Read Ibibio Contemporary Bible 2020 Kodosi 3 Bible Online

Kodosi 3 - Ibibio Contemporary Bible 2020 bible

Kodosi 3

¹Sia ndin, ndufo emaekeset mme Krais, ikọọñ esịd ndufo ke ñkpọ enyọñ, ke itie Krais atieeghe ke ubọk udom Abasi.

²Ikọọñ ekikere ndufo ke ñkpọ enyọñ, idooho ke ñkpọ isọñ,

³Sia ndufo emaekpa, ndin uwem ndufo idahami edịbe ke Krais ke Abasi.

⁴Ke ini Krais, adooho uwem ndufo, amaawuọ iwọt idem, ndin ndufo ñko eyaewuọ ewọt idem mme anye ke ubọọñ.

⁵Ke ntodo, ewot ndin afịd ñkpọ a-atooho ke edu uwem abʌkidem: abʌd-abʌd ido ewana awonwaan mme awodeen, ndiọiñkpọ, idiọọk itọñ, idiọọk udọñ mme udọrọ itọñ, adooho edikpono abasi mfen.

⁶Ke ntak mme ñkpọ ami ifiopesịd Abasi asʌk adi.

⁷Ndufo emaesisaña ke mme utọ usʌñ ami, ke uwem a-ndufo ekeduuho ke ini akpa.

⁸Ado idahami, ana ndufo esịññe ke idem ndufo afịd-afịd ekpọñ me utọ ñkpọ ami: iyadesịd, ifiobesịd, udu, ubiad awo anyịñ ke ikọ me ndubiam ndiọi ikọ.

⁹Ikisʌghọ nsu inọ keed aken, sia ndufo emaekesịññe ñkaan idem ndufo me utọ edu unam ñkpọ ammọ ifep,

¹⁰ndin edisịne adufa idem, ake anamma ado adufa ke ifiọk ke mbiod andibod.

¹¹Ke ami ibaaha Krik me Yuu, anịm mboppo me anye a-mmiinịmme, afai-afai, mbon Siktia, afʌn me amanaisọñ, ado Krais ado afịd, anyʌñ asịne ke afịd.

¹²Ke ntodo, nte mbon a-Abasi amekke anọ idem amọ, ndisana mme ata ndima, isịne afọñidem mbọm, mfọnido, nsuukidem, ifuure-ifuure ido mme ime.

¹³Iyọ mme keed aken ndin ifeen se ñkpọ ake adodo enie ebaña keed-a-keen. Ifeen kpa naña Abọọñ afeen inọ ndufo.

¹⁴Ndin ke akanna afịd mme nti ido ami, sịne ima, a-abọppọ afịd ammọ ami adian keed ke usʌñ a-afọnnọ ama.

¹⁵Yak emem Krais akara ke esịd ndufo, sia nte mbaak idem ke idem keed ekikood ndufo enọ emem. Ndin inie esịd ekọọm.

¹⁶Yak ikọ Krais adʌñ ke idem ndufo mfọn-mfọn naña ndufo ekpeeb enyʌñ enọọñọ keed aken item mme afịd ifiọk, naña ndufo ekwọ mme ikwọ saam, ikwọ Abasi mme ikwọ Sịbidịd ye esịd ekọọm enọ Abasi.

¹⁷Ndin se adodo a-ndufo enamma, me ke inua ikọ me ke adinam, inam afịd ke anyịñ Abọọñ Yisọs, inọ Abasi Ete ekọọm ato ke anye.

¹⁸Ibaan, isuuk iwuod enọ mme ebe ndufo naña adod ke Abọọñ.

¹⁹Mme ebe, ima ibaan ndufo ikiinyʌñ isọñ ido ye ammọ.

²⁰Nditọ, ikop uyo mme ete ye eka ndufo ke afịd ñkpọ, sia ami anem Abọọñ esịd.

²¹Mme ete, ikiinam uwem adooro nditọ ndufo, mmiidooho ntodo ammọ eyaeduọọk idodanyen.

²²Nditọufọk, ikop uyo mme eteufọk ndufo ke isọñ ke afịd ñkpọ, ndin inam ado, idooho idaha anyen ammọ iseeghe ndufo adibọ mfọn nto ammọ, ado ke esịd akpanikọ ye ukpono Abọọñ.

²³Se adodo a-ndufo enamma, enam anye mme afịd esịd ndufo, nte enam enọ Abọọñ, idooho nte enam enọ awo,

²⁴sia afo amediọọñọ ke ayaabọ udeme ñkpọ ayịn isọñ ato Abọọñ, nte utịp. Ado Abọọñ Krais ke ndufo enam ñkpọ enọọ.

²⁵Awo keed ake adodo a-anamma ndudue eyaekpe anye utịp ndudue, adusad ndomokeed ibaaha.