Read Ibibio Contemporary Bible 2020 1 Timoti 6 Bible Online

1 Timoti 6 - Ibibio Contemporary Bible 2020 bible

1 Timoti 6

¹Yak mme afʌn enam utom ke akpọnọ enọ mme eteufọk ammọ mbaak awo adisappa anyịñ Abasi mme ukpeeb ñkpọ.

²Adieke adʌññọ ye awo anịmme Abasi ke akpanikọ, kuumiim anye ato ke ntak a-ndufo edoñokke mme andinịm ke akpanikọ. Utu ke ado, kap nekke nam utom nọ anye afọn akan, sia mme adia ufọn utom ado edoññoke mme akpono Abasi ye nditọ ima amọ ñko. Ana ekpeeb enyʌñ enwam mme awo adinam mme ñkpọ ami.

³Adieke awo akpeebe nsu-nsu ukpeeb e-mmiisañake ikikem ye item akpanikọ Abọọñ ñnyịn Yisọs Krais ye ukpeeb ñkpọ a-asañake mme uteñe Abasi,

⁴anye ado awo ñkokkoidem a-ammiidiọọñọke ñkpọ ndomokeed. Esịd amọ asịne ke eniin ye anwan-anwan ikọ a-adatta ufịp, utọk, utañ, udu, mme ndiọi akikere idiọọk,

⁵ye mme ndutuai afịd ini ke atu mme mbon ndoi ekikere, mbon e-miinieeghe akpanikọ aba, e-ekereke ebo ke ikọ Abasi ado ñkpọ ukama ndia udod.

⁶Ado, uteñe Abasi ye uyʌkkọ se awo anie ado ata ekamba udod.

⁷Sia ñnyịn ikikamake ñkpọ ba keed idi ederimbod, idinyʌññọ iben ndomo ñkpọ keed inyọñ.

⁸Adieke ñnyịn inieeghe ñkpọ se idia, ye afọñ se isịne, iyaiyʌkkọ ke ado.

⁹Mbon e-eyemme edido mbon inie esiduọ edʌk ke idomo, mmidooho eyịre ke afia, ye idiọọk ndisịme udọñ a-asidatta ammọ akesuunọ ke mbiara ye nsobo.

¹⁰Sia udọrọ itọñ akʌk ado adʌñ ukeed idiọọkñkpọ. Ndin ato ke adinyanna mbịne akʌk, uwak awo emaeduyo ekpọñ mbuọdidem, enyʌñ edat uwak mfʌhọ enọ idem ammọ unan.

¹¹Amaado afo, awo Abasi, feghe kpọñ mme ñkpọ ami, yiire ke nnen-nnen ido, uteeñe Abasi, mbuọdidem, ima, ime ye nsuukidem.

¹²Nwana eti anwan mbuọdidem, sọọñọ mʌm nsi-nsi uwem kama, e-emaekukood fiin ete abọ anie, a-afo akenyʌññọ ayaara ke iso uwak ntiense.

¹³Ke iso Abasi, a-anọọhọ ukeed ñkpọ uwem, ye ke iso Krais Yisọs, a-aketañña eti ikọ mbuọdidem ke iso Bọntiọs Baided, mmuwuuk fiin

¹⁴nte anịm ewʌhọ ami ayọhọ-ayọhọ, anyʌñ anana ndo me se etañ edian anye, tutu usen adidi Abọọñ ñnyịn Yisọs Krais.

¹⁵Amaakem ini, Abasi ayaayaara ñkpọ ami, kpa anye Abasi a-adooho adiọdiọñ Andikara ikpọọñ-ikpọọñ, Adidem mme ndidem ye Abọọñ mme mbọọñ,

¹⁶anye ikpọọñ mmiidiikpaaha ñkpa anyʌñ adʌñ ke unwana a-awo mmiikanna adisaña ñkpere, Kpaanam awo ikịtte anye inyʌññọ ikan ikịt. Ubọọñ ye adudu enie anye ke nsi-nsi. Amen.

¹⁷Sọọñọ tañ nọ mme anie ñkpọ awo ayo ami ate yak ammọ ekuutañ idem; ekuunyʌñ ekọọñ idodanyen ke inie a-akemeke iyaañ awo, ado yak ammọ edot anyen ke Abasi i-inọọhọ ñnyịn ukeed ñkpọ uwak-uwak, ate idaara ito do.

¹⁸Bo ammọ enam nti utom uwak-uwak, enyʌñ efọn ido, enyʌñ ebeeñe idem ediwuana se ammọ enie ye mbon mfen.

¹⁹Ke adinam ntom ammọ eyaetʌm inie ebono enọ idem ammọ, inie a-adooho eti itiad idakisọñ ke ini iso, nọ ammọ ediikan imʌm uwem adooho ata uwem ikama.

²⁰Timoti, nekke kpeme se emaekeyaak usịn fiin ke ubọk. Sio idem mfo kpọñ uyaha ndutañña ikọ ye uyịre-uyịre eniin, ye nsu-nsu ifiọk,

²¹a-adooho mme ñkpọ ami e-enam mme awo eduọ ekpọñ mbuọdidem. Mfọn Abasi asʌhọ ye afo.