Read Ibibio Contemporary Bible 2020 Kodosi 1 Bible Online

Kodosi 1 - Ibibio Contemporary Bible 2020 bible

Kodosi 1

¹Bọọd, abọsịd ake Krais Yisọs a-atooho ke unyịmme Abasi, mme Timoti ayịneka ñnyịn.

²Anọ mme ndisana ye mme nditọete enieeghe mbuọdidem ke Krais ke Kodosi. Mfọn ye emem inie ndufo a-atooho Abasi Ete ñnyịn.

³Ñnyịn imisikọọm Abasi, Ete Abọọñ ñnyịn afịd ini Yisọs Krais, ke ini ñnyịn ibọññọ akam ibaña ndufo.

⁴Sia ñnyịn imikop ibaña mbuọdidem ndufo ke Krais Yisọs ye ima a-ndufo enieeghe enọ afịd mme ndisana ikot Abasi,

⁵mbuọdidem mme ima a-atooho ke idodanyen e-ekeboono ke abio ubọọñ Abasi inọọ ndufo, a-ndufo emaekekop ebaña ke ikọ akpanikọ a-atooho eti etob,

⁶a-amaakedi ibịne ndufo. Ke afịd ederimbod eti etob ami anwịm mfịd ndin aka iso akọd, kpa naña anye asʌk anam ke atu ndufo tọọñọ ke usen a-ndufo ekekoppo ndin mfọn Abasi inwaaña ndufo ke afịd akpanikọ.

⁷Ndufo ekekpeeb ami eto Epafras, adima awo nsaña ñnyịn, a-adooho anam utom Abasi anieeghe mbuọdidem ke Krais ke ubiọñ iwuod ñnyịn.

⁸Ndin anye ñko aketañ inọ ñnyịn abaña ima ndufo ke Sịbidịd.

⁹Ke ntak ami, tọọñọ ke usen a-ñnyịn ikikoppo ibaña ndufo, ñnyịn itreke adibọñ akam ibaña ndufo ndin ibeeñe Abasi ayọhọ ndufo ye ifiọk uduak amọ ato afịd ifiọk Sịbidịd mme edinwaña.

¹⁰Ndin ñnyịn ibọñ akam ami nọ ato do ndufo edu uwem a-adotto ke Abọọñ anyʌñ anem anye esịd ke afịd usʌñ: enwịm mfịd ke afịd nti utom, ekọọd ke ifiọk Abasi,

¹¹esọọñọ idem ye afịd adudu a-asañake akekem ke akpakịp adudu, nọ ato do ndufo enie ekamba ediyọ mme ime, ndin ke inemesịd,

¹²enọ Ete ekọọm, anye a-anamma ndufo edot ke ediwuana nte mme adia akpa ke inie mme ndisana ke abio ubọọñ unwana.

¹³Sia anye inyaaña ñnyịn asio ke ukara akịm ndin idat ñnyịn asịn ke abio ubọọñ Ayịn amọ a-anye amaaha,

¹⁴a-ñnyịn inieeghe adifak ye adifeen do nnọ ke mme idiọọkñkpọ.

¹⁵Anye ado mbiod Abasi a-awo mmikanna ikịt ke anyen, andido akpa andito mmana ke afịd ñkpọ se Abasi abot.

¹⁶Sia aketo ke anye ebot afịd ñkpọ mme ñkpọ ke anyọñ ye ke isọñ, se ekịt ye se mmiikịtte, mme ebekpo, mme adudu, mme andikara mme adudu ibed: anye akebot afịd mme ñkpọ anyʌñ anọ anye.

¹⁷Anye aketo aba mbemiso afịd ñkpọ, ndin ke anye emʌm afịd ñkpọ edian keed.

¹⁸Ndin anye ado iwuod ke idem, a-adooho ke ufọkabasi, anye ado ntọọñọ ndin anye ado akpa andimana ato ke atu mme akpañkpa, ndin ke afịd ñkpọ anye ado andikpon ñkan.

¹⁹Sia Abasi amaanem esịd adinam afịd uyọhọ amọ adʌñ ke anye,

²⁰ndin ato ke anye enam emem aba ke ufọọd amọ me afịd ñkpọ, ye me ñkpọ ke isọñ ye me ñkpọ ke abio ubọọñ, ke adinam emem ato ke iyiib e-ekeduọkkọ ke krọs.

²¹Ke ini akeboiyoke emaidianna ndufo ekpọñ Abasi ndin ekappa edoñño me asua ke esịd ndufo ato ke ntak idiọọkñkpọ ndufo.

²²Ado idahami anye anam enie emem adat ndufo adian ato abʌkidem Krais, ato ke ñkpa enam ndufo adisana ke iso amọ, inieeghe ndo enyʌñ ebọkkọ udod ikọ,

²³adieke ndufo ekaaha iso ke mbuọdidem ndufo, e-esọọñọ eda, e-enie iwuuk, ifemmeke ikpọñ eti etob. Anye ami ñko ado eti etob andufo ekekoppo enyʌññọ ekwọrọ enọ afịd ñkpọ se Abasi abot ke ikpaanyọñ, ndin a-ami, Bọọd, ñkappake ndo afʌn nnọ.

²⁴Idahami, ami ndat esịd ke ufen e-kebọọhọ inọọ ndufo, ndin ami ñyʌkkọ ke abʌkidem mmi se idibaaha ke abaña ukuud Krais, ke ntak ikpọkidem amọ, a-adooho ufọkabasi.

²⁵Ami mmekappa ayịnufọk amọ ke adudu ubiọñ utom a-Abasi akennọọhọ miin adiben ikọ Abasi ke uyọhọ amọ, iwọt ndufo,

²⁶ndịbe-ndịbe ñkpọ e-ekedịppe ke uwak isua ye mme uwak emana, ado idahami eyaara enọ mme ndisana awo.

²⁷Ato ke ammọ Abasi amek adiyaara ke atu mme Yentaid ubọọñ imọ ami se idịbe ke Krais abaaha ke ndufo, adooho idodanyen ubọọñ.

²⁸Anye ke ñnyịn ikwọrọ, i-inọ item inyʌñ ikpeeb afịd awo ke afịd ifiọk, nọ ato do ñnyịn inam afịd awo efọn ema ke Krais.

²⁹Ke ntak ami ke ami nnam utom, ndutʌkkọ ke afịd adudu, a-anye akamake anam akpọsọñ utom ke idem mmi.