Read Ibibio Contemporary Bible 2020 1 Tesadonia 5 Bible Online

1 Tesadonia 5 - Ibibio Contemporary Bible 2020 bible

1 Tesadonia 5

¹Idahami nditọete, ke abaña ini ye mme usen afiọñ, ufọn ibaaha ñnyịn adiwet inọ ndufo.

²Sia ndufo emediọọñọ mfọn-mfọn ete ke usen Abọọñ adidi nte inọ ke akoneyo.

³Idaha mme awo ebooho “Emem ye ifuuro,” nsobo ayaasịm ammọ ke idaha keed wap, nte ubiak uman asịm awonwaan a-asañake ye idịb, ndin ammọ idiibọkkọke.

⁴Ado ndufo, nditọete, ibaaha ke akịm, ntodo inaaha usen ami iwaad ndufo nte inọ.

⁵Afịd ndufo edo nditọ unwana ye nditọ uweemeayo ñko. Ñnyịn idooho ake akoneyo me ake akịm.

⁶Ndin, yak ñnyịn ikuuba nte mbon mfen, e-edaiyake idab, ado yak iba ke mbeeñe idem,

⁷Sia mbon se idaiya idab, edaiya ke akonayo, mbon se ukọd anaam, anaam ke akoneyo

⁸Ado sia ñnyịn idooho mbon uweeme, yak inie mfadidem, isịne mbuọdidem ye ima nte ukpeme ikpana esịd ye idodanyen adinyaaña nte itam ukwak.

⁹Sia Abasi ikimekke ñnyịn ibo idibọ ufen ifiobesịd, ado nọ ibọ adinyaaña a-atooho Abọọñ ñnyịn Yisọs Krais.

¹⁰Anye akekpa inọ ñnyịn nọ ato do, me ñnyịn ideedemme me idaadaiya, ñnyịn ikpidʌñ keed ye anye.

¹¹Ndin, isọọñọ keed aken inyʌñ ibọp keed aken edakka eda, kpa, ke akpanikọ, naña ndufo esʌk enam idahami.

¹²Idahami ñnyịn imikpeiye ndufo nditọete, ite enọ mbon e-enamma utom akpọsọñ ke atu ndufo ukpono, i-ikarake ndufo ke Abọọñ e-enyʌññọ inọ ndufo item.

¹³Ikama ammọ ke ekamba ukpono ke ima ke ntak utom ammọ. Idu uwem ke emem ye keed aken.

¹⁴Ndin ñnyịn ikpak ndufo idem nditọete, ite enọ mbon e-fuiyoke ifu item, edọñ mme mbon e-efegheke ndịk esịd, enwam mbon se idem amem, enie ime ye afịd awo.

¹⁵Ikịt ibo ke awo ndomokeed isiooho emọ-emọ usieene idiọọk, ado enwana adinie etiido ye emọ-emọ ye mme mbon mfen.

¹⁶Idaara afịd ini,

¹⁷ibọñ akam afịd ini.

¹⁸Ke ñkpọ keed a-adoohodo ikọọm Abasi, sia ami ado uduak Abasi inọ ndufo ke Krais Yisọs.

¹⁹Ikiiyaak ikañ Sịbidịd anịme;

²⁰Ikiinyʌñ isịn mme brọfesi ke ndek.

²¹Idomo afịd ñkpọ ise; inyʌñ imʌm se ifọn ikama.

²²Ifeghe ikpọñ afịd ñkpọ se ido idiọọk.

²³Yak Abasi ke idem amọ, Abasi emem, anam ndufo esana mfọn-mfọn. Yak afịd Sịbidịd ndufo, ukpọñ ye abʌkidem ekụụnie ndo ndomokeed ke adidi Abọọñ ñnyịn Yisọs Krais.

²⁴Andikood ndufo ado akpanikọ, ndin anye ayaanam ami inọ ndufo.

²⁵Nditọete, ibọñ akam inọ ñnyịn.

²⁶Ikọọm afịd ikọd Abasi ke adisana ntʌminua.

²⁷Ami mmekpeiye ndufo ke iso Abọọñ nte ekood ñwed ami enọ afịd nditọete.

²⁸Yak mfọn Abọọñ ñnyịn Yisọs Krais aba ye ndufo.