasi a-akanna afịd ifiọk, ayaakpeme esịd ndufo ye ekikere ndufo ke Krais Yisọs.

⁸Ke akpatre, nditọete, se idodo a-adooho akpanikọ, se idodo a-akamake ubọọñ, se idodo a-anenne, se idodo a-asanake, se idodo a-ayaiyake, se idodo e-emaahama, adieke ñkpọ ndomokeed afọnnọ ama, me ado se ekpetooro ikere ibaña utọ mme ñkpọ ado.

⁹Se adodo a-ndufo emaekekpeeb me ebọbọ me ekokop ento miin, me eñkịt miin ke idem isịn mme ñkpọ ado ke adinam. Ndin Abasi emem ayaaba mme ndufo.

¹⁰Ami mmenem esịd eti-eti ke Abọọñ sia ke akpatre udọñ ndufo edise ñkpọ imbaña miin amaana ademme.

¹¹Ami ntañña ami ke ntak adooho mmeyem unwam, sia ami mmaakpeeb adiyʌkkọ naña akpebaba.

¹²Ami mmediọọñọ naña aba ke ediba ke unana, mmenyʌñ ndiọọñọ naña aba adinie umiañ. Ami mmekpeeb ndedịbe ifiọk a-abaaha ke ediyʌkkọ ke se adodo itie a-ami ñkịtte idem mmi. Mme mmedia ñyʌkkọ mme nsaña abiọñ, mme mba ke eduek mme ke unana.

¹³Ami mmekeme adinam ukeed ñkpọ ato ke anye a-nnọọhọ miin adudu.

¹⁴Kpa ye ado amaafọn ndufo edikeene ñwuana ke mme ukuud mmi.

¹⁵Mfen ñko, nte a-ndufo mme Fidibian ediọọñọke, ke mme akpa ini a-ndufo ekediọọñọke eti etob, ke ini ñketọọñọke isañ nto ke Masidonia, ufọkabasi ndomokeed ikiwanake mme ami ke ñkpọ adinọ mme adibọ, ibọhọke ndufo ikpọọñ;

¹⁶sia ke idem ini a-ñkebaaha ke Tesadonika, ndufo emaemaana enọ unwam eñsọk, emaana enọ eñsọk ke ini ñkpọ akesọññọ mme ami.

¹⁷Idooho nte ñyeyeem enọ, ado ntañ mbaña se ediidat iwet nte inie isịn ke ñwed unam ibad ndufo.

¹⁸Ami mmebọ afịd-afịd se akena eñkpe mme se ikakan ado, ennọ miin ñkpọ mfọn-mfọn, akpan-akpan idahami a-adooho mmaakebọi nto Epafrọditus mme enọ a-ndufo ekenọọhọ eñsọk. Ammọ edoñño mme enem ufịk enọ, uwa a-adotto, a-anemme Abasi esịd.

¹⁹Ndin Abasi mmi ayainọ ndufo ukeed se ndufo eyem nte asañake akekem ke mme inie ubọọñ amọ ke Krais Yisọs.

²⁰Yak ubọọñ anie Abasi ye Ete ñnyịn ke nsi-nsi nsi-nsi. Amen.

²¹Ikọọm afịd-afịd mme ndisana ikot Abasi ke Krais Yisọs. Nditọete e-ebaaha mme ami e-enọ ekọọm.

²²Ukeed nditọ Abasi e-edọñ ekọọm, akpan-akpan mbon esịd ufọk Sisa.

²³Yak mfọn Abọọñ Yisọs Krais asʌhọ mme Sịbidịd ndufo. Amen.