Read Ibibio Contemporary Bible 2020 1 Timoti 3 Bible Online

1 Timoti 3 - Ibibio Contemporary Bible 2020 bible

1 Timoti 3

¹Ikọ ami ado akpanikọ: Awo ake adodo a-ayemme edidat itie nte andise ñkpọ mbaña ufọkabasi, anye ayem eti utom.

²Ndin andise ñkpọ mbaña ufọkabasi ana ado utọ awo a-awo mmiikanna inie idiọọk ikọ se etañ edian anye, anye ado ebe anwaan keed, awo a-anieeghe mfat idem, anie eti iwuod, ye ukpono, anye anna ado awo a-atʌmmọ akama isenawo a-asañake ke nneke-nneke usʌñ anyʌñ ado eti andikpeeb,

³inaaha anye ado awo u-ukọd asinaama, idooho awo abom, ana anye ado awo a-asuuhọke idem, awo a-mmiimaaha aditọhọ utọk mme awo a-miisịnne esịd ke akʌk.

⁴Ana anye ado awo a-atʌmmọ akama ufọk amọ, a-atʌnọke nditọ amọ, anyʌñ atemme ammọ edidu uwem ukpono.

⁵(Adieke awo mmiikanna ikama ufọk amọ, anye adinam die ikan ikara ufọkabasi?)

⁶Yak anye akuudo ufa awo ke ido ukpono Abasi, mbaak anye adikokko idem, ndin ato ke ado anye aduọ adʌk afia setan.

⁷Ñko, ana anye ado awo a-anieeghe eti ndagha ke atu mbon a-mmiidiọọñọke Abasi, mbaak anye adidia esuenne adinyʌñ aduọ ke afia idomo andidiọọk.

⁸Mme dikịn ñko, ukem-ukem nte mme akwọrọ ikọ, ena edoñño mbon e-edotto ukpono, mme dikịn inaaha enie edeme ikọ iba, idoññoke mbon e-enwọññọ ukọd akpọsọñ, mbon udọrọ itọñ ke akʌk.

⁹Ana ammọ emʌm ndedịbe ñkpọ mbuọdidem ekama ye esịd e-mmiibiommo ammọ ikpe.

¹⁰Ana eto diin eduuñọ ammọ ese mme edot, mbemiso emek ammọ nte mme dikịn.

¹¹Ñko, ibaan ndọ ammọ ena edoñño mbon e-edotto ukpono, idoññoke mbon ñkeñ inua, ado ammọ ena ekama idem ke ufad, enyʌñ enam akpanikọ ke afịd ñkpọ.

¹²Dikịn inaaha ama awonwaan mfen ke esiin, ñko ana anye atịm nditọ amọ ye afịd ufọk amọ akama.

¹³Mbon e-emaekenam utom nọ afọn ebọ saña-saña itooro ye ekamba uko ke mbuọdidem ammọ ke Krais Yisọs.

¹⁴Akpesʌk ado mmeduak adisọp adiduse fiin, ami nsʌk nwewet mme ewʌhọ ami ma ato do,

¹⁵adieke ñkpeeneke adidi, ñwed ami ayaanam afo adiọọñọ naña mme awo ekpenaa edu uwem ke ufọkabasi, a-adooho adaha ye itiad idakisọñ akpanikọ.

¹⁶Eniin akuuba ke atu ndufo abaña ido ukpono Abasi ñnyịn sia ado ekamba utịbe ñkpọ: Ado anye akeyaara idem amọ ke ikpọkidem, anye ado Andinen ke Sịbidịd mme enyere emaekịt anye. Emaekwọrọ anye ke atu mme idịd, emaenịm anye ke akpanikọ ke ederimbod, ndin eben anye edọọk ke ubọọñ.